Maŋguzad jene hay kad Zaŋ 4 - Ma Majawa Waya

Mahahəm Bay Zlavay da baymaləvaŋ

¹ Ava dəɓa ana, ya ka wala, ma ta way mawuna da baymaləvaŋ. Uway macaaca ana masa ya cəna sə, e gweɗiyey ara dərem te mefətey, gege: «Tepek kad fana a wudam, afa ya da ŋguzdakaɗ jə masa e te ŋgə kad fəma.»

² Faŋga faŋga ana, Mesfen Mavəna ke təheziyey. Ya ta wala sə, gwadadakw da baymaləvaŋ, da yaŋ gwadadakw ana sə, ndana manjaha fətiya.

³ Nda ana, e zlezlə mabay ara kekeŋ mezel yaspa va sarduwan. Gwadadakw tata matulaka ava kwalay, e weɗ ara kekeŋ mezel «emirat»

⁴ Da cak ta gwadadakw ana, gwadadakw hay mekele kwakwar ecew dapa yaŋ ana faɗ ɓa, mesnendə hay kwakwar ecew dapa yaŋ ana faɗ masa ac ava rəkwat məsle ana fa vaw va rəkwat ta gənaɓ matəkaɗa fə yaŋ manjaha fətiya.

⁵ Mewecəkeɗ ta yam, baazlam makwaw ana va merəv ta yam ece təhek dapa gwadadakw ana. Fəma ta gwadadakw ana ŋgesey, petərla hay tasəla magəɗa. Petərla ana hay tasəla ŋgesey sə, ac Mesfen hay ta Zlavay tasəla.

⁶ Fəma ta gwadadakw ana ŋgesey, jene ara yam mafayakfayak ana ɓa e zlezlə ara mahwarhwar. Dapa taɓa ta gwadadakw va da macakiya ana hay sə, gənaw hay faɗ ɓa, ndey fa vaw tec wurcacakcak, jaka fəma va jaka ava dəɓa.

⁷ Gənaw macaaca ana, aŋga ara mabar, gənaw meecew ana sə, aŋga ara wut ta zla. Gənaw mamahkar ana sə, aŋga eve ndey ara ta ndana. Gənaw mafaɗ ana sə, aŋga ara maviza e təvey.

⁸ Gənaw ana hay faɗ ana ŋgesey sə, kwa waawa teceŋ aŋga ava pərkwasla hay makwa makwa, ndey hay wurcacakcak fa vaw teceŋ, jaka wudam va jaka bəlam. Aca slə laway hwavavaɗ, hwapapas, ece yəv aabay, ece gweɗ, gege: Mavəna, mavəna, mavəna, Bay Mazlakava, Zlav masa aŋga ava gədaŋ da yaŋ jene hay fakwanay. Kaa sə, ka ɓa dəga vavara malama bay heley, kasl pəsna ka ɓa, ke te dekey.

⁹ Ara nesey, gənaw ana hay aca mbaɗ Zlav masa aŋga manjaha fa gwadadakw tata ava laway, aca bəzaniya va maŋgana wasay. Afa aŋga nda masa aŋga eve ndey katar ka midakw.

¹⁰ Dapa masa aca sliya sə, mesnendə hay kwakwar ecew dapa yaŋ ana faɗ sə, ece kekəred fəma ta Nda masa aŋga manjaha fa gwadadakw tata. Aca hahəm Nda masa aŋga ɓa eve ndey katar ka midakw. Ac ka kazlaɗ maslalba tec hay kad fəma ta gwadadakw, eve megweɗ, gege:

¹¹ «Ka mak Bay Mazlakava, Zlav taciya, ta maŋgat membeɗey, mahahəl yaŋ va gədaŋ mazlakava, afa kaa sə, ka nda malama jene hay fakwanay. Ka ka walaw jeŋ ana hay aca ra ŋgey, ara nesey jeŋ ana ac ka ŋgata.»