2 थेस्लोनिकि 1 - धिमाल1 केलाइको परमेस्वर आबा रो प्रभु इसु ख्रिस्टको थेसलोनिकिता हिका मन्डलिको द्याङगेलाइहेङ केलाइ पावल, सिलास रो तिमोथिसो इदोइ चिथि लेखेदोङन्हाखे। 2 परमेस्वर आबा रो प्रभु इसु ख्रिस्टसो नेलाइहेङ निगाहा रो सान्ति प्याको। ख्रिस्टको पाका निया 3 दादाओने बाइओनेनेलाइ, नेलाइको भाअ्सिङ परमेस्वरहेङ दिनाङ च्याबास चार्हाइन्हाखे। हाइपानु नेलाइको खान्धुर हेन्जाङ बार्हेदोङखे रो एमि भेनेङदोफा नेलाइ झाराङको माया बुङ बार्हेदोङखे। 4 इदोइभाअ्सिङ नेलाइहेङ बोमि सान्ताइका रो तु: पिलाउ बुङ नेलाइको सहेका सरबङ रो खान्धुर हिनाङसिङ परमेस्वरको बो मन्डलिगेलाइता बुङ तुजुक पातेङ नेलाइको बारेता केलाइ धुइलि द्वाङ। 5 परमेस्वर झाराङ द्याङगेलाइहेङ उचितसो निया पाखे दोअ्तेङ इदोइ काथागेलाइहोइ दासि पिखे। कुलाउ इदोइ गोताङ थोक सहेका परमेस्वरको सारभिको लायक जेङका द्याङगेलाइ दोअ्तेङ नेलाइहेङ वा दोअ्खे, हाइदोनु वाको सारभिको भाअ्सिङ दोङ नेलाइ तु: भोगिदोङसुखेना। 6 परमेस्वर हासुहेङ बुङ पछेपात मापासिङ निया पावा, नेलाइहेङ तु: पिकालाइहेङ वा तु: प्यावा। 7 तु: सहेका नेलाइ रो केलाइहेङ वा छुटकारा प्यावा। वा प्रभु इसु सरबङहिका सादेलचरगेलाइ दोफा मेको रापता सादेलसो लोलाउ इदोइ गोताङ पावा। 8 कालाउ परमेस्वरहेङ मानाल्कालाइहेङ रो केलाइको प्रभु इसुको रेम्काबानाल मासाअ्कालाइहेङ वा दार प्यावा। 9 एम्बालाइ हेअ्लाउ मादोका मुअ्काको दार निनावा, कालाउ प्रभुको आगासो रो वाको सरबङहिका प्रतापसो खेङन्हावा। 10 इदोइ काथा प्रभु इसु लोका दिनाता ज्यावा। इङको दिना परमेस्वर ताइको पुनित जनगेलाइसो मान निनावा। नेलाइ बुङ एम्बालाइदोफा हिस्वाना, हाइदोनु नेलाइ केलाइको पारचार पाका रेम्काबानालहेङ खान्धुर पासुन्हा। 11 इदोइभाअ्सिङ केलाइ नेलाइ झाराङको भाअ्सिङ दिनाङ पुकार बुङ पान्हाखे। केलाइको परमेस्वर नेलाइहेङ वाको काइकाको लाएक बान्हायाको, गोताङ रेम्का धेय रो खान्धुरको कामहेङ वाको सरबङसो पोङघा पालि साहेता पाको। 12 कोलाउ नेलाइसो केलाइको प्रभु इसुको मिङको मान ज्यावा कालाउ वासो नेलाइको बुङ मान ज्यावा। हाइदोनु नेलाइ केलाइको परमेस्वर आबा रो प्रभु इसु ख्रिस्टसो निगाहा निङका हिसुन्हा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.