Maŋguzad jene hay kad Zaŋ 16 - Ma Majawa Waya

Kwap hay ta gənaɓ tasəla

¹ Ava dəɓa ana, ya ka cəna uway ɓa e gweɗek ava gədaŋ dapa Way ta kwakwas kad maskəla hay tasəla sə, gege: «Madaɗay, ma ta cəhaɗ mezem ta rav ta Zlav masa ac dapa kwap hay tasəla nesey pa vavara.»

² Maskəla macaaca ana ke dey, ka cəhaɗ jə dapa kwap tata sə, pa vavara. Mbəlek hay masa ece teh teh bay va masa ece hec mabay, ec ke həzlek fa vaw ta ndah makəsa tampaŋw ta gənaw va mekekəred kad meezeŋ tata.

³ Maskəla meecew ana, ka cəhaɗ jə dapa kwap tata sə, pa yam mafayakfayak ana, yam ana ka tərata ara bembez ta ndah maməca, ara nesey, jene hay masa ec eve mesfeney dapa yam ana fakwanay, ec ke məceceŋ.

⁴ Maskəla mamahkar ana, ka cəhaɗ jə dapa kwap tata sə, pa wayam hay va njaɓa hay, ara nesey, yam ana hay ac ka tərata ke bembez.

⁵ Ya ta cəna sə, maskəla maŋga bay da yaŋ yam hay, ke gweɗ, gege: «Kaa sə, ka nda maŋga mezlər ara aŋga ana, kaa masa ka ɓa dəga zleezle, kasl pəsna ka ara aŋga ana, ka Mavəna, afa ara nesey, ka ke ŋgə mezlər takaa ara aŋga ana.

⁶ Ara masa ec ke kəɗec ndah takaa hay va ndah mehwedek ma hay avəda, ara aŋga ana, ka ke vec bembez aca ra saw. Eceŋ ana sə, ac mak ta masiya.»

⁷ Asaya, ya ka cəna uway mekele e gweɗek dapa slam te meŋgeŋgez təbekw, gege: «Aŋga, Bay Mazlakava, Zlav nda masa aŋga ava gədaŋ da yaŋ jene hay fakwanay, matəɗ ma takaa hay sə, ac manəha eve metehwe ana va jə masa ara aŋga ana.»

⁸ Maskəla mafaɗ ana, ka cəhaɗ jə dapa kwap tata sə, a yaŋ pas, pas ana ka ŋgat gədaŋ ta mandal ndana hay ava kwakwaw tata.

⁹ Pas manjaanja ana sə, ke ndelec ndana hay avəda, ac ka laf mezel ta Zlav masa aŋga ava gədaŋ da yaŋ makaslafay ana hay, amaa ac ka ŋgwada rav teceŋ ka ta hahəm Zlavay sə, aabay.

¹⁰ Maskəla mazlam ana, ka cəhaɗ jə dapa kwap tata sə, a yaŋ slam ta manjah ta gənaw. Ləvaŋ ke ŋgə dapa slam masa gənaw ana e ŋgə bay da yaŋ ana. Ndana hay aca hac neneŋ mafay te mehecey ana,

¹¹ ac ka laf Zlav da baymaləvaŋ, mafay ta marga hay teceŋ va mbəlek hay teceŋ, ac ka ŋgwada rav teceŋ dapa mezlər tec hay sə, aabay.

¹² Maskəla mamakwa ana, ka cəhaɗ jə dapa kwap tata sə, pa wayam mazlakava ta Efəratis. Yam dapa wayam ana, ka sərkwata ŋgbasl ka ta ləmad cəvey kad bay hay medek jaka bəlam.

¹³ Ara nesey, ya ka wala mesfen hay maləza mahkar, ac ara gwambakw hay, ece dek dapa ma ta gədam, dapa ma ta gənaw macaaca ana va dapa ma ta nda mapana yaŋ tata ka nda mehwedek ma.

¹⁴ Mesfeney ana hay ŋgesey sə, ac mesfen ta damkwaw hay maŋga cah hay. Ec ke dey a way ta bay hay dapa vavara fakwanay, ke te kweseceŋ ka ta ŋgə vəram dapa pas mazlakava ta Zlav masa aŋga ava gədaŋ da yaŋ jene hay fakwanay.

¹⁵ «Mawala, ya daɗay ara makar. Mapəsma ɓa kad nda masa a pə leŋgesl fə yaŋ tata va mapə yaŋ fa rəkwat tata hay, afa e de də aŋga meetərsey va mavana cəv kad hwar da ŋgana bay.»

¹⁶ Ec te kwesec pa slam ava ma te Ebəre, mezel Harmagidaŋw.

¹⁷ Maskəla matasəla ana sə, ka cəhaɗ jə dapa kwap tata sə, pe memeɗ. Uway ke cənek ava gədaŋ dapa gwadadakw dapa Way ta kwakwas. Uway ana ke gweɗ, gege: «Təlam nesey, ka ŋgata cay.»

¹⁸ Ara nesey, mewecəkeɗ ta yam ke ŋgey, maɓasl ma ke ŋgey, merev ta yam ke ŋgə ava gədaŋ ŋgbey! Ŋgbey! Vavara ka ɓəla vaw gegeɗ gegeɗ, dəga manjah ta ndana dapa vavara sə, ke ŋgə ara na aabay.

¹⁹ Berne mazlakava sə, ka vənata slam mahkar va berne hay dapa vavara fakwanay ac ka pəlahata pəlah pəlah. Ara nesey, Zlav ka sənafa berne mazlakava ta Baabilaŋw, ka ta vana kwap ta wuzam te mezem ta rav tata masa e ŋgə nda macəkuma bay.

²⁰ Vavara hay dapa taɓa ta yam mafayakfayak ana fakwanay sə, ec ke hweyeceŋ va wudam hay ec meməheceŋ.

²¹ Rac hay mazlakava mazlakava ana ara gwadakwam ec ke kwiyek da baymaləvaŋ kad yaŋ ndana hay, ndana hay ac ka laf Zlavay mafay ta makaslafay ta rac ana, afa makaslafay ana a lal nda macəkuma bay.