A Ɛsɩtɛɛr sɛbɛ na sɛb'ɩ a gɩrɛkɩ kɔkɔr a 4_1 - A SƐB-SÕW

A Ɛsɩtɛɛr cen nɩ a nãà zie

⁴⁸ Bibie ata pùorí, a Ɛsɩtɛɛr tɩ bɛr'ɩ a puoru. Ʋ tɩ yaa nɩ a kparɩ al ʋ na tɩ su zɛlɛ nɩ a Naaŋmɩn sõwfʋ a bɛr, ɛ́ su a ʋ kparɩ al na vɩɛl zuo a za a.

⁴⁹ Ʋ na tɩ su a dɛpaal-suuru á ŋá a, ʋ tɩ lɛb'a zɛlɩ a Naaŋmɩn sõwfʋ, ʋl na nyɛrɛ bom za, ɛ́ faarɛ a. Al pùorí, a Ɛsɩtɛɛr tɩ tɛr'ɩ a ʋ tõ-tõ-bi-pɔwbɛ ayi kãw cen nɩ.

⁵⁰ Ʋ tɩ dɩɛl'ɩ a kãw ƴãw zaa zoom,

⁵¹ ɛ́ a kãw tɛr a ʋ kparʋ na vure a tuur'ɩ.

⁵² Pʋla tɩ vʋ̃ɔnɛ ʋ nɩ yaga za, ʋʋ tɩ càarɩ pɔ̀l bɛ tɛr tɔ ɩ. A ʋ niwn tɩ ɩ n nɔ̃wfʋ laarʋ ɛ́ dɛ̃bɩ̃ɛ tɛr ʋ a ʋ socir pʋɔ.

⁵³ A Ɛsɩtɛɛr tɩ gãw nɩ a nãà yir dɩ̃dɛɛ za tɩ ta àr a nãà niŋé. A nãà tɩ zɩ̃ n a ʋ naalʋ-dà-kɔw zu, su a ʋ nɩ-yaga pʋɔ dɛpaal-bʋ̃-suuri na ƴãw pɩ̃ɛmɛ a. Ʋ tɩ ɩ n salm-zɩɛ nɩ kʋsɛ-bi-nyɩlɩ tɛwr, ɛ́ tɩ ɩrɛ dɛ̃bɩ̃ɛ yaga.

⁵⁴ Ʋ tɩ dʋɔ nɩ a zu, a niwn nyɩwrɛ mɛ̃ vũu a, ʋʋ jɩ́r'ɩ suur. A nãà-pɔw fãw tɩ baar'a, a ʋ niwn cíli, ʋ kpi fĩw, ɛ́ tɩɛ a ʋ zu a ʋ tõ-tõ-bi-pɔw ʋl na tɩ de ʋ niwn a bawŋman ƴãw.

⁵⁵ Lɛ n'a a Naaŋmɩn tɩ lɩɛbɩ a nãà socir ʋ ɩ ɓaar ɓaar. Dɛ̃bɩ̃ɛ tɩ nyɔw ʋ na, ʋ vaa ìr a ʋ naalʋ-dà-kɔw zu, cen tɩ ɓáw a Ɛsɩtɛɛr ɓaabɩ ɛ́ gù ʋ tɩ lɛb so ʋ mɩŋa. Ʋ tɩ mɔwlɛ ʋ na nɩ ƴɛ̀r-bie na ɓãanɛ suur a.

⁵⁶ Ʋ tɩ sowr'ʋ na: «Ɛsɩtɛɛr i, ɛ́ bʋnʋ? Ɩ̃ be n ka na gù b, ta zɔrɛ dɛ̃bɩ̃ɛ ɩ.

⁵⁷ Fʋ bɛ kpiir ɛ, bʋ̃ʋ n'ʋ vɛ̃, nɩ-zawlɛ ƴãw n'a a nʋɔr ƴãw kɛ́ bɛ ta mɩ́ bʋnɩ taw pɩɛlɩ mɛ̃ ɩ.

⁵⁸ Taw pɩɛlɩ mɛ̃!»

⁵⁹ Lɛ n'a ʋ tɩ zɛw a ʋ salm-zɩɛ dabɔl dɔwlɩ a Ɛsɩtɛɛr bawŋman zu, ɛ́ nyɔw ʋ weri ɛ́ yel ʋ: «Yel ɩ̃ nyɛ̃!»

⁶⁰ A Ɛsɩtɛɛr tɩ sɔw ʋ na: «Nãà a, ɩ̃ nyɛ̃ b'a fʋ ɩ mɛ̃ Naaŋmɩn malkɩ a, ɛ́ a fʋ vɩɛlʋ na nyɩwrɛ a ɩ pʋl-vʋ̃ɔ tɛr mɛ̃.

⁶¹ Fʋ pɔ̀l'ɩ yaga, ɛ́ a fʋ niwn ɩ nɔ̃wfʋ tɛwr.»

⁶² Ʋ na tɩ ƴɛ̀rɛ a, a ʋ fãw tɩ baar'a, ʋ lɛb kpi fĩw.

⁶³ A tɩ dam'ɩ a nãà, ɛ́ a ʋ tõ-tõ-biir za tɩ ɩrɛ k'aa nãà-pɔw tʋ̃ɔ́ lɛb vʋʋrɛ.