Maŋguzad jene hay kad Zaŋ 11 - Ma Majawa Waya

Ndah matana yaw hay ecew

¹ Ava dəɓa ana kusetke, ec ke viyey gada te zəleŋ ara gada te melev jene hay, ec ke gweɗiyey, gege: «Zleftek, ləva megəl ta Way ta kwakwas, slam te meŋgeŋgez təbekw va maŋgəfa ndah mekekəred kad Zlav dapa way ana.

² Amaa zaŋ ta Way ta kwakwas jaka a vəda sə, gərda ava zlalav, ka ta ləviya bay, afa Zlav ka van kad tərsam hay mekele masa aca səniya bay, aca ra mbərasl berne mavəna eve sek da hwaɗ ta mavay mahkar ava kiya makwa.

³ Ara nesey, ye te zlerdec ndah mata yaw da yaŋ yey ecew ke te gweɗ da yaŋ jene hay masa ec te ŋgə maayaŋ kad fəma da hwaɗ ta manah bakatar eve temere ecew va kwakwar makwa, ndah ma ta tana yaw ana ŋgesey, ac ava rəkwat ta bakatar hay fa vaw.»

⁴ Ndah matana yaw ecew ana ŋgesey sə, ac mazlaca fəma ta Bay Mazlakava ta vavara. Eceŋ ana ŋgesey sə, ac ara Awliviyey hay ecew va petərla hay ta gənaɓ ecew.

⁵ Daha ndana a wal me te neseceŋ sə, kwakwaw e dek dapa ma teceŋ a ndala maslagəra tec hay avəda. Ara aŋga ana, daha ndana ka yah cəv te meneseceŋ sə, eve metehwe ana, ac ta kəɗa avəda ka macəhwandaw.

⁶ Ac ava matimaazlaɓ ta maɓəzla baymaləvaŋ, ara nesey, kwa yam e te slek dapa pas hay ta matə yaw teceŋ sə, ɓasabay. Ac ava matimaazlaɓ ta matər yam ke bembez va matimaazlaɓ te mekezlefec tərsam ta makaslafay hay fakwanay kad fa ndah dapa vavara pas masa ac ta waya.

⁷ Amaa daha ac ka ndəvda matə yaw ana cay, gənaw masa e te təhek dapa pe veɗ mekweleeleŋ ana sə, a ta ŋgə vəram eve eceŋ, e te fənec ava gədaŋ, e te kəɗec avəda ka macəhwandaw.

⁸ Macəhwandə tec hay ec te gəreɗec pa zaŋ te berne mazlakava. Berne ana sə, aŋga ara Sawduma va Misəra masa ac ta kəɗ Bay tec Mazlakava dapa.

⁹ Ndah dapa wunam hay fakwanay, dapa tərsam hay fakwanay, ma ta wunam hay fakwanay va vavara hay fakwanay ec te dekey ka ta wuzaɗ macəhwandə tec hay dapa manah mahkar va rita. Ac ta və cəv te mepəsehec aabay.

¹⁰ Ndah dapa vavara ec te wesley mafay ta maməc teceŋ, ac ta njahay dapa mewesley ava mavə jene hay taambəla dapa taɓa teceŋ, afa ndah ecew mehwedek ma hay nesey ec ke ŋgedec marga kad ndana hay mabay dapa vavara.

¹¹ Amaa ava dəɓa ta manah mahkar va rita sə, Zlav ke vehecen mesfen teceŋ, ec ke zleftek, ec ke zlecey. Ndah mawala ndah ana hay sə, ac ke ŋgə zidaw mabay.

¹² Ava dəɓa ana, ac ka cəna uway e gweɗek da baymaləvaŋ, gege: «Metepek kad fana.» Ec ke tepey kad baymaləvaŋ jaka pa zlav ta yam meendey ta maslagəra tec hay.

¹³ Dapa ŋgesey ana, vavara ka ɓəla vaw ava gədaŋ mabay. Gəva te berne ana amta dapa kuraw sə, ka mbəɗata, ndana hay bakatar tasəla ec ke məceceŋ dapa makaslafay ana nesey. Ndah dərziya masa ac eve ndey sə, aca ŋgə zidaw mabay, aca hahəm Zlav da baymaləvaŋ.

¹⁴ Marga hay meecew ana sə, ka data cay. Mawala marga mamahkar ana, e te dek saya.

Dərem matasəla ana

¹⁵ Maskəla matasəla ana, ka fət dərem tata. Uway hay mazlakava ana ece gweɗek ava gədaŋ da baymaləvaŋ, gege: «Meŋgə bay ta vavara sə, aŋga mapa təlam nesey kad Bay tandakwa Mazlakava va Kəristi tata, a ta ŋgə bay da yaŋ ndana hay katar ka midakw.»

¹⁶ Mesnendə hay kwakwar ecew dapa yaŋ ana faɗ manjaha fa gwadadakw hay ta bay fəma ta Zlavay sə, ec ke kekəredey, dəŋgaɗ dac fa vara ac ka hahəm Zlavay,

¹⁷ eve megweɗ, gege: «Anda ŋgakaa wasay, Bay Mazlakava, Zlav maŋga bay da yaŋ jene hay fakwanay, masa aŋga ɓa pəsna va dəga vavara malama bay heley aŋga ɓa cay, afa ka ka ŋgə mezlər ava gədaŋ takaa mazlakava va mazlac Wunam ta bay takaa.

¹⁸ Vavara hay aca zam rav, amaa mezem ta rav takaa ke dekey. Pas te metəɗec ma yaŋ ndah maməca, pas te mepəlecen meyəv te mezlər ta ndah maŋga mezlər takaa ndah mehwedek ma hay, ta ndah takaa va ta ndah melel fe mezel takaa, mazlakava hay va wude hey sə, ka husakata cay. Pas te mezec ndah manasa vavara sə, ka husakata cay.»

¹⁹ Way ta kwakwas da baymaləvaŋ ke wuney, ekwete ta majaw ma ta Zlavay va ndana hay ka ŋguzdakata a vəda. Ara nesey, mewecəkeɗ ta yam ke ŋgey, maɓasl ma ke ŋgey, merəv ta yam ke ŋgey, vavara ka ɓəla vaw va rac ta yam ke kwiyek mabay kad fa vara.