Maŋguzad jene hay kad Zaŋ 22 - Ma Majawa Waya

¹ Ka ŋguzdawa wayam ta yam mavana mesfeney, e zlezlə ara kwalaba. Yam ana e pelek da dara gwadadakw ta Zlavay va ta Wut ta təmak.

² Dapa taɓa ta zaŋ te berne ana va dapa taɓa ta wayam ana, wudez ta mavə manjah katar ka midakw ɓa masa a hayə wudiya ana hay dəɓa kuraw dapa yaŋ ana ecew da hwaɗ ta mavay. Ara megweɗey, fa kiya fa kiya fakwanay sə, e heyey. Gamslak ana, aŋga menjəv ta mambəl ndana hay.

³ Megwederey e te ŋgə dapa berne ana aabay. Gwadadakw ta Zlavay va ta Wut ta təmak sə, aŋga dapa berne ana. Ndah maŋga mezlər tata ac ta kəɗana ha.

⁴ Ac ta wala ndey tata va mezel tata mavinda fa dəŋgaɗ teceŋ.

⁵ Vaɗ e te ŋgə dapa berne ana aabay. Ndana hay ac ta hwar meweɗ ta kwakwaw, kwa meweɗ ta pas sə, aabay, afa Bay Zlavay a ta wuna meweɗ tata kad yaŋ eceŋ, ac de ŋgə bay katar ka midakw.

Mamaɗ yaŋ ta ma hay

⁶ Ke gweɗiyey, gege: «Ma ana hay nesey sə, ma hay metehwe ana, maŋgal ma dapa aabay. Bay Mazlakava, Zlav nda mewunecen leŋgesl ta ndah mehwedek ma ke zlərek maskəla tata ke te ŋguzdecen kad ndah maŋga mezlər tata hay, jene hay masa ac hukw te medek cay.»

⁷ Yesu, gege: «Mawala, ya hukw cay. Mapəsma ɓa kad nda manaha yaŋ kad pə ma hay masa ece dek da vara Zlavay dapa livəra ana nesey!»

⁸ Yey Zaŋ, ya ka cəna, ya ka wala. Ava dəɓa ta macəna va mawala, ye ke kekəredey ka ta hahəmiya, a dara sek ta maskəla maŋguzdawa jeŋ ana.

⁹ Amaa, ke gweɗiyey, gege: «Pə leŋgesl ta maŋgiya! Yey sə, ya nda maŋga mezlərey ara kaa, kad kaa va kad malamakw hay va dəmakw hay, ndah mehwedek ma, va kad ndah manaha yaŋ kad pə ma hay mavinda dapa livəra ana nesey. Ke te kekəred sə, kad Zlav pal amta!»

¹⁰ Ke gweɗiyey saya, gege: «Ka ta raɓda ma hay masa ece dek da vara Zlavay dapa livəra ana na bay, afa pas ana aŋga hukw cay.

¹¹ Nda suwe, e te dey fəma fəma ava suwe tata, nda maləza, e te dey fəma fəma ava manjah dapa jə maləza. Amaa nda maŋga mezlər mambəla ana sə, e te dey fəma fəma dapa mambəla ana tata. Nda mavəna e te dey fəma fəma dapa manjah tata mavəna ana ŋgesey.»

¹² Yesu, gege: «Mawala, ya hukw cay. Ya ta daɗ ava jə ta mapal meyəv ta kwa waawa, təɗe fe mezlər masa nda ana ta ŋgiya.»

¹³ Yey sə, ya Alfa va Awmiga, nda macaaca ana va metekweɗ ana, nda mama va mamaɗ yaŋ.

¹⁴ Mapəsma ɓa kad ndah mapana rəkwat tec hay, afa ac ra ŋgat cəv ta mandə wut te wudez mavana manjah katar ka midakw va maŋgat mesehw pe berne ta Zlavay jaka pa ma ta way hay.

¹⁵ Amaa ndah mazləɓa hay va matiməzla hay, ndah makəsa vaw saw fa zaŋ ana, ndah makəɗa nda cukw cukw, ndah mata mbat hay, ndah masa aca wal maŋgal ma, daha aabay ndah maŋga mezlər ava maŋgal ma sə, ac ta njah da dəɓa te berne ana.

¹⁶ «Yey, Yesu, ya ka zləraɗ maskəla taaɗaw ka ta hwadakwaɗ matə yaw ana nesey da yaŋ Macam yaŋ ta ndah ta Zlavay. Yey sə, ya nda dapa tərsam va da hwaɗ ta way ta bay Deevet. Yey sə, ya bat mawaɗa slam ta slamɓal.»

¹⁷ Mesfeney va madəmay sə, ece gweɗ, gege: «Dekey!» A lada nda masa ka cəna sə, de gweɗey: «Dekey!» A lada nda masa yam a kəɗa sə, de dekey. A lada nda masa a waya sə, da ŋgat yam mavana mesfen katar ka midakw taambəla.

¹⁸ Ya tə yaw da yaŋ kwa waawa macəna ma hay masa ece dek da vara Zlavay dapa livəra ana nesey: Daha ndana ka pana a yaŋ ana, Zlav a ta pana makaslafay hay masa mavinda dapa livəra ana nesey a yaŋ aŋga.

¹⁹ Yaw, daha ndana ka kəsafa jene kusetke deveŋ ma hay mavinda dapa livəra ana nesey, Zlav a ta kəsafa meven ta ma tata dapa wudez mavana mesfen katar ka midakw va dapa berne ta Zlavay, masa ac mavinda dapa livəra ana nesey.

²⁰ Nda matana yaw da yaŋ ana, ke gweɗ, gege: «Aŋga, ya hukw ta madaɗ cay!» E de ŋgey! Dekey Bay Mazlakava Yesu!

²¹ Da lada sə, mambəla ana ta Bay Mazlakava Yesu da njah ava akwar fakwanay.