Maŋguzad jene hay kad Zaŋ 2 - Ma Majawa Waya

Leeter kad Macam yaŋ ta ndah ta Zlavay de Efez

¹ Vindan kad maskəla ta Macam yaŋ ta ndah ta Zlavay de Efez. Gwaɗa, gege: «Nda masa aŋga ava menjewzle hay tasəla dapa ha ta zam tata, masa a ŋgway dapa taɓa te petərla hay ta gənaɓ tasəla sə, gege:

² “Yaw, ya sən mezlər takaa hay, meŋgə vaw takaa dapa mezlərey va mepə sek takaa dapa marga hay, va masa ke pec sek kad ndah suwe hay sə, aabay. Ke ke cekec ndah mapana yaŋ teceŋ ka maslaŋ hay, anjəkar ac maslaŋ hay bay, ke ke sənec avəda, anjəkar ac ndah maŋgəla ma hay.

³ Ke eve mepəsek ɓa, ka ka ɓəs marga hay mafay te mezeley aɗaw, ka ka məca vaw takaa aabay.

⁴ Amaa, jene pal amta ɓa masa e wefiyey bay varakaa, afa ka ka gərda meweliyey ara macaaca ana.

⁵ Sənafa slam masa ke təɗek dapa, ŋgwada rav takaa, ŋgə mezlər takaa hay masa ka ta ŋgiya mezleezle ana sə, saya. Daha aabay sə, ya ta daɗ kad vara kaa, daha ka ka ŋgwada rav takaa aabay sə, ya ta pərata petərla takaa avəda dapa slam tata.

⁶ Amaa dapa slam mekele sə, ya hahəmakaa, afa mesesərek ta ndah ta Nikwalay a ndarakaa ara masa mesesərek teceŋ ana te nderiyey may.

⁷ Nda masa aŋga ava zləmay sə, da cəna ma masa Mesfen Mavəna e gweɗ kad Macam yaŋ hay ta ndah ta Zlavay. Nda bigula sə, ya ta vana cəv ta mandə wut te wudez te mesfeney dapa zerdeŋ ta Zlavay.”»

Leeter kad Macam yaŋ ta ndah ta Zlavay da Səmirna

⁸ Vindan kad maskəla ta Macam yaŋ ta ndah ta Zlavay da Səmirna. Gwaɗa, gege: «Nda macaaca ana va metekweɗ ana, aŋga nda masa ka məcata, amaa ka pərakakata dapa maməcay, aŋga eve ndey, gege:

⁹ “Ya sən masa ka dapa marga va masa ka dapa maslamarga, amaa eve metehwe ana anjəkar ke eve zleley. Ya ka cəna melef hay masa ac ta lafakaa, ndah malafakaa ana ŋgesey, aca pə yaŋ teceŋ ke Zuwef hay, amaa ac Zuwef hay metehwe ana bay, ac ndah ta Saadan!

¹⁰ Ka ta ŋgə zidaw dapa marga masa ka ta siya bay, Wala, bay ta haalay, e te kezleɗec ndah dərziya deveŋ akwar kad pa daŋgay, afa a da cakakwar, akwar ta sə marga manah kuraw. Jaha vaw mambəla ana kasl pa pas ta maməc takaa, ara nesey, ya ta vakaa maslalba te mesfeney.

¹¹ Nda masa aŋga ava zləmay sə, da cəna ma masa Mesfen Mavəna te gweɗ kad Macam yaŋ hay ta ndah ta Zlavay. Bigula sə, kwa a ta sə marga ta maməc meecew ana aabay.”»

Leeter kad Macam yaŋ ta ndah ta Zlavay da Pergam

¹² Vindan kad maskəla ta Macam yaŋ ta ndah ta Zlavay da Pergam. Gwaɗa, gege: «Nda masa aŋga ava kafaya meceɓ ceɓ ana masa ma ana gəva cuweeney matala, gege:

¹³ “Ya səniya slam masa ka dapa ŋgesey sə, Saadan e ŋgə bay dapa. Amaa ka ka təhaza mezeley aɗaw mambəla ana, ka ka gərda makəsparav aabay, kwa dapa pas masa aca kəɗ Aŋtipas, nda matana yaw da yaŋ yey eve cəvey ana da varakwar dapa slam masa Saadan a njah dapa.

