Maŋguzad jene hay kad Zaŋ 3 - Ma Majawa Waya

Leeter kad Macam yaŋ ta ndah ta Zlavay dapa berne ta Sardis

¹ Vindan kad maskəla ta Macam yaŋ ta ndah ta Zlavay da Sardis. Nesey, ma masa e dek dapa ma ta nda masa aŋga ava Mesfen hay ta Zlavay tasəla va menjewzle hay tasəla dapa ha tata: «Ya sən mezlər takaa hay. Ndana hay ece gweɗey, gege: “Ka eve ndey”, amaa anjəkar ka maməca ana.

² Zleftek, sasala jene hay masa ac magəra, wagaa aca ra məc fakwanay, afa ya ka wala mezlər takaa mendəva fa yam te ndey ta Zlav aabay.

³ Sənafa mesesərek masa ka ta ŋgatiya va masa ka ta cəna. Nahda yaŋ kad pa, ŋgwada rav takaa. Daha ka njah eve ndey aabay, ya ta ŋgatafakaa hwaf! A ra makar, ka ta sən pas ana masa ya ta ŋgatafakaa bay.

⁴ Amaa ava aŋga ana fakwanay, ndah dərziya dapa taɓa takwar da Sardis, ac ka dakala rəkwat tec hay aabay. Ec te cəpiyey ava rəkwat məsle ana fa vaw, ac mak ta maŋgway eve yey.

⁵ Ara nesey, bigula hay sə, ye te pec rəkwat məsle ana fa vaw. Ya ta vavəsan mezel tata dapa livəra te mesfen aabay. Ya ta tə yaw fəma ta Papa va ta maskəla tata hay, “Nda nesey sə, aŋga nda aɗaw”.

⁶ Nda masa aŋga ava zləmay sə, da cəna ma masa Mesfen Mavəna te gweɗ kad Macam yaŋ hay ta ndah ta Zlavay!»

Leeter kad Macam yaŋ ta ndah ta Zlavay dapa berne ta Filadelfiya

⁷ Vindan kad maskəla ta Macam yaŋ ta ndah ta Zlavay da Filadelfiya, gege. «Nesey, ma masa e dek dapa ma ta Nda masa aŋga mavəna wal, Nda metehwe ana, nda matəhaza kəle ta bay Deevet. Daha ka ta wuna sə, ndana mazlafa maɓəzliya aabay, ka ta ɓəzla sə, ndana mazlafa mawuniya aabay.

⁸ Ya sən mezlər takaa hay. Wala: “Ya ka paɗ ma ta way mawuna fəma takaa, ndana ma ta zlafa maɓəzliya aabay”. Ya səniya, kwa gədaŋ takaa gaa aabay, amaa ka ka nahda yaŋ kad pa ma aɗaw, ke ke cefiyey ma aabay.

⁹ Wala, ya ta vəkaɗ ndah masa ac ndah ta Saadan, ndah maŋgəla ma hay mapana yaŋ tec ke Zuwef hay, anjəkar ac Zuwef hay bay, afa aca ŋgal ma. Ye te tetəkec ka ta daɗay, ece re kekəred fəma takaa ka ta hahəlakaɗ yaŋ. Ara nesey ac ta səniya, anjəkar ya walakaa.

¹⁰ Mafay ta masa ka ka nahda yaŋ kad pa ma taaɗaw eve mepəsek sə, yey may, ya ta pafakaa ndey mambəla ana dapa pas te mecekey, masa e te dek kad yaŋ ndana hay fakwanay va mepeɗec ndah ta vavara pe mecekey.

¹¹ Ya hukw ta mavahaɗ cay. Təhaza jə masa ka ava aŋga sə, mambəla ana, afa kwa ndana da kəsakaɗ maslalba ta bigula takaa bay.

¹² Nda bigula sə, ya ta paɗ ka darakw dapa Way ta kwakwas aɗaw, e te də kad a vəda ɓasabay. Ya ta vindaɗ mezel ta Zlavay aɗaw fa nda ana, mezel te berne ta Zlavay aɗaw, te Zeruzelem waya masa e te bəreŋgek da baymaləvaŋ da cak ta Zlavay, va mezel taaɗaw waya.

¹³ Nda masa aŋga ava zləmay sə, da cəna ma masa Mesfen Mavəna te gweɗ kad Macam yaŋ hay ta ndah ta Zlavay.»

Leeter kad Macam yaŋ ta ndah ta Zlavay dapa berne ta Lawdikiya

¹⁴ Vindan kad maskəla ta Macam yaŋ ta ndah ta Zlavay da Lawdikiya. «Nesey, ma masa e dek dapa ma ta nda masa mezel “E de ŋgey”, nda matana yaw eve cəvey ana va nda metehwe ana. Zlav e lemek jene hay fakwanay sə, jaka vara vaw:

¹⁵ “Ya sən mezlər takaa hay, ya səniya, ka laŋlaŋ bay, ka tahwtahw bay. Efes daha ka laŋlaŋ, daha aabay ka tahwtahw sə, afəcaka.

¹⁶ Amaa afa ka laɓakwlaɓakw, bəna ka laŋlaŋ bay, ka tahwtahw bay”. Ara nesey, ya ta vənahdakaa dapa ma aɗaw.

¹⁷ Mafay ta masa ke gweɗey: “Yey sə, ya nda eve zleley, ye ke ɓəcek jene hay gaa kad yey, ya hwar jene mekele ɓasabay”. Anjəkar, ka sən masa ka dapa matakwa, ke ŋgə metekwen kad ndana, ka maslamarga ana, ka mahazlaw va masa ke meetersey sə, bay.

¹⁸ Mafay ana, ya cakaa mamənak: Husamaɓa gənaɓ mahəna mambəla ana vereyey ke de tər ka nda eve zleley metehwe ana va rəkwat məsle ana ka da paɓa fa vaw, afa ndana hay ac ta walakaa, ke meetersey, hwar da kəɗakaa bay. Asaya, husamaɓa menjəv te ndey kad pe ndey takaa, afa ka da ŋgat mawala ndey saya.

¹⁹ Yey sə, ndah masa ye weleceŋ sə, ye peyefeceŋ va mekəteceŋ. Mafay ana, e ŋgə gədaŋ, ŋgwada rav takaa.

²⁰ Wala, ya mazlaca fəma ta way, ye zeley. Daha ndana ka cəna uway aɗaw, ka wuna ma ta way, ye te sehw a way tata, anda ndə ɗaf ava aŋga, andaw ava aŋga fa slam ana.

²¹ Nda bigula sə, ya ta vana cəvey ta manjah vara yey fa gwadadakw aɗaw. Ara masa ya ka ŋgə bigula da yaŋ maməcay, təlam nesey, andaw manjaha ava Papa fa gwadadakw tata.

²² Nda masa aŋga ava zləmay sə, da cəna ma masa Mesfen Mavəna te gweɗ kad Macam yaŋ hay ta ndah ta Zlavay.»