Maŋguzad jene hay kad Zaŋ 10 - Ma Majawa Waya

Maskəla va livəra mekusetke ana

¹ Ava dəɓa ana, ya ka wala maskəla mekele masa aŋga ava gədaŋ mabay, ke bəreŋgek da baymaləvaŋ. Aŋga masərata ava zlav ta yam, yaŋ tata matulaka ava kwalay, ndey tata aŋga ara pas, sek tata hay ac ara neneŋ ta kwakwaw.

² Aŋga ava livəra mekusetke ana mawuna matəhaza dapa ha. Ka zlazləka sek tata hay. Sek ta zam aŋga da yaŋ yam mafayakfayak ana, sek ta gula aŋga da yaŋ vavara,

³ a cə lalaw ava gədaŋ, ara mabar ta ŋgal uway. Masa ka cana lalaw ana cay sə, merev ta yam ka vahan kad pa dəɓa tasəla.

⁴ Masa merev ta yam ana ka ndəvata cay sə, amba ya wal ma ta vindiya, amaa ya cəna uway ɓa da baymaləvaŋ e gweɗiyey, gege: «Ka ta ŋguzda ma masa merev ta yam ta gwaɗiya dəɓa tasəla na bay, ka ta vindiya bay.»

⁵ Maskəla masa ya ta wala aŋga mazlaca da yaŋ yam mafayakfayak ana va da yaŋ vavara sə, a baŋgaɗ ha ta zam kad wudam,

⁶ e mbeɗey, eve mezel ta Zlav masa aŋga eve ndey katar ka midakw, aŋga nda melemek slam da baymaləvaŋ va jene hay dapa, vavara va jene hay dapa, yam mafayakfayak ana va jene hay dapa, gege: «Jeŋ ana hay ac ta njah ɓasabay.

⁷ Amaa pas masa maskəla matasəla ana ka ta zlara mafət dərem tata sə, mawulak yaŋ ta Zlavay masa maraɓa sə, a ta ŋgata ara masa aŋga te gweɗec ndah maŋga mezlər tata hay, ndah mehwedek ma.»

⁸ Uway masa ya ta cəna e gweɗek da baymaləvaŋ sə, ke gweɗiyey saya, gege: «Daɗay, ta kəs livəra mekusetke ana mawuna dapa ha ta maskəla masa aŋga mazlaca da yaŋ yam mafayakfayak ana va da yaŋ vavara antisey.»

⁹ Ye ke dey vara maskəla ana, ya ŋgana mbahw a da vuwa livəra ana. Maskəla sə, ke gweɗiyey, gege: «Aha kəsaw, ndaw. A ta ŋgakaa dendərek da hwaɗ, amaa a ta cənafakaa dapa ma ara ŋgbam.»

¹⁰ Ya ka kəs livəra dapa ha ta maskəla ana, ya ka ndaw. Dapa ma aɗaw sə, ke cənefiyey ara ŋgbam, amaa masa ya ka səɗakaɗ a hwaɗ cay sə, ka tərata dendərek.

¹¹ Ndana ke gweɗiyey, gege: A lada ka bəzad ma da yaŋ jene hay masa ec te ŋgey maayaŋ kad fəma da yaŋ tərsam hay, vavara hay mekele mekele, ma ta wunam hay mekele mekele va da yaŋ bay hay mabay.