Maŋguzad jene hay kad Zaŋ 18 - Ma Majawa Waya

Metəɗ ta Baabilaŋw

¹ Ava dəɓa ana, ya ka wala maskəla mekele e bəreŋgek da baymaləvaŋ. Aŋga ava matimaazlaɓ mazlakava, meweɗ tata ka waɗa slam dapa vavara fakwanay.

² A tal ma ava gədaŋ, gege: Baabilaŋw berne mazlakava sə, ka pəlahata, ka pəlahata pəlah pəlah. Ka tərata ka slam ta manjah ta damkwaw hay, slam ta manjah te mesfen hay maləza fakwanay, slam ta manjah ta ɗiyak hay maləza va masa aca ndar nda,

³ afa ke sec wuzam ta makəs vaw tata fa zaŋ ana kad ndah dapa vavara hay fakwanay. Bay hay ta vavara ac ka kəs vaw ava aŋga. Ndah maŋga fəlew hay dapa vavara ac ka ŋgat zleley mabay mafay te zleley tata macəkuma bay.

⁴ Ya ta cəna uway mekele da baymaləvaŋ, e gweɗ, gege: «Madaɓa dapa berne ana nesey, akwar ndah taaɗaw hay, afa akwar de sehw pe mebər tata hay bay va makaslafay hay masa maləmada mafay tata nesey sə, da husafakwar bay.

⁵ Eve metehwe ana, mebər tata hay sə, ac ka mbata fa slam ana kasl a baymaləvaŋ, mezlər tata hay masa mambəla ana aabay sə, ka pəsana dapa yaŋ ta Zlav aabay.

⁶ Maŋgada hahar ara masa aŋga te ŋgec kad ndah dərziya sə, may, mapəlan dəɓa ecew ara masa aŋga ta ŋgiya. Dapa kwap masa a gaɓ wuzam tata ana dapa sə, macəhana wuzam masa aŋga ava gədaŋ mabay dəɓa ecew kad pa.

⁷ Ara masa ka ŋgat mehehəmey va manjah dapa mambivaw mabay sə, mapəlan meyəv tata ava maŋgada hahar va manjahaɗ pa matakwa, afa ke gweɗ dapa rav tata, gege: “Ya njah fana ka bay, bəna ya ŋgwa macəhwandə bay, kwa ya ta sən matakwa ɓa sə, aabay”.

⁸ Mafay ana, mawala makaslafay hay mazlakava maləmada mafay tata, ac ta ŋgatafa pas amta: Maməcay, makuɗa, mayə va kwakwaw a ta ndala avəda, afa Bay Zlavay matəɗana ma yaŋ sə, aŋga ava gədaŋ mazlakava.»

⁹ Bay hay fakwanay dapa vavara makəsa vaw fa zaŋ ana ava aŋga va manjaha dapa mambivaw ava aŋga sə, ac ta kuɗa, ac ta njah dapa matakwa mafay tata pas masa ac ta wala cacak ta kwakwaw masa a ndaliya e ŋgeŋgəzey.

¹⁰ Ec te zlec dəreŋ ava aŋga, mafay ta zidaw da yaŋ marga tata, ec te gweɗ, gege: «Wabaw! Wabaw! Baabilaŋw, kaa berne masa aŋga ava gədaŋ mabay, ler pal amta sə, mak kad Zlavay ta matəɗakaa ma yaŋ!»

¹¹ Ndah maŋga fəlew hay dapa vavara aca kuɗa, ac manjaha dapa matakwa mafay tata, afa kwa nda amta mahusam jene te fəlew tec sə, ɓasabay.

¹² Jeŋ ana hay sə, gənaɓ hay va səlay hay, kekeŋ hay masa ece husem bay va gavda hay, tərsam ta rəkwat hay masa ece husem bay fakwanay. Hap hay masa ece zek mambəla ana, tərsam te jene hay malama fakwanay eve zleŋ te bekne hay, ava hap hay masa ece husem bay, ava ɓəray gagaza, ava ɓəray magəda va eve celgeŋ hay,

¹³ tərsam ta mal hay mezel kanel va amawm, mal te meŋgeŋgəzey, mir va mal hay masa mezekey ana mambəla ana, wuzam hay va mal ta lak hay, kəfa hay va bəley hay, zla hay va təmak hay, pəlez hay va mawta te pəlez ana hay, ɓel hay va kwa mesfen hay ta ndana hay.

