Mika 3 - Deduamiti

Mikango Enara demeting ayemmeec

¹ Ifi anu yofi deai, “Yacakowac esamedac yeneac enara nga Isracelac oruha, ngeni kedzac kpema negenggec. Ngeni faka dindingacac fagung faficgoc kecgec ngereebac,

² ammanu ngeni faka gombung ngadehema manganaac songo negengandae. Ngeneac fakanginango siric yofi isoc ande, ngeni ngicngacfocna yeneac sebihodung kpetima sicfunac fusingina hetiandae;

³ Nga ngicngacfocna yeneac fusi nema sebihodungngina hepotockema neandae nga sicngina hetackema hedzameandae. Ifi amma fusingina ahaparang kpema sebingina enannu dzeande ifi isoc hesisickeandae.”

⁴ Ngeni faka mangana anggecac amma naso mong habesande imohai ngeniKebuaru kiacgec yeng ngadengunuma turunga mi merengngemmeude.

⁵ Kebungo yofi dede: “Profete yeni ngicngacfocna ikocfu wangecyunuandae amma mongngo semeng gumecyunude, yeac witiu ruae dekperagiandae. Nga mongngo imoc mi anudeu ine yare fingecyemmeudeac dekengec ayemmeandae.

⁶ Ifiac amma toforecngo hayemmeude, imoc kpefinga kpac. Nga kundungngo semeyunuude, imoc ifingoc mamoha kpahac. Anu wenacngo profete yenearu kemeu uamemengo kundung kpeu profete uanginango kpacanude.

⁷ Ifi anu Anutuarunac turunga mi haudeac amma ongaheheng yeni gameyunuude nga mamocngic yeni mesukiki amma kicmesungina sasawa semegecde.”

⁸ Ni neanna ine Kebuac Asuac kuc imocgoc wakewakea kecma faka dindingac nga kucgoc namma Yacakowac esamedac yeneac yoackpekpe faka nga Isracelac kopocsic, imoc dekperagibade.

⁹ Yacakowac esamedac yeneac enara nga Isracelac oruha sasawa ngeni yofi negenggec. Ngeni angammeme gombunga ngadehema faka dindingac femanu netohoma menggbaringgeandae.

¹⁰ Ngeni Tsionnu amagerec imoc sackpakekpake fakagoc meandae nga Yerusalaimnu amagerec imoc faka manganagoc meandae.

¹¹ Ammanu enara ngeni ngicngac yeneac desidesi ua gombunga megecdeac dzongo kererengunuandae amma womonggareng ngeni bummengunugecdeac dederecge ayemmeandae nga profete ngeni hiedzo ngemmegecdeac negemma wiac ngade fingerudeac edeyunukecdae. Ifi ammaguc ineKebuacmemeficarugeng fima yofi deandae, “Kebungo nenang botucfu kecmanu ebicngo naric mi hanemmebesande.”

¹² Ifi anu enara yeneac kopocsicac amma Tsion medzamegec homecnecac sobeng isoc anude. Ammanu Yerusalaimngo manganeu hocngo dzamema seuc isoc emma nanude nga womongngo manganeu sifecbuma imoc ichasango tohoma merucgeude.