حَبَکُکْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

¹ طٛ وٛنِ کٛنغٛلْ نغٛلْ جَوْمِرَاوٛ وٛلْوَنِ اَلنَّبِي حَبَکُکْ ندٜرْ وَحَيُ مُمْ؞

وٛوکَاندُ حَبَکُکْ عَرَنْدُ

² يَا جَوْمِرَاوٛ، دُورِ مِطٛنْ تٛرٛ مَ بَلَّلْ، عَمَّا عَجَابَاکِ يَمْ؞ ڢٛرٛيْ مِطٛنْ وٛوکَ‏: ندَا تٛوࢩَارٜ‏! عَمَّا عَحِسْنَايْ مِنْ؞

³ نغَمْ طُمٜ عَيِعْنَتَمِّ حَلّٜىٰندٜ يِمْࢡٜ؟ نغَمْ طُمٜ عَطٛنْ لَارَ تٛرَّاجِ عَمِنْ، عَمَّا عَوَلَّايْ مِنْ‏: جَࢡْتٛلْ عٜ تٛوࢩَارٜ طٛنْ يٜىٰسٛ عَمْ، جٛکِّرْغٛلْ وَطِ، غَابٛتِرَلْ طٛنْ عُمّٛ؞

⁴ نغَمْ مَنْ تَوْرٜىٰتَ طٛوْتَنَاکَ، غٛونغَاکُ بٛو وَنغَايْ سَمْ؞ حَلُّࢡٜ طٛنْ ࢡِلَّ عَدِلِعٜنْ، نغَمْ مَنْ کِيتَ غٛونغَاحَ لَاتِ ڢٜوْرٜ؞

جَاوَابُ جَوْمِرَاوٛ عَرَنُ

⁵ جَوْمِرَاوٛ وِعِ‏: «ندَارٜ شَکَ عُمَّاتٛوجٜ، نغِعٜ؞ کَيْطِنٜ مَسِنْ، نغَمْ مِحُووَنْ کُوغَلْ ندٜرْ بَلْطٜ مٛوطٛنْ؞ تٛ غٛطّٛ يٜشِّ عٛنْ حَبَرُ مَاجُمْ، عٛنْ نُطِّنْتَا؞

⁶ ندَا، مِعُمِّنَنْ کَلْدِيَعٜنْ عُمَّاتٛورٜ ندٜ وَلَا عٜنْطَمْ عٜ مُࢩَلْ سَمْ، ندٜ طٛنْ وَانْشَ دُنِيَارُ يَاسْندُ ندُعُ ڢُو نغَمْ ࢩَامُغٛ جٛوطٛرْطٜ طٜ ندٜ مَرَايْ؞

⁷ ࢡٜ کُلٜتٜىٰࢡٜ عٜ رُغّٛتٛوࢡٜ؞ کَمْࢡٜ ندَرْنَتَ بَاوْطٜ مَࢡّٜ عٜ کٛ حَانْدَنِ ࢡٜ؞

⁸ ݠُشِّ مَࢡّٜ ࢡُرِ ݠَاطَاجِ يَاوُغٛ، طِ ࢡُرِ شَاڢَالِ لَدّٜ بَاوَلْ؞ وَعِّيࢡٜ ݠُشِّ طٛنْ شَمْنَ، طٛنْ نغَرَ دِغَ دَايِيطُمْ، طٛنْ ݠِيرَ بَنَ دُتَلْ جَاوْطٛتٛونغَلْ دٛوْ کٛ نغَلْ يِطِ نَنغُغٛ؞

⁹ يِمْࢡٜ عُمَّاتٛورٜ ندٜعٜ ڢُو طٛنْ نغَرَ نغَمْ تٛوࢩَاغٛ؞ غٜىٰسٜ مَࢡّٜ ڢُو طٛنْ تِيتٛ يٜىٰسٛ؞ ࢡٜطٛنْ مٛوࢡْتَ دَحَاࢡٜ طُوطْࢡٜ بَنَ نجَارٜىٰندِ؞

¹⁰ ࢡٜطٛنْ نجَنْشَ لَامِيࢡٜ، ࢡٜطٛنْ ݠِجِرَ مَوْࢡٜ، ࢡٜطٛنْ نجَلَ کٛو بٜرْنِوٛلْ شٜمْبِطْنغٛلْ نغٛلٜ، ࢡٜمبَاغَنْ لٜسْدِ طَکِّ مَحٛلْ مَاغٛلْ، ندٜنْ ࢡٜࢩَامَنْ نغٛلْ؞

¹¹ ࢡَاوٛ مَنْ ࢡٜتٛکّٛتٛ يٜىٰسٛ بَنَ حٜنْدُ، ࢡٜندِلَّ؞ بَنَ نٛنْ ࢡٜعَيْبِنِ کٛعٜ مَࢡّٜ، سٜمْبٜ مَࢡّٜ لَاتِ طٛوَنْتٜىٰطٛ مَࢡّٜ؞»

وٛوکَاندُ حَبَکُکْ طِطَࢡْرُ

¹² يَا جَوْمِرَاوٛ، نَا عَنْ وٛنِ اَللَّه عَمْ، شٜنِيطٛ عَمْ دِغَ ࢡٛويْمَ؟ عَنْ عَمَايَتَا‏! يَا جَوْمِرَاوٛ، عَجٛعِّنِ يِمْࢡٜ ࢡٜعٜ نغَمْ حِيتَاغٛ مِنْ؞ عَنْ تَݠَارٜ حِسْنٛورٜ عَمِنْ، عَتَبِتِنِ ࢡٜ نغَمْ ࢡٜندَرْتِنَ مِنْ؞

¹³ غِتٜ مَ نغِعَتَا حَلّٜىٰندٜ، نغَمْ طٜ شٜنِيطٜ، عَيِطَا لَارُغٛ تٛوࢩَارٜ؞ عَمَّا نغَمْ طُمٜ عَمُࢩَنْتَ زَمْبٛتٛوࢡٜ؟ نغَمْ طُمٜ عَطٛنْ جٜىٰطٛ تٛ کَلُّطٛ طٛنْ مٛطَ ࢡُرْدُطٛ طُمْ عَدِلَاکُ؟

¹⁴ عَطٛنْ نَنْدِنَ ࢡِࢡّٜ عَادَمَ بٜى لِطِّ ندٜرْ مبٜىٰلَ، بٜى لَدٛوجِ طِ نغَلَا عَرْدِيطٛ؞

¹⁵ کَلْدِيَعٜنْ ࢡٜعٜ طٛنْ نَنغَ يِمْࢡٜ ࢡٜعٜ ڢُو بٜى کُنَيٜلْ، طٛنْ ندَسَ ࢡٜ ندٜرْ زُبَاوٛلْ، طٛنْ مٛوࢡْتَ ࢡٜ ندٜرْ عَرٜوَلْ؞ ندٜنْ ࢡٜطٛنْ شٜيٛ، ࢡٜطٛنْ مبٜلْمبٜلْتَ؞

¹⁶ ࢡٜطٛنْ لِيعَنٛ زُبَاوٛلْ کِرْسٜتٜىٰطِ، ࢡٜطٛنْ نغُلَ عُورْلٜ نغَمْ عَرٜوَلْ، نغَمْ طُمْ کٜࢡْنِ ࢡٜ غٜطَلْ طُوطْنغَلْ عٜ ࢩَامْدُ وٜلْندُ؞

¹⁷ نغَمْ مَنْ ࢡٜنجُݠَّتَ زُبَاجِ مَࢡّٜ، ࢡٜتٛکِّتِنَ مبَرْغٛ عُمَّاتٛوجٜ غٛطّٜ بِلَا عٜنْطَمْ نَ؟