أَيُوبَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

غٛونغَاکُ أَيُوبَ ڢٛونْدَامَ

¹ وٛودِنٛ غٛطّٛ حَا لٜسْدِ عُوسْ، عِنْدٜ مَاکٛ أَيُوبَ؞ غٛطّٛ عٛو عٛ تِمُّطٛ، غٛونغَاجٛ، عٛ کُلْطٛ اَللَّه، عٛ دَايِيطٛ حَلّٜىٰندٜ؞

² عٛدَࢩَنَامَ ࢡِࢡّٜ وٛرْࢡٜ نجٛوٜىٰطِطٛ عٜ ࢡِࢡّٜ رٜوْࢡٜ تَتٛ؞

³ عٛمَرِ دَمّٛوجِ عُجِنٜ جٛوٜىٰطِطِ عٜ غٜىٰلٛوطِ عُجِنٜ تَتِ عٜ غَعِ شِنْدَاطِ طِطِ طِطِ ندٜ تٜىٰمٜطّٜ جٛوِ عٜ بَمْطٜ دٜبّٜ تٜىٰمٜطّٜ جٛوِ عٜ جٜيَاࢡٜ طُوطْࢡٜ مَسِنْ ندٜرْ سَارٜ؞ غٛطّٛ عٛو ࢡُرِ يِمْࢡٜ ڢُونَانغٜ ڢُو مَنغُ؞

⁴ ࢡِࢡّٜ مَاکٛ وٛرْࢡٜ طٛنّٛ مبٜىٰرْنِندِرَ حَا شِعٜ مُوطُمْعٜنْ نغَمْ ࢩَامُغٛ، کٛو مٛيْ ندٜ ࢩَلَادٜ مُمْ يَالْتِ؞ ࢡٜطٛنّٛ عٜوْنَ دٜىٰرْطِرَاࢡٜ مَࢡّٜ رٜوْࢡٜ تَتٛ، حَا ࢡٜࢩَامْدَ، ࢡٜنجَرْدَ بٜى مَࢡّٜ؞

⁵ تٛ ࢩَلْطٜ مَنْ تِمِّ، أَيُوبَ طٛنّٛ عٜوْنَ ࢡِࢡّٜ مُوطُمْ نغَمْ سٜنُغٛ ࢡٜ؞ عٛطٛنّٛ دَوَ شُبْ، عٛلِيعَنَ اَللَّه غُلٜتٜىٰطِ نغَمْ کَوْتَلْ کٛو مٛيْ مَࢡّٜ بٜى اَللَّه؞ نغَمْ عٛطٛنّٛ نُمَ‏: «تٜىٰمَ ࢡِࢡّٜ عَمْ مبَطِ حَکّٜ، کُطِ اَللَّه ندٜرْ ࢡٜرْطٜ مُوطُمْعٜنْ؞» بَنَ نِي أَيُوبَ طٛنّٛ وَطَ ڢٛرٛيْ؞

⁶ ࢩَنْدٜ ڢٜىٰرٜ ࢡِࢡّٜ اَللَّه نغَرِ حَا ندَرٛ يٜىٰسٛ جَوْمِرَاوٛ؞ سَيْطَانُ بٛو وَرِ شَکَ مَࢡّٜ؞

⁷ جَوْمِرَاوٛ ࢨَمِمٛ‏: «دِغَ تٛيْ نغَرْطَ؟» سَيْطَانُ جَابِ‏: «مِيِيلٛيِ کٛو تٛيْ حَا دُنِيَارُ؞»

⁸ جَوْمِرَاوٛ ࢨَمِمٛ‏: «عَحَکِّلَنِ جَغِّيطٛ عَمْ أَيُوبَ نَ؟ عِرِنْ مَاکٛ وَلَا حَا دُنِيَارُ، عٛ غٛطّٛ تِمُّطٛ، غٛونغَاجٛ، کُلْطٛ يَمْ، دَايِيطٛ حَلّٜىٰندٜ؞»

⁹ سَيْطَانُ جَابِ‏: «کَدِ أَيُوبَ طٛنْ حُلٜ مٜىٰرٜ نَ؟

¹⁰ نَا عَحٛوِمٛ کٛوَاغٛلْ، کَنغْکٛ عٜ سَارٜ مَاکٛ عٜ کٛ عٛمَرِ ڢُو؟ عَبَرْکِطِنِ کُوغَلْ جُوطٜ مَاکٛ، تٛکّٜ مَاکٛ طُوطِ حَا لٜسْدِ؞

¹¹ عَمَّا تٛ عَڢٛرْتِ جُنغٛ مَ، عَمٜىٰمِ کٛ عٛمَرِ ڢُو، عٛحُطٜتٜ بٜى بَنغُطُمْ‏!»

¹² جَوْمِرَاوٛ وِعِ سَيْطَانُ‏: «ندَا، کٛ عٛمَرِ ڢُو طٛنْ حَا جُنغٛ مَ؞ عَمَّا تَا مٜىٰمُ ࢡَنْدُ مَاکٛ کَمْ؞» ندٜنْ سَيْطَانُ دِلِّ؞

¹³ ࢩَنْدٜ ڢٜىٰرٜ ࢡِࢡّٜ أَيُوبَ وٛرْࢡٜ عٜ رٜوْࢡٜ طٛنّٛ ࢩَامْدَ عٜ نجَرْدَ ندٜرْ سَارٜ مَوْنِرَاوٛ مُوطُمْعٜنْ؞

¹⁴ غٛطّٛ وَدَّنِ أَيُوبَ حَبَرُ، وِعِمٛ‏: «مِنْ طٛنّٛ ندٜمَ بٜى غَعِ؞ بَمْطٜ طٛنّٛ ندُرَ کٛمْبِ مَاجِ،

¹⁵ سَبَعٜنْ عُکَّنِ مِنْ، نجَࢡْتِ دَبَّاجِ ڢُو؞ ࢡٜمبَرِ حُووَنٛوࢡٜ مَ بٜى کَاڢَحِ؞ مِنْ ڢٜىٰرٜ عَمْ دَطِ، مِوَرِ عَنْدِنْغٛ مَ طُمْ؞»

¹⁶ دِغَ عٛتِمِّنَايْ وٛلْوُغٛ، غٛطّٛ ڢٜىٰرٜ وَرِ، وِعِ‏: «يِيتٜ اَللَّه دٛعِّ دِغَ عَسَمَ، وُلِ تٛکّٜ بَالِ مَاطَ عٜ حُووَنٛوࢡٜ مَ ڢُو؞ مِنْ ڢٜىٰرٜ عَمْ دَطِ، مِوَرِ عَنْدِنْغٛ مَ طُمْ؞»

¹⁷ دِغَ عٛتِمِّنَايْ وٛلْوُغٛ، غٛطّٛ ڢٜىٰرٜ وَرِ، وِعِ‏: «کَلْدِيَعٜنْ مبَطِ مٛوࢡٜ تَتِ، عُکَّنِ غٜىٰلٛوطِ، کٛوشِ طِ؞ ࢡٜمبَرِ حُووَنٛوࢡٜ مَ بٜى کَاڢَحِ؞ مِنْ ڢٜىٰرٜ عَمْ طَطِ، مِوَرِ عَنْدِنْغٛ مَ طُمْ؞»

¹⁸ دِغَ عٛطٛنْ وٛلْوَ تَوٛنْ، غٛطّٛ ڢٜىٰرٜ وَرِ، وِعِ‏: «ࢡِࢡّٜ مَ وٛرْࢡٜ عٜ رٜوْࢡٜ طٛنّٛ ࢩَامْدَ عٜ نجَرْدَ ندٜرْ سَارٜ مَوْنِرَاوٛ مَࢡّٜ،

¹⁹ حٜنْدُ سَاتُندُ عِوْندُ لَدّٜ حَمَادَارٜ وَرِ، ڢَطِّ شٛࢡُّلِ سُودُ نَيِ ڢُو؞ ندُ يِبِّ دٛوْ دٜرْکٜعٜنْ، ࢡٜمَايِ؞ مِنْ ڢٜىٰرٜ عَمْ دَطِ، مِوَرِ عَنْدِنْغٛ مَ طُمْ؞»

²⁰ ندٜنْ أَيُوبَ عُمِّ، سٜىٰکِ عَلْکِبَّارٜ مُمْ، لَࢡِ حٛورٜ مُمْ، دٛعِّ حَا لٜسْدِ، سُجِدِ؞

²¹ عٛوِعِ‏: «تٜمْبٛ نغُرْتِيمِ رٜىٰدُ دَادَ عَمْ، تٜمْبٛ بٛو لٛرٛتٛومِ؞ جَوْمِرَاوٛ حٛکِّ، جَوْمِرَاوٛ حٛوشِتِ، بَرْکَ لَاتَنٛ عِنْدٜ جَوْمِرَاوٛ‏!»

²² ندٜرْ تٛرَّاجِ طِعِ ڢُو، أَيُوبَ وَطَايْ حَکّٜ، عٛوٛلْوَايْ کَلُّکَ دٛوْ اَللَّه؞