Mata 6 - Ma Majawa Waya

Mavə jene ta majəna nda

¹ «Mep leŋgesl te meŋgə jene ara aŋga ana takwar meendey ta ndana hay masa ac da səŋgalakwar. Daha aabay sə, akwar ta ŋgat meyəv takwar da vara Papaŋ takwar da baymaləvaŋ ɓasabay.

² Daha ka wal mavə jene kad maslamarga sə, ka ta fat dərem fəma takaa bay, ara ndah masa neneŋ dapa ma ecew ta ŋgiya dapa Way hay ta macə mbahw te Zuwef hay va dapa cəv hay, afa aca ra ŋgat hehəm vara ndana hay. Eve metehwe ana ya gwaɗakwar, ac ka ŋgat meyəv tec cay.

³ Amaa kaa sə, daha ka və jene kad maslamarga sə, a lada ha ta gula takaa da səna masa ha ta zam takaa ta ŋgiya bay,

⁴ afa jə masa ka viya sə, da njah maraɓa. Ara nesey, Papakw mawala jə masa ka viya meereɓ ŋgesey sə, a ta vahakaɗay.»

Macə mbahw

⁵ Daha akwa cə mbahw sə, akwar ta ciya ara ndah masa neneŋ dapa ma ecew masa aca wal macə mbahw meezlecey dapa Way ta macə mbahw te Zuwef hay va dapa macam yaŋ te cəv hay sə, bay, aca ŋgiya ara nesey, afa ndana hay ece re weleceŋ. Eve metehwe ana ya gwaɗakwar, ac ka ŋgat meyəv tec cay.

⁶ Amaa kaa sə, daha ka wal macə mbahw, sahwaɓa e veŋ takaa masa da dəɓiya ana, ɓəzla ma ta way ana, cə mbahw takaa kad Papakw masa aŋga dapa slam maraɓa. Ara nesey, Papakw mawalakaa maraɓa ŋgesey, a pəlakaɗ meyəv takaa.

⁷ Daha akwa cə mbahw sə, akwar ta njahda gaa ara ndah masa aca sən Zlav bay bay. Teceŋ sə, aca wulakiya Zlav a ta cəna mawawal ma teceŋ daha aca njahda gaa.

⁸ Akwar ta ŋgiya ara ec bay, afa Papaŋ takwar a sən jə masa akwa waya wagaa akwar ta nəkafa.

Macə mbahw ta Papaŋ taciya

⁹ Takwar sə, macə mbahw ara nesey: «Papaŋ taciya masa aŋga da baymaləvaŋ, ŋguzda yaŋ takaa kad ndana hay fakwanay aca ra sənakaa.

¹⁰ Meŋgə bay takaa de dekey, mawulak yaŋ takaa da ŋgata dapa vavara ara da baymaləvaŋ.

¹¹ Vandaw pəsna jə ta mandə masa anda waya,

¹² Pəlandan mezlek taciya hay fa yam te ndey takaa, ara masa andaw ava yaŋ taciya ana anda te pəlecen mezlek ta ndah mezlekey fa yam te ndey taciya,

¹³ ka ta hwadaɗandaw pe mecek bay, amaa pəlakandaw avəda dapa ha ta Nda macaka nda, [afa Meŋgə bay, Gədaŋ mazlakava va Membeɗey sə, ac dapa ha takaa katar ka midakw. E de ŋgey!]»

¹⁴ «Yaw, daha akwa pəlecen mebər ta ndana hay sə, ŋgesey, Papaŋ takwar da baymaləvaŋ a ta pəlakwaɗ mebər takwar may.

¹⁵ Amaa daha akwa pəlecen mebər ta ndana hay aabay sə, ŋgesey, Papaŋ takwar a ta pəlakwaɗ mebər takwar hay aabay may.»

Dalyama

¹⁶ «Daha akwa ŋgə dalyama sə, akwa ta məca ndey takwar ara ndah masa neneŋ dapa ma ecew ta ŋgiya bay. Aca məca ndey teceŋ ke te ŋguzdek kad ndana hay ac dapa meŋgə dalyama. Eve metehwe ana ya gwaɗakwar, ac ka ŋgat meyəv tec cay.

¹⁷ Amaa kaa sə, daha ka ŋgə dalyama, təkwaɗafa mal fa yaŋ, pana ndey takaa,

¹⁸ afa ndana hay ac da səna ka dapa meŋgə dalyama bay. Amaa say Papakw masa aŋga manjaha dapa slam maraɓa, Papakw masa a wala ka ŋgə jə masa ndana a səniya bay ŋgesey sə, a ta pəlakaɗ meyəv takaa.»

Zleley maraɓa da baymaləvaŋ

¹⁹ «Akwar ta ɓəcaɗ zleley hay pa vavara na bay, pa slam masa tepey va maŋgərzuway ac ta ndakwaɗ avəda, pa slam masa makar hay ac ta pəzakakwaɗ way va makərakwaɗ avəda bay.

²⁰ Amaa maɓəcaɗ zleley takwar hay a baymaləvaŋ, pa slam masa tepey, kwa maŋgərzuway aca ndiya aabay, pa slam masa makar hay aca pəzakw way, aca kəra avəda sə, aabay,

²¹ afa dapa slam masa zleley takaa maɓəca sə, rav takaa aŋga faŋga may.»

Petərla ta vaw

²² «Petərla ta vaw sə, ndey. Daha ndey takaa aŋga werwer sə, vaw takaa fakwanay aŋga dapa slam mawaɗa.

²³ Amaa daha ndey takaa gwabay sə, vaw takaa fakwanay a ta njah dapa ləvaŋ. Daha meweɗ masa aŋga dapa kaa aŋga ləvaŋ sə, ŋgesey, ləvaŋ ana a tərata ɓekɓek.»

Zlavay va səlay

²⁴ Nda amta sə, a zlafa maŋgana mezlər kad bay ta way hay ecew bay, afa a ta wal bay ŋgeɗey, nda leŋgeɗey sə, a ta waya bay, daha aabay a ta njah ava bay ŋgeɗey, a ta paɗ bay leŋgeɗey ke jene taambəla. Akwa zlafa maŋgana mezlər kad Zlavay va səlay bay.

Mawulak yaŋ hay

²⁵ Mawala mafay te mey masa ya gwaɗakwar: Akwar ta ɓasla yaŋ takwar ta manjah eve ndey da yaŋ jə ta manday, kwa mafay ta vaw takwar da yaŋ rəkwat te mep fa vaw bay. Manjah takwar eve ndey sə, aŋga eve mehehəm ka fəna jə ta mandə aabay geyey? Vaw aŋga eve mehehəm ka fəna rəkwat aabay geyey?

²⁶ Map ndey fa ɗiyak hay da baymaləvaŋ, ece slek aabay, aca cə jene aabay, aca ɓac jene kad pa wuda hay aabay, amaa Papaŋ takwar da baymaləvaŋ e ndec jene. Akwar eve mehehəm gaa ke fənec aabay geyey?

²⁷ Ndana wa deveŋ akwar masa a zlafa mapana kwa manah pal amta kad veŋ manjah tata eve ndey ava mawulak yaŋ tata?

²⁸ Naa, akwa ɓasl yaŋ da yaŋ rəkwat hay sə, mafay te mey? Menjer fe mefefen te wudez hay de ley, ece gəl sə, gwagumaw? Ece ŋgə mezlər aabay, aca cə rəkwat aabay,

²⁹ amaa ya gwaɗakwar, bay Salmaŋw, kwa aŋga nda mazlakava, ka zlafa map rəkwat mambəla ana ara eceŋ sə, aabay.

³⁰ Daha Zlav e pec rəkwat fa vaw te kəzeŋ hay de ley ara nesey masa ac ɓa pəsna va masa tedew kwakwaw e te ndelec avəda sə, naa a ta ŋgakwar mambəla ana kad akwar ka fəna aabay geyey, akwar ndah masa makəsparav pahata!

³¹ Akwar ta ɓasla yaŋ te megweɗ: Andə te ndek sə, mey? Daha aabay, andə te sek sə, mey? Daha aabay, andə te pek fa vaw sə, mey? Away ara na bay.

³² Jeŋ ana hay fakwanay nesey sə, ndah masa aca sən Zlav bay sə, aca yahiya ava masasak vaw aabay. Amaa Zlav Papaŋ takwar da baymaləvaŋ sə, a sən jə masa akwa waya fakwanay.

³³ Mayah macaaca ana sə, Wunam ta bay va meŋgə mezlər eve cəvey ana ta Zlavay. Jeŋ ana hay fakwanay nesey sə, akwar ta ŋgatiya kad yaŋ ana.

³⁴ Akwar ta ɓasla yaŋ takwar mafay te tedew bay, afa tedew sə, a ta ɓasl yaŋ tata kad aŋga ana may. Pas fakwanay sə, aŋga eve meyəv tata.