Maŋguzad jene hay kad Zaŋ 5 - Ma Majawa Waya

Bibel mapaɗa va Wut ta təmak

¹ Ye njerey, ya ta wala dapa ha ta zam ta Nda manjaha fa gwadadakw, livəra mavinda jaka hwaɗiya ana va dəɓiya ana, mandərha ava tampaŋw slam tasəla.

² Ye njerey, ya ta wala sə, maskəla masa aŋga ava gədaŋ mabay, e gweɗ ava gədaŋ, gege: «Ma da zlafa mawuna livəra va mahuka tampaŋw mandərha fətiya na wa?»

³ Amaa, kwa ndana da baymaləvaŋ, dapa vavara va da dara vavara masa aŋga ava gədaŋ ta mawun livəra ana, kwa ta map ndey kad fətiya sə, aabay.

⁴ Ya ka kuɗa mabay, mafay ta masa kwa nda amta aŋga mak ta mawuna livəra ana va e de pə ndey kad pa sə, aabay.

⁵ Amaa nda amta deveŋ mesnendə hay sə, ke gweɗiyey, gege: «Ka kuɗa bay. Wala mabar ŋgesey, aŋga dapa tərsam ta Zuda, tərsam ta Bay Deevet. Aŋga sə, ka sasarafa gədaŋ hay fakwanay, a zlafa mawuna livəra va mahuka tampaŋw mandərha tasəla na hay avəda.»

⁶ Ara nesey, ya ta wala sə, dapa walaŋ ta gwadadakw, dapa taɓa ta gənaw hay faɗ va dapa taɓa te mesnendə hay, wut ta təmak mazlaca ɓa, aŋga ara ac ka zlan uway. Aŋga eve dərem hay tasəla va ndey hay tasəla masa ec mesfen hay ta Zlavay mazləra kad pa vavara fakwanay.

⁷ E dey ka ta kəs livəra dapa ha ta zam ta nda manjaha fa gwadadakw.

⁸ Dapa masa ka kəsa livəra ana cay sə, gənaw hay faɗ va mesnendə hay kwakwar ecew dapa yaŋ ana faɗ sə, ece kekəred fəma ta wut ta təmak ana. Kwa waawa teceŋ aŋga ava ganjaval dapa ha, ava kwap hay ta gənaɓ manəha ava mal hay masa mezekey ana mambəla ana. Mal ana hay ŋgesey, ac macə mbahw ta ndah ta Zlavay.

⁹ Aca slə law waya, gege: «Kaa sə, ka mak ta makəs livəra va mahuka tampaŋw hay mandərha fətiya na avəda, afa ac ka zlakaɗ uway avəda, amaa ke ke husemekec ndah dapa tərsam hay fakwanay, ndah magwaɗa ma ta wunam hay fakwanay, ndana hay fakwanay va ndah masa aca sən Zlav bay fakwanay kad Zlavay eve bembez takaa.

¹⁰ Ke ke peɗec kad Zlav tandakwa sə, Wunam ta bay va ndaakwas hay, aca ra ŋgə bay dapa vavara.»

¹¹ Ya pə ndey, ya ta cəna uway ta maskəla hay bakatar gaa, ac ka tulaka gwadadakw, gənaw hay va mesnendə hay. Meŋgef teceŋ ana ece ŋgə bakatar hay gaa.

¹² Ac ka slə law ava gədaŋ, gege: «Wut ta təmak masa ac ka kəɗa avəda sə, aŋga mak ta maŋgat gədaŋ mazlakava, zleley, leŋgesl va gədaŋ. Asaya, aŋga mak kad ndana hay fakwanay aca ra hahəlan yaŋ, aca ra wesl da yaŋ meweɗ tata, aca ra hahəmiya.»

¹³ Jene hay malama fakwanay da baymaləvaŋ, dapa vavara, da dara vavara va dapa yam mafayakfayak ana, jene hay fakwan dapa masa ac eve mesfeney, ya cəna ece gweɗ, gege: Kad Nda masa aŋga manjaha fa gwadadakw va kad Wut ta təmak sə, mehehəmey, mahahal yaŋ, membeɗey va matimaazlaɓ de ŋgey katar ka midakw!

¹⁴ Gənaw hay faɗ masa ac eve ndey sə, ec ke gweɗ, gege: «E de ŋgey!» Mesnendə hay may, ece kekəred fəma teceŋ, ece bəzeneceŋ.