1पतरुस 5 - धिमालआगुवागेलाइ रो धानागेलाइहेङ 1 एला का नेलाइकोता हिका मन्डलिको आगुवागेलाइहेङ एलोङ काथा दोअ्ताङका। ख्रिस्टको भोगेका तु: का ताइमि दोङ तिङका हिघा। कालाउ देखाल जेङलि तोम्का प्रतापता का बुङ भाग र्हुकाङका। का बुङ मन्डलिको आगुवा हिनाङसिङ नेलाइहेङ दोअ्दोङखा, 2 परमेस्वर नेलाइको जिमाता पिका वाको जनगेलाइहेङ रेम्फा खाङकाखुङका पाका जेङसु। करकापता माको, कालाउ ताइ मनहोइ लेङचातेङ पासु। टाका कामाइका हिसाबसो माको, कालाउ परमेस्वरको लाल्साआन्सार चाकर जेङतेङ पासु। 3 नेलाइको जिमाता हिकालाइर्हुता हाइकम चालाइतेङ माको, कालाउ एम्बालाइको भाअ्सिङ उपमा जेङसु। 4 जेलाउ मुल घोका ख्रिस्ट देखाल जेङन्हावा, कोलाउ नेलाइ दिनाङ चिल्कातेङ हिका प्रताप रो मानको ताज निङस्वाना। 5 एन्साङ पातेङ धानागेलाइ, नेलाइ बुङ मन्डलिको आगुवागेलाइको आधिनता हिसु रो नोइतेङ एमि भेनेङको चाकर पासु। हाइपानु धरमकिताबता इसिका लेखेन्हाका हिः “परमेस्वर तुजुकिगेलाइको खिलाप पावा, कालाउ नोइकालाइहेङ निगाहा पावा।” 6 इदोइखातिर सरबङहिका परमेस्वरको आधिनता हितेङ नोइका जेङसु। कालाउ वा नेलाइहेङ उचित पहरता तोल्ह्यावा। 7 नेलाइको गोताङ फिकिरगेलाइ वाको आगाता ताअ्पिसु। हाइदोनु वा दोङ झाराङहेङ खाङकाखुङका पावा। 8 हुस ताअ्सु रो चानाखा जेङसु। हाइदोनु नेलाइको दुस्मन दियाबलस डिकिरिम्का झाबिरिभाइपाङ हासुहेङ निनाङका रो चाङका दोअ्तेङ दाउ खान्तेङ घुराइगिल्दोङखे। 9 नेलाइ झाराङ खान्धुरता बोल्याका जेङसु रो दियाबलसको खिलापता ए जेङसु। हाइदोनु नेलाइभाइपाङ दुनियाको चारबितङ हिका बो खान्धुरि दादाओने बाइओनेगेलाइ बुङ इसिकाङ तु: भोगितेङ हि दोअ्का काथा नेलाइ दोङ गेसुखेना। 10 हेन्जाङ निगाहा हिका परमेस्वर ख्रिस्टता ताइको असिम प्रतापको भाअ्सिङ नेलाइहेङ काइका हि। नेलाइ आतुइसा पहर तु: भोगेकान्हुअ्सो वा दोङ नेलाइहेङ आरोङ नावा बान्हाइतेङ अचल बान्हाइयावा रो सरबङहिका बान्हाइयावा। 11 परमेस्वर ताइको सरबङसो दिनादिनाङ राज पातेङ ह्याको। आमेन। आखिर सेउपाका 12 काङको खान्धुरि ओने सिलासको मदतसो इदोइ पोतोका चिथि नेलाइहेङ लेखेका हिघा। का इदोइ चिथिता परमेस्वरको जातिङको निगाहाको दासि पिलि रो नेलाइको हाउसाला बार्हेपापिलि भाअ्सिङ लेखेका एइ। कालाउ नेलाइ इदोइ निगाहाता बोल्याका जेङलि दोसु। 13 नेलाइ भाइपा परमेस्वरसो सालन्हाका बेबिलोनको मन्डलिको खान्धुरि रो काङको खान्धुरि चान मरकुस बुङ नेलाइहेङ सेउपाका पिगिल्का हि। 14 कालाउ ख्रिस्टको मायाता एमि भेनेङहेङ सेउपाका हिङपापिसु। ख्रिस्टता हिका नेलाइ झाराङहेङ सान्ति ज्याको। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.