Maŋguzad jene hay kad Zaŋ 12 - Ma Majawa Waya

Ŋgwaz va gədam

¹ Ava dəɓa ana, jə mazlakava ana ɓa ke ŋguzdek vaw da baymaləvaŋ. Ŋgwaz ɓa aŋga ava pas fa vaw ara rəkwat, kiya aŋga da dara sek tata, yaŋ tata matəkaɗa eve menjewzle hay kuraw dapa yaŋ ana ecew.

² Ŋgwaz ana aŋga ava hwaɗ, mbala e te heyey, a cə lalaw, afa e səfey.

³ Jə mazlakava mekele ɓa saya ke ŋguzdek vaw da baymaləvaŋ: Gədam gagaza ana ara kwakwaw. Aŋga ava yaŋ hay tasəla va dərem hay kuraw fə yaŋ ana. Yaŋ ana hay fakwanay sə, ac matəkaɗa ava maslalba.

⁴ Hwadar tata e kwekwecekec menjewzle hay gəva amta dapa mahkar da baymaləvaŋ kad fa vara. Gədam ke zlecey fəma ta ŋgwaz masa e səfey sə, afa a da ndana wat ana avəda dapa mehey tata.

⁵ Ŋgwaz sə, ke heyek wat mawal, aŋga wat ma ta ɓəca vavara hay fakwanay ava daŋgwar ta ɓəray. Wat ana aŋga makəsa avəda kad cak ta Zlavay va ta gwadadakw tata.

⁶ Ŋgwaz sə, ka hwayata kad pə yaŋ ta səɓak pa slam masa Zlav ka ləmadan ha dərŋga, afa a da ndaɓa jə ta manday da hwaɗ ta manah bakatar eve temere ecew va kwakwar makwa.

⁷ Ara nesey, vəram ke ŋgey da baymaləvaŋ: Mikeyel va maskəla tata hay aca ŋgə vəram ava gədam ana. Gədam sə, aŋga va maskəla tata hay aca ŋgə vəram eve ec may,

⁸ amaa ac ka zlafa mefənec ava gədaŋ aabay. Ara nesey, ac ka ŋgat slam ta manjah kad eceŋ da baymaləvaŋ ɓasabay.

⁹ Gədam, zezekw mezleezle ana mezel Bay ta haalay daha aabay Saadan, nda mafəca ndah dapa vavara fakwanay sə, aŋga mazada avəda kad pa vavara ava maskəla tata hay.

¹⁰ Ava dəɓa ana, ya ka cəna uway e gweɗek ava gədaŋ da baymaləvaŋ, gege: «Mawala, pas te membəley, ta gədaŋ mazlakava, te meŋgə bay ta Zlav tandakwa, va gədaŋ ta bay te Kəristi tata ka husakata cay, afa nda majawa malamaŋ tandakwa hay ava ma sə, mazada avəda kad pa vavara. Aŋga nda majawa malamaŋ tandakwa hay ava ma fəma ta Zlav tandakwa hwavavaɗ hwapapas.

¹¹ Amaa malamaŋ tandakwa hay, ac ka sasarafa eve bembez ta Wut ta təmak va ma tec hay metehwe ana masa ac ta tə yaw da yaŋ ana. Ac ka wal mesfen teceŋ elehey kasl pa maŋgə zidaw fa maməcay sə, aabay.

¹² Mafay ana, manjah dapa mewesley, akwar baymaləvaŋ hay va ndah manjaha dərŋga! Wabaw kad akwar, vavara va yam mafayakfayak ana, afa Bay ta haalay ka bəraŋgata kad varakwar, a zəmana fa rav mabay, afa a səniya pas magəra kusetke kad aŋga.»

¹³ Masa gədam ana a wala aŋga mazada avəda kad pa vavara, a tatar ŋgwaz masa aŋga te heyek wat mawal.

¹⁴ Amaa ŋgwaz ana ka ŋgat pərkwasla hay ecew ta maviza mazlakava ana, a da təvaɓa kad pə yaŋ ta səɓak, pa slam masa maləmada kad aŋga dərŋga a da ndaɓa jə ta manday dəreŋ ava zezekw ana, da hwaɗ ta mavay mahkar ava rita.

¹⁵ Gədam sə, ka vənahafa yam da hwaɗ tata a da cəpiya ara wayam, afa a da kəsa ŋgwaz ana avəda.

¹⁶ Amaa vavara ka jəna ŋgwaz ana avəda: Vavara ka wuna ma, ka sana yam masa e vevek da hwaɗ ta gədam sə, avəda.

¹⁷ Gədam sə, dapa mazam rav tata fa ŋgwaz ana, ka zlar maŋgə vəram ava tərsam ta ŋgwaz ana dərziya, ara megweɗey, ndah manahda yaŋ kad pə ma ta ma majawa ta Zlavay va mapə yaŋ fa matə yaw da yaŋ Yesu.

¹⁸ Gədam ana, ke zlec fa wurɓaɓay da ma ta yam mafayakfayak ana.