Mata 5 - Ma Majawa Waya

Mabəzad ma hay te Yesu fa ŋguɗa

¹ Masa Yesu a wala miya hay ece dek kad vara vaw sə, ke tep fa ŋguɗa, ka njahay, ndah masasəraka jene tata ec ke dey kad vara vaw.

² Yesu ka zlar mesesərekeceŋ, gege:

Mambivaw hay

³ «Mapəsma ɓa kad ndah masa aca səniya dapa rav teceŋ ac maslamarga hay, afa Wunam ta bay da baymaləvaŋ hay sə, mapa kad eceŋ.

⁴