Maŋguzad jene hay kad Zaŋ 19 - Ma Majawa Waya

Law ta ɓarakwa va macunam ta madəm ta wut ta təmak

¹ Ava dəɓa ana, ya ka cəna uway hay ɓa ece gweɗek ava gədaŋ da baymaləvaŋ, ara maɓəsla ma ta miya gaa, gege: «Heleluya! Membəley, membeɗey va gədaŋ mazlakava sə, ece dek da vara Zlav tandakwa,

² afa matəɗ ma tata hay sə, ac manəha eve metehwe ana va ara aŋga ana. Ka təɗana ma yaŋ ŋgwaz mazlakava makəsa vaw fa zaŋ ana magədasa vavara ava makəs vaw tata fa zaŋ ana, Zlav ka təɗana ma yaŋ eve bembez ta ndah maŋga mezlər tata hay masa aŋga te kəɗeceŋ.»

³ Uway ana hay masa ye cənek ŋgesey sə, ece gweɗ saya, gege: «Heleluya! Cacak te berne ana e ŋgeŋgez kad a wudam katar ka midakw.»

⁴ Dapa ŋgesey ana, mesnendə hay kwakwar ecew dapa yaŋ ana faɗ va gənaw hay faɗ sə, ec ke kekəredey, ac ka hahəm Zlav masa aŋga manjaha fa gwadadakw tata, ece gweɗ, gege: «E de ŋgey. Heleluya!»

⁵ Ava dəɓa ana, uway mekele ke gweɗek dapa gwadadakw, gege: «Mambaɗ Zlav tandakwa, akwar ndah maŋga mezlər tata hay fakwanay, akwar ndah manahda yaŋ kad aŋga, wude hey va mazlakava hay.»

⁶ Ya ka cəna uway ɓa ara maɓəsl ma ta miya gaa, ara maɓasl ma ta yam mazlakava masa e vevə dapa maajav, ara merəv ta yam meŋgbey ŋgbey ana. Ke gweɗ, gege: «Heleluya! Bay Mazlakava sə, aŋga Zlav tandakwa masa aŋga ava gədaŋ da yaŋ jene hay fakwanay, ke ŋguzdek meŋgə bay tata da yaŋ ndana hay.

⁷ Mawaslakwa, macəkwalakwa, mahahəmakwa Zlavay, afa macunam ta makəs madəm ta Wut ta təmak sə, ka husakata cay. Madəm tata ana aŋga maləmada cay,

⁸ ac ka vana rəkwat ta gagəmay məsle ana e zlezlə ndeɗndeɗ, kwa magaɓa aabay, afa rəkwat ana mendeɗndeɗ ŋgesey, e ŋguzdek mezlər hay mambəla ana masa ndah ta Zlavay ta ŋgiya eve cəvey ana.»

⁹ Maskəla ɓa ke gweɗiyey, gege: «Vindaw: “Mapəsma ɓa kad ndah masa ac mazala kad pa macunam ta madəm ta Wut ta təmak ana.”» Ke gweɗ saya, gege: «Ma ana hay nesey sə, ece dek da vara Zlavay.»

¹⁰ Ara nesey, ye ke kekəred fəma tata ka ta kəɗana ha, amaa, ke gweɗiyey, gege: «Ke kekəred bay! Yey sə, ya nda maŋga mezlər ta Zlavay ara kaa va ara malamakw va dəmakw hay manaha yaŋ kad pə ma te Yesu. Kekəred sə, kad Zlavay, afa ma te Yesu sə, Mesfen ta mahwad ma masa e dek da vara Zlavay.»

Kəristi aŋga bigula

¹¹ Ava dəɓa ana, ya ta wala sə, baymaləvaŋ mawuna: Pəlez məsle ana ke təhekey, nda matapa fətiya sə, mezel nda maŋga jene eve cəvey ana va nda metehwe ana. A təɗ ma a yaŋ ndana hay va meŋgə vəram ara aŋga ana.

¹² Wut te ndey tata e weɗ ara neneŋ ta kwakwaw magamgam ana. Aŋga ava maslalba matəkaɗa fə yaŋ mabay. Mezel mavinda fa vaw tata, kwa ndana masəniya aabay, say aŋga ana.

¹³ Rəkwat fa vaw tata sə, makwara eve bembez. Mezel tata: Ma ta Zlavay.

¹⁴ Kafaraŋ hay da baymaləvaŋ ac ka cəpaw eve pəlez hay məsle ana, ac ava rəkwat ta gagəmay məsle ana fa vaw ndeɗ ndeɗ kwa magaɓa aabay.

¹⁵ Kafaya matakaɗa ana e dek kad a vəda dapa ma tata ka ta kəɗ ndah ta vavara hay. E te hwedec ke te ɓəcec ava gada ta ɓəray, a ta ɗac rezeŋ dapa slam mazlakava ta maɗac mezem ta rav ta Zlav masa aŋga ava gədaŋ da yaŋ jene hay fakwanay.

¹⁶ Fa rəkwat va ɗac tata sə, mezel mavinda ɓa, gege: «Bay ta bay hay va Bay Mazlakava ta bay mazlakava hay.»

¹⁷ Ava dəɓa ana, ya ka wala maskəla mazlaca dapa pas. E telec ma ava gədaŋ kad ɗiyak hay metev dapa memeɗ da wudam, gege: «Medekey, meɓəcek vaw kad pa macunam mazlakava ta Zlavay,

¹⁸ akwar da ndaɓa slaw ta vaw ta bay da yaŋ bay hay, ta bay hay, ta mazlakava ta kafaraŋ hay, te pəlez hay va ta ndah da yaŋ pəlez ana hay. Slaw ta vaw ta ndana hay fakwanay, ta ndah mapəla va te ɓel hay, ta ndah mazlakava hay va ta ndah wuje hay.»

¹⁹ Ye njerey, ya ta wala sə, gənaw, bay hay dapa vavara va ndah ta vəram tec hay makwasa dapa slam ana, ka ta ŋgə vəram ava nda matapa fe pəlez məsle ana va ndah ta vəram tata hay.

²⁰ Nda da yaŋ pəlez məsle sə, kaw! A təhaz gənaw va nda mapana yaŋ tata ka nda mehwedek ma, mafəca ndana hay ava cah hay masa aŋga ta ŋgiya fəma tata, ke fəcec ndah makəsa tampaŋw ta gənaw va ndah mekekəred kad meezeŋ tata sə, avəda. Ac fakwanay, ec ke kuyeɗec eve ndey pe dəlev ta kwakwaw magəɗa magamgam ana.

²¹ Kafaraŋ tec hay dərziya sə, kafaya masa e dek dapa ma ta nda matapa fe pəlez ke kəɗec avəda, ɗiyak hay fakwanay ec ke mbənec ava slaw ta vaw teceŋ.