1पतरुस 3 - धिमालकेअ् रो बेअ् 1 बेअ्गेलाइ, नेलाइ ताइको केअ्को आधिनता हिसु। एन्सा जेङनु परमेस्वरको कथनता खान्धुर मापाका नेलाइको केअ्गेलाइ बुङ ताइको बेअ्गेलाइको बेभारसो नेलाइ हाइदोङ मादोअ्लाउ बुङ एम्बालाइ परमेस्वरको कथनता खान्धुर पावा। 2 हाइदोनु नेलाइ परमेस्वरहेङ मान पाका रो पुनित जेङतेङ हिका एम्बालाइ ताइकोङ मिहोइ तिनावा। 3 नेलाइ पुसुङ काइतेङ, सोनाको गाहाना रो जाङका धाबा लागाइतेङ रेम्लि माभोसु। 4 कालाउ नेलाइको रेम्काचाहिँ मन लिअ्ताङ ह्याको, जेदोङ हेअ्लाउ बुङ माचुअ्का, नोइका रो सिपापा हाङसाको रेम्का एइ। कालाउ इङको चाहिँ परमेस्वरको आगाता हेन्जाङ मोलको हि। 5 हाइदोनु परमेस्वरता भर पाका लाम्फाको धरमाति बेबालाइ ताइमिङहेङ बुङ एसापा सोबाइ पाघाखे रो ताइको केअ्को आधिनता बुङ हिघाखे। 6 सारा बुङ इन्सिकाङ हिघाहि, जाइ ताइको केअ् आब्राहामको दोअ्का साअ्घाखे रो वासेहेङ “काङको गिर्हि” दोअ्घाखे। एदि नेलाइ बुङ रेम्का काम पासुन्हा रो हिदिङ बुङ काथाता माथिसुन्हा पानु नेलाइ साराकोङ चामिन्दिगेलाइ जेङस्वाना। 7 केअ्गेलाइ, नेलाइ ताइको बेअ्गेलाइहेङ मादोका फोमपातेङ मान पासु। हाइपानु एम्बालाइ बुङ नेलाइदोफा दोङ परमेस्वरको पिका ज्यान निनावा। एसापा नेलाइको पाका पुकारता हिदिङ खाल्को बाधा माल्वाको दोअ्तेङ एमि भेनेङदोफा रेम्का बेभार पासु। रेम्का काम पालाउ लोका तु: 8 आखिरता दोअ्खा, नेलाइ झाराङ एलोङ मनको जेङतेङ एमि भेनेङहेङ तु:ता साघाइसु। ताइको दादाओने रो बाइओने भाइपाङ एमि भेनेङहेङ इन्ताना पासु। कालाउ नोम्का कोन्धाङको रो नोइका मनको जेङसु। 9 एदि हासुङ नेलाइहेङ मारेम्का पाहि पानु इङकोहेङ मारेम्का मापासु। इङको नेलाइहेङ साराप पिलाउ बुङ नेलाइ इङकोहेङ साराप मापिसु, भुरुङ इङकोहेङ सहसाम्पा पिसु। हाइदोनु परमेस्वर याकोङ भाअ्सिङ नेलाइहेङ काइका एइ रो नेलाइ वासो सहसाम्पा निङलि दोसु। 10 धरमकिताब एसा दोअ्खे, “जाइ ताइको ज्यानहेङ दायाखे, रेम्का दिनागेलाइ तिङलि लाल्सा पाखे पानु, इङको ताइको देतोङहेङ मारेम्कासो रो ताइको दिरबेहेङ छल काथा धुइकासो फारापा ताअ्ताको। 11 इङको मारेम्का काम पालि लाअ्तेङ रेम्का काम पाको, इङको सान्तिहेङ भोकाको रो इङकोहेङ पितायाको। 12 हाइपानु परमप्रभु धरमाति द्याङगेलाइहेङ खाङखे रो एम्बालाइको पुकार हिङखे। कालाउ बुङ परमप्रभुको र्हाइ आसाति काम पाकालाइको खिलापता हिखे।” 13 एदि नेलाइ रेम्का काम पालि भोसुखेना पानु हासु नेलाइहेङ तु: प्यावा कुनु? 14 नेलाइहेङ तु: पिका हासुङदोफा माथिसु रो सोक बुङ मापासु। रेम्का काम पालाउ तु: भोगेलिगोइलाउ बुङ परमेस्वर नेलाइहेङ सहसाम्पा प्यावा। 15 ख्रिस्टहेङ नेलाइ कोन्धाङसोङ प्रभु साअ्तेङ वासेहेङ मान पासु। नेलाइलिअ्ता हिका आसको बारेता हासुङ हिअ्हि पानु इङकोको बारेता दोअ्पिलि दिनाङ त्यार हिसु। 16 कालाउ एसापा दोअ्पिलाउ नोइतेङ, मान पातेङ दोअ्सु रो ताइको मन साफा ताअ्सु। एन्सा जेङनु नेलाइ ख्रिस्टहेङ पिताइलाउ पाका रेम्का चालचलनहेङ तिङतेङ नेलाइको खिलापता धुइतेङ बादनाम पाकालाइ ताइमिङ लेदेरावा। 17 मारेम्का काम पातेङ तु: भोगेका खान्तेङ ते भुरुङ रेम्का काम पातेङ परमेस्वरको लाल्साआन्सार तु: भोगेलि दोङ रेम्का जेनावा। 18 हाइदोनु केलाइहेङ परमेस्वरकोता थुकापालिको भाअ्सिङ ख्रिस्ट धरमाति हिलाउबुङ अधरमातिगेलाइको कुकरमको भाअ्सिङ ए खे सिहि। वा जिउता सिहि कालाउ बुङ परमेस्वर वासेहेङ हाङसाको सरबङसो सिन्हुपाहि। 19 कालाउ वा इङकोङ हाङसाको सरबङता हानेतेङ थुनाता वालाका हाङसागेलाइहेङ पारचार पाहि। 20 इदोइ हाङसागेलाइ चाहिँ नोआ चिजाहाज बान्हाइका पहरता ताइको पाका कुकरमसो घुर्याङ बे दोअ्तेङ परमेस्वरको र्हुम्का हाङसागेलाइ हिघाखे। कालाउ बुङ एम्बालाइ परमेस्वरको काथा माहिङहि। चिजाहाजता हिका येअ्मि खिनिङ चिसो बान्चेका हिघाखे। 21 इदोइहोइ बतिस्माहेङ तिङपाखे, जाइ नेलाइहेङ सिन्हुपाखे। इदोइ ताइ जिउको आखेका झाका भाइका माको, कालाउ इदोङ एल्का मनहोइ परमेस्वरदोफा पाका कबोल एइ। कालाउ जेसापा इसु ख्रिस्ट सिकासो सिन्हुपान्हाहि एन्साङ पातेङ बतिस्माहोइ नेलाइहेङ बुङ बान्चेपावा। 22 वा सिकासो सिन्हुका न्हुअ्सो सादेलता हानेहि रो परमेस्वरको दाम्पाहा योम्हि। कालाउ गोताङ सादेलचरगेलाइ, गोताङ खाबरागेलाइ रो गोताङ सरबङगेलाइ वाको आधिनता हि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.