Maŋguzad jene hay kad Zaŋ 8 - Ma Majawa Waya

Wut ta təmak a hukw tampaŋw matasəla ana

¹ Masa Wut ta təmak ana a hukw tampaŋw matasəla ana sə, jene hay fakwanay da baymaləvaŋ ac manjaha teete, mbala e ŋgə menet kwakwar mahkar.

² Ya ta wala sə, ec ke vec dərem hay tasəla kad maskəla hay tasəla mazlaca fəma ta Zlavay.

³ Maskəla mekele ɓa, ke dekey, ka njah da cak ta slam te meŋgeŋgez təbekw. Aŋga ava tekwtegwerekw ta gənaɓ dapa ha, ac ka vana mal hay te meŋgeŋgəzey mabay, ka ta van fa slam ana ava macə mbahw ta ndah ta Zlavay fa slam te meŋgeŋgez təbekw masa malama ava gənaɓ fəma ta gwadadakw.

⁴ Dapa ha ta maskəla ana, cacak ta mal te meŋgeŋgəzey sə, e ŋgeŋgez fəma ta Zlavay, fa slam ana ava macə mbahw ta ndah ta Zlavay.

⁵ Maskəla sə, ka kəs tekwtegwerekw, ka nəha ava zay ta kwakwaw, ka kazlaɗ kad pa vavara. Masa ka kazla cay sə, yam ke rəvey, maɓəsl ma ke cəney, kwakwaw ke wecəkeɗey! Vavara ka ɓəla vaw.

Dərem hay macaaca ana makwa

⁶ Ara nesey, maskəla hay tasəla masa ac eve dərem hay tasəla sə, aca ləmad vaw ka ta fətiya.

⁷ Maskəla macaaca ana ka fət dərem tata. Rac ta yam macama ava kwakwaw, eve bembez ece kwiyek kad fa vara. Gəva ta vavara amta dapa mahkar, gəva te wudez hay amta dapa mahkar va gəva te kəzeŋ hay dendeɓek amta dapa mahkar sə, kwakwaw ke ndelec avəda fakwanay.

⁸ Maskəla meecew ana, ka fət dərem tata may. Jene ɓa ara gwadakwam mazlakava ana, kwakwaw e geɗ vat vat da yaŋ ana, e kezl dəzlew kad pa yam mafayakfayak ana. Gəva ta yam mafayakfayak ana amta dapa mahkar ka tərata ke bembez.

⁹ Gəva amta dapa mahkar te jene hay malama masa ac eve ndey dapa yam mafayakfayak ana ec ke məceceŋ, gəva amta ta kaslkaslah hay dapa mahkar ec ke neseceŋ.

¹⁰ Maskəla mamahkar ana ka fət dərem tata. Bat mazlakava ana e geɗ ara kwakwaw. Ke kezlek da baymaləvaŋ kad pa gəva amta dapa mahkar ta wayam hay va ndey ta yam hay.

¹¹ Mezel ta bat ana sə, dendərek. Gəva ta yam ana amta dapa mahkar sə, ka tərata dendərek, ndana hay gaa ac ke məceceŋ mafay te dendərek ta yam ana.

¹² Maskəla mafaɗ ana ka fət dərem tata, gəva ta pas, ta kiya va te menjewzle hay amta amta sə, ec ke tərec ka ləvaŋ. Pas ka zana meweɗ tata amta dapa mahkar avəda, vaɗ may ara aŋga ana.

¹³ Ara nesey, ya ta wala sə, ya cəna maviza e tev dəreŋ da baymaləvaŋ, e gweɗ ava gədaŋ, gege: «Wabaw! Wabaw! Wabaw! Kad ndah dapa vavara mafay ta uway te dərem hay ta maskəla hay magəra mahkar nesey.»