Maŋguzad jene hay kad Zaŋ 15 - Ma Majawa Waya

Maskəla hay tasəla va makaslafay hay mamaɗ yaŋ ana

¹ Ye njerey, ya ta wala sə, jə marəzla nda mazlakava ana ɓa e ŋguzdek vaw da baymaləvaŋ: Maskəla hay tasəla, ac ava makaslafay hay tasəla, masa ac mamaɗ yaŋ ta makaslafay hay, afa Zlav a ta ndəv mezem ta rav tata da yaŋ ndana hay sə, eve eceŋ.

² Ye njerey, ya ta wala sə, yam mafayakfayak ana e zlezlə pazl pazl ara mahwarhwar magaɓa ava kwakwaw. Ndah masa ac ka sasarafa gənaw, meezeŋ ta gənaw ana va lamba te mezel tata sə, ac mazlaca da yaŋ yam ana, ac ava ganjaval masa Zlav te veceŋ dapa ha.

³ Aca slə law ta Muyiz, nda maŋga mezlər ta Zlavay va law ta Wut ta təmak, ece gweɗ, gege: Mezlər takaa hay sə, ac mazlakava, aca rəzla nda Bay Mazlakava, Zlav bay ta gədaŋ Cəv takaa hay sə, ac ara aŋga ana, ac tehwe, Kaa sə, ka Bay ta vavara.

⁴ Melel fa kaa bay sə, wa Bay Mazlakava? Nda masa a hahəlan yaŋ te mezel takaa aabay sə, wa? Afa kaa sə, ka pal amta, ka mavəna. Vavara hay fakwanay ec te dekey, ec te kekəred fəma takaa afa matəɗ ma takaa hay ac ka ŋguzdakata.

⁵ Ava dəɓa ana, ya ka wala: Way ta kwakwas masa aŋga eve meker ta matə yaw, baŋ e wuney da baymaləvaŋ,

⁶ Maskəla hay tasəla matəhaza makaslafay hay tasəla sə, ece dek kad a vəda dapa Way ta kwakwas ana. Ac ava rəkwat fa vaw, rəkwat ana ece weɗ məsle ana ndeɗ ndeɗ, ac majawa ava kanda hay ta gənaɓ da ŋgwah.

⁷ Gənaw amta deveŋ gənaw hay faɗ, ke vec kwap hay ta gənaɓ tasəla kad maskəla ana hay tasəla, kwap ana hay ac manəha weh ava mezem ta rav ta Zlav masa aŋga eve ndey katar ka midakw.

⁸ Cacak ka nəha Way ta kwakwas ana avəda kaf mafay te membeɗ ta Zlavay va gədaŋ tata mazlakava. Kwa ndana mazlafa mesehw pə Way ta kwakwas ana aabay, say makaslafay hay tasəla dapa ha ta maskəla hay tasəla nesey ta ŋgata.