Tobi 8 - A SƐB-SÕW

¹ Bɛ na tɩ dɩ ɛ́ nyũ baar'a, bɛ tɩ bɔbr'a kɛ́ bɛ gã. Bɛ tɩ tɛr'ɩ a pɔlbile kpɛ n a di-gana pʋɔ.

² Lɛ n'a a Tobɩasɩ tɩ lɛb tɩɛrɩ a Arafayɛl wulu: ʋ tɩ ír'ɩ a zʋ́m sabr nɩ a socir a ʋ kɔr pʋɔ, dɔwlɩ a vũu-bie na be a tɩ-suur-zɔ̃-na-nyùur-vla-vla-a nyɩwfʋ-kole pʋɔ a zu.

³ A nyũu na tɩ ìre a, tɩ diw nɩ a kɔ̃tɔn, ʋ zɔ a zi-vuo pʋɔ tɩ sãá Eziptɩ tẽw. A Arafayɛl tɩ diw ʋ na tɩ nyɔw ʋ a be, 'lẽ nɩ bãzɔlɛ a pɛr nɛ pʋɔ.

⁴ Al pùorí, a sãà mɩnɛ tɩ yi n a dĩó ɛ́ pàw a pan. Lɛ n'a a Tobɩasɩ tɩ ìr a gado zu ɛ́ yel a Saara: «Ɩ̃ yeepuule e, ìr tɩ puori zɛlɩ a Sore yãayãa k'ʋʋ zɔ a tɩ nɩbaalʋ ɛ́ gù tɩ.»

⁵ A Saara tɩ ìr'a, bɛ tĩ zɛlɛ a Sore yãayãa k'ʋʋ gù bɛ. Nyɛ̃ a Tobɩasɩ puoru: «Tɩ sãàkʋm-kore Naaŋmɩn i, tɩ danɛ fʋ na! A fʋ yúor, ʋ tɛr danʋ kʋralɛ! A bʋ̃-íri za na be a salom zu nɩ a tẽw zu a, a danɛ fʋ kʋralɛ!

⁶ Fʋ̃ʋ n'ʋ ír a Adama, fʋ̃ʋ n'ʋ maalɩ sõwne nɩ tɩɛrɛ kʋ̀ ʋ, a ʋ pɔw Awa, ɛ́ a nɩbɛ ayi bɛ ŋa zie n'a a nɩsaal bʋʋrɛ yi. Fʋ̃ʋ n'ʋ tɩ yel: “A bɛ sɛw k'aa dɛb ɩ ʋ yõ ɩ, ɩ̃ na maal'ɩ sõwne na ŋmɛ̃ taa nɩ ʋ a kʋ̀ ʋ.”

⁷ Ƴɛrɛŋa a, pɔw vʋla na bɛ tu a wulu a bɛ n'a so ɩ̃ kule a Saara ɩ, ɛcɛ ɩ̃ na tu fʋ bɛ lɛb pùor a n'a so. Ɩ̃ zɛlɛ fʋ na, zɔ a mãa nɩ a Saara nɩbaalʋ ɛ́ ɩ tɩ za ayi vʋʋrɩ tɩ kòr yaga za.»

⁸ Al pùorí bɛ za lãw yel: «Amɛn! Amɛn!»

⁹ Al pùorí bɛ gã kɛ́ bɛ gúr.

¹⁰ Ɛcɛ a Araguwɛl tɩ ìr'a bʋɔlɩ a ʋ tõ-tõ-biir ɓã taa. Bɛ tɩ cen na tɩ tuw yaa-bɔw. Bʋ̃ʋ n'ʋ vɛ̃, a Araguwɛl tɩ tɩɛr'ɩ ʋ pʋɔ à ŋá: «A pɔlbile wa mab kpi a, bɛ na ɩrɛ tɩ na laar tʋʋr'ɩ tɩ.»

¹¹ Bɛ na wa tuw a yaa-bɔw baar'a, a Araguwɛl tɩ lɛb'a wa a yir, wa bʋɔlɩ a ʋ pɔw,

¹² ɛ́ yel ʋ: «Tõ tõ-tõ-bi-pɔw kãw a dĩó ʋ tɩ nyɛ̃, a Tobɩasɩ cãà na vʋʋrɛ bɩɩ? Ʋlɛ wa kpi a, tɩ na tʋ̃ɔ́ na ũù ʋ ɛ́ nɩr bɛ bãwnɩ a ɩ.»

¹³ Bɛ tɩ bʋɔl'ɩ a tõ-tõ-bi-pɔw ʋ wa. Bɛ tɩ tɔ̃w nɩ fɩ̃tɩlɛ kʋ̀ ʋ, ɛ́ yuo a dĩo pan. A tõ-tõ-bi-pɔw tɩ kpɛ na tɩ nyɛ̃ bɛ za ayi bɛ gúr kpalɩtam.

¹⁴ Ʋ tɩ lɛb'a yi tɩ yel kʋ̀ bɛ: «Ʋ vʋʋrɛ na! Yel bɛ ka be ɩ.»

¹⁵ A lɛ n'a a Araguwɛl tɩ puori a Naaŋmɩn na be a salom zu a, yel'ɩ: «Naaŋmɩn i, a sɛw na k'aa pʋ-pɩɛlʋ dem danɛ fʋ, bɛ danɛ fʋ kʋralɛ!

¹⁶ Fʋ̃ʋ so puoru, a nʋ̃ɔ̀ fʋ na paalɩ mɛ̃ a ƴãw! Bʋ̃ʋ n'ʋ vɛ̃, a lɛ ɩ̃ na tɩ tɩɛrɛ a bɛ ɩ ɛ. Ɛcɛ fʋ tõ n a fʋ nɔ̃wfʋ tome a tɩ zie.

¹⁷ Fʋ̃ʋ so puoru fʋ na zɔ a bibiir ayi bɛ ŋa nɩbaalʋ a, bidɛb-been nɩ pɔwya-been nɛbɛ. Sore e, wul bɛ a fʋ nɔ̃wfʋ ɛ́ gù bɛ. A fʋ̃ʋ zũú a, ɩ bɛ tʋ̃ɔ́ vʋʋrɛ nʋ̃ɔ̀ pʋɔ!»

¹⁸ A Araguwɛl tɩ ƴãw nɩ a ʋ tõ-tõ-biir bɛ ga a yaa-bɔw pàw ɛ́ a zie bãw vɩɛ.

A kul-taa cuw dɩb

¹⁹ A Araguwɛl tɩ yel'ɩ a ʋ pɔw k'ʋʋ sɛ̃ dipɛ̃ yaga. Ʋ tɩ kaa na ír a ʋ dʋn pʋɔ nĩi ayi nɩ pʋ́rɩ anaar ƴãw bɛ cɔbrɩ. À ŋá n'a bɛ tɩ tĩ a cuw cɔbrʋ.

²⁰ A Araguwɛl tɩ bʋɔl'ɩ a Tobɩasɩ wa yel ʋ: «Bibie pie nɩ anaar bɛ wa tɔl a, fʋ bɛ yire a ka ɩ. Fʋ na be n a ɩ̃ zie ka, dɩrɛ ɛ́ nyúur ɛ́ ƴãwnɛ a ɩ̃ pɔwyaa nʋ̃ɔ̀, ʋl na tɩ páw a kpɩɛrʋ á ŋá za a.

²¹ Ɩ̃ na kʋ̀ b'ɩ a ɩ̃ tɛra põ-zɛ̃-taa, ɛ́ fʋ na lɛb'a kul a fʋ sãà zie, ɛ́ bɛ bãw damnʋ kãw za ɩ. A ɩ̃ tɛra põ-zɛ̃-taa ŋa sob na ɩ n a nyɩ dem mãa nɩ a ɩ̃ pɔw wa kpi a. Ɩ̃ bie e, dɩ kanyir, ɩ̃ ɩ n a fʋ sãà ɛ́ a Ɛdɩna ɩ a fʋ mã. Tɩ lãw nɩ fʋ na fʋ̃ʋ nɩ a fʋ pɔw, a ƴɛrɛŋa nɩ kʋralɛ. A na ɩ à ŋá a, ɩ̃ bie e, dɩ kanyir!»