¹⁴ Ndah ana aca kuɗa, gege: «Jene hay masa ka waya sə, ac ka maməhata dəreŋ fa yam te ndey takaa. Zleley ana hay fakwanay va masa ece tehey sə, ac ka zata varakaa. Kwa ka ta ŋgatiya ɓasabay.»

¹⁵ Ndah maŋga fəlew te jeŋ ana hay masa aca ŋgat zleley gaa dapa berne ana sə, ec te zlec dəreŋ mafay ta zidaw fa marga te berne ana. Dapa makuɗa teceŋ va manjah dapa matakwa teceŋ sə,

¹⁶ ec te gweɗ, gege: «Wabaw! Wabaw! Baabilaŋw, berne masa masərata ava rəkwat məsle ana ndeɗ ndeɗ va rəkwat gagaza mapasləharay ana va gagaza maɗawɗaw ana, mawuzlala ava gənaɓ, kekeŋ hay masa ece husem bay va gavda hay,

¹⁷ pal da hwaɗ te ler amta sə, mak mandəvda zleley hay mabay!» Bay ta kaslkaslah hay va ndah dapa kaslkaslah ana fakwanay, ndah mazlarɗa kaslkaslah ana va ndah mazəɓa jene hay dapa kaslkaslah ana fakwanay sə, ec ke zlecec dəreŋ eve berne ana,

¹⁸ ac ka cə lalaw, dapa masa aca wala cacak ta kwakwaw mandala berne ana, ec ke gweɗ, gege: «Berne mekele masa ka da njah dapa ara berne ana nesey sə, aabay!»

¹⁹ Ac ka təmaɗ melbelbe fa yaŋ tec hay, ac ka cə lalaw ava macə marbazlay va makuɗa hay, ec ke gweɗ, gege: «Wabaw! Wabaw! Baabilaŋw, berne mazlakava masa ndah ta kaslkaslah hay dapa yam mafayakfayak ana ac ka ŋgat zleley hay dapa mabay, da hwaɗ te ler pal amta sə, ka pəlahata pəlah pəlah!»

²⁰ Ndana ɓa ke gweɗ, gege: «Kaa baymaləvaŋ, wesley da yaŋ mepəleh te berne ana. Akwar may, ndah ta Zlavay, maslaŋ hay va ndah mehwedek ma, mewesley, afa Zlavay a təɗana ma yaŋ sə, mafay te jə masa e teh bay masa berne ana ta ŋgakwar.»

²¹ Ara nesey, maskəla masa aŋga ava gədaŋ mabay sə, ka zaɓ kekeŋ ara ləgeŋ mazlakava ana, ka kazlaɗ pa yam mafayakfayak ana, ke gweɗ, gege: Baabilaŋw, berne mazlakava, ac ta kazlədakaa ava gədaŋ ara nesey ana may. Kwa ndana a ta wala ɓasabay.

²² Law ta ndah makəɗa ganjaval va ta ndah maslana law hay, ta ndah mafəta slərem va dərem hay, kwa ndana a ta ŋgat macəna da varakaa ɓasabay. Ndah maŋga mezlər wula wula fakwanay sə, ndana e te ŋgetec da varakaa ɓasabay. Kwa maɓəsl ma ta ndah mahaya daw fe ləgeŋ sə, ndana a ta cəna da varakaa ɓasabay.

²³ Meweɗ ta petərla e te weɗ da varakaa ɓasabay. Uway ta makəsa madəmay va ta madəm tata sə, ndana a ta cəna da varakaa ɓasabay, afa ndah takaa maŋga fəlew hay sə, ac eve mehehəm mabay ka fəna ndah ta vavara, afa cah hay takaa ke fəcec ndah dapa vavara hay fakwan avəda.

²⁴ Da varakaa sə, ac ka ŋgat bembez ta ndah mehwedek ma, bembez ta ndah tata va ta ndah maməca hay masa ec te kəɗec fakwan dapa vavara.