عٜسِرَ 1 - دٜڢْتٜرٜ اَللَّه ڢُلْڢُلْدٜ عَدَمَوَ

تَاسْکَرَ ࢩِࢡْتُغٛ حَيْکَلِيرُ

¹ ندٜرْ ندُوࢡُ کٛورٜسْ، لَامِيطٛ ݠٜرْسِيَ، عَرَنُ، جَوْمِرَاوٛ عَنِّيِ حٜبِّتِنغٛ وٛلْدٜ مُوطُمْ ندٜ عٛوِعْنٛ بٜى حُنْدُکٛ اَلنَّبِي يٜرٜمِيَ، عٛعُمِّنِ ࢡٜرْندٜ کٛورٜسْ حَا عٛنٜلْدِ وٛويْنَاندُ ندٜرْ لَامُ مَاکٛ، بٜى حُنْدُکٛ عٜ بِنْدٛلْ ڢُو، وِعُغٛ‏:

² «ندَا نِي کٛورٜسْ، لَامِيطٛ ݠٜرْسِيَ وِعِ‏: جَوْمِرَاوٛ اَللَّه مٛ عَسَمَ، حٛکِّ يَمْ لَامُوجِ دُنِيَارُ ڢُو؞ کَنغْکٛ عٛعُمْرِ يَمْ مِࢩِࢡَنَ مٛ حَيْکَلِيرُ حَا عُرُسَلِيمَ ندٜرْ لٜسْدِ يَحُودَ؞

³ مٛيْ شَکَ مٛوطٛنْ طٛنْ ندٜرْ عُمَّاتٛورٜ اَللَّه؟ اَللَّه وٛنْدَ بٜى مَاکٛ؞ سٜيْ عٛيَحَ عُرُسَلِيمَ ندٜرْ لٜسْدِ يَحُودَ، عٛࢩِࢡَنَ اَللَّه جَوْمِرَاوٛ مٛ إِسْرَاءِيلَ تٜدِّنْتَ حَيْکَلِيرُ؞ کَنغْکٛ وٛنِ اَللَّه حَا عُرُسَلِيمَ؞

⁴ حَا يَحُودُوجٛ لُتُّطٛ وٛنِ ڢُو، سٜيْ حٜىٰدِّطِّرَاࢡٜ مُمْ مبَلِّتَ مٛ بٜى شَرْدِ عٜ کَنغّٜىٰرِ عٜ جَوْدِ عٜ دَبَّاجِ عٜ شَاحُوجِ غٛطِّ نغَمْ حَيْکَلِيرُ اَللَّه حَا عُرُسَلِيمَ؞»

⁵ بَابَ-شِعٜعٜنْ ندٜرْ لٜعِ يَحُودَ عٜ بٜنْيَمِنْ عٜ لِمَنْعٜنْ عٜ لٜوِعٜنْ، ࢡٜ اَللَّه عُمِّنِ ࢡٜرْطٜ مَࢡّٜ ڢُو، ݠُطِّ يَحُغٛ، ࢩِࢡْتُغٛ حَيْکَلِيرُ جَوْمِرَاوٛ حَا عُرُسَلِيمَ؞

⁶ حٜىٰدِّطِّرَاࢡٜ مَࢡّٜ مبَلِّتِ ࢡٜ بٜى کُوجٜ شَرْدِ عٜ کَنغّٜىٰرِ عٜ جَوْدِ عٜ دَبَّاجِ عٜ کُوجٜ طُوطَ-سَمَنْجٜ عٜ شَاحُوجِ غٛطِّ بٛو؞

⁷ لَامِيطٛ کٛورٜسْ وُرْتِنِ کُووْرُطٜ حَيْکَلِيرُ جَوْمِرَاوٛ طٜ نَبُکٛدٛنٛسٛرْ حٛوشُنٛ حَا عُرُسَلِيمَ، سِغِنٛ ندٜرْ سُودُ طٛوَنْتٜىٰطٛ مُوطُمْ؞

⁸ کٛورٜسْ، لَامِيطٛ ݠٜرْسِيَ عُمْرِ مِتِرِدَتْ، کَلِيڢَاجٛ ندٜسَارِ، عٛوُرْتِنِ طٜ، عٛلِمْتِ طٜ، عٛحٛکِّتِ طٜ سٜسْبَشَّرْ، عَرْدِيطٛ يَحُودَ؞

⁹ ندَا لِمْغَلْ مَاجٜ‏: تَاسَاجٜ کَنغّٜىٰرِ شَݠَّنْطٜ تَتِ (30) عٜ تَاسَاجٜ شَرْدِ عُجِنٜىٰرٜ (1,000) عٜ لَࢡٜ نٛوغَسْ عٜ جٛوٜىٰنَيِ (29)

¹⁰ عٜ بُلْکِ کَنغّٜىٰرِ شَݠَّنْطٜ تَتِ عٜ بُلْکِ شَرْدِ تٜىٰمٜطّٜ نَيِ عٜ سَݠّٛ (410) عٜ کُووْرُطٜ ڢٜىٰرٜ عُجِنٜىٰرٜ (1,000)؞

¹¹ لِمْغَلْ کُووْرُطٜ شَرْدِ عٜ کَنغّٜىٰرِ ڢُو، عُجِنٜ جٛوِ عٜ تٜىٰمٜطّٜ نَيِ (5,400)؞ کُووْرُطٜ طٜعٜ ڢُو، سٜسْبَشَّرْ حٛورِ طٜ حَوْتَادٜ بٜى دَحَاࢡٜنٛ دِغَ بَابِلَ حَا عُرُسَلِيمَ؞