¹⁴ Amaa jene kusetke ɓa masa e wefiyey bay da varakaa. Ndah dərziya dapa taɓa takwar aca cəp mesesərek ta Balam masa a vana mamənak kad Balak da ŋgay dəɓel ta mazad Isreyel hay ka ta ndə slaw ta kwakwas ta mbat hay va makəs vaw fa zaŋ ana.

¹⁵ Ara aŋga ana, ndah mekele ɓa deveŋ akwar aca cəp mesesərek ta ndah ta Nikwalay.

¹⁶ Ara nesey, ŋgwada rav takaa. Daha aabay sə, ya ta ŋgatafakaa, ka ta ŋgə vəram ava ndah ana ŋgesey ava kafaya masa e te dek dapa ma aɗaw.

¹⁷ Nda masa aŋga ava zləmay sə, da cəna ma masa Mesfen Mavəna te gweɗ kad Macam yaŋ hay ta ndah ta Zlavay. Kad ndah bigula sə, ye te vec ɗaf mezel man masa aŋga maraɓa, ye te vec kekeŋ mesle ana masa mezel waya ana mavinda fətiya. Mezeley ana ŋgesey, kwa ndana masəniya aabay, say nda makəsiya.”»

Leeter kad Macam yaŋ ta ndah ta Zlavay da Tiyatira

¹⁸ Vindan kad maskəla ta Macam yaŋ ta ndah ta Zlavay da Tiyatira. Gwaɗa, gege: «Wut ta Zlavay, nda masa wut te ndey tata e geɗ vat vat ara neneŋ ta kwakwaw va sek tata hay ac ara ɓəray maɗaw ɗaw ana mahəna mambəla ana, gege:

¹⁹ “Ya sən mezlər takaa hay, mawal nda takaa, makəsparav takaa, majəna nda takaa va meŋgə gədaŋ takaa dapa marga hay. Mezlər takaa hay mamaɗ yaŋ ana nesey sə, aca fəna macaaca ana hay.

²⁰ Amaa jene kusetke ɓa masa e wefiyey bay da varakaa masa ka ka vana cəv kad Zezabel, ŋgwaz mapana yaŋ tata ka ŋgwaz mehwedek ma, masa e sesərekeceŋ va mefəcec ndah maŋga mezlərey aɗaw hay ka ta kəs vaw fa zaŋ ana va mandə slaw ta kwakwas ta mbat hay.

²¹ Ya ka vana manahay, a da ŋgwada rav tata, amaa a wal maŋgwada rav tata dapa makəs vaw fa zaŋ ana bay.

²² Mafay ana, ya ta kazlaɗ fe kəzeŋ ta marga, ac ava ndah makəsa vaw fa zaŋ ana ava aŋga, say pas masa ac ta ŋgwada rav teceŋ dapa mezlər tec hay.

²³ Ye te bezlec wudiya hay avəda. Ara nesey, Macam yaŋ hay ta ndah ta Zlavay fakwanay ac ta səna avəda masa yey sə, ya nda mawuzaɗa mawulak yaŋ va rav ta ndana hay. Ya ta pəl meyəv te mezlər ta kwa waawa sə, təɗe fe mezlər tata hay.

²⁴ Amaa akwar makəsparav hay dərziya da Tiyatira sə, akwar ka kəs mesesərek ta ndah ana ŋga aabay. Asaya, akwar ka wal masəna jə masa aca zaliya jə mazləla maraɓa ta Saadan sə, aabay may. Ya ta tatəkakwar ta mazaɓ jene mekele sə, ɓasabay.

²⁵ Amaa matəhaza jə masa akwar ava aŋga ŋgesey sə, mambəla ana kasl pa pas masa ye te vehekey.

²⁶ Kad bigula, nda maŋgana mezlərey aɗaw kasl pe memeɗey ana sə, ya ta vana gədaŋ ta bay da yaŋ vavara hay,

²⁷ e te pedecen ma ke te ɓəceceŋ ava daŋgwar ta ɓəray, ara mahazl wuseɗef hay ta rəɓasl,

²⁸ ara masa yey may, ya ka ŋgat gədaŋ ta bay da vara Papa, ya ta vana bat ta slamɓal.

²⁹ Nda masa aŋga ava zləmay sə, da cəna ma masa Mesfen Mavəna te gweɗ kad Macam yaŋ hay ta ndah ta Zlavay.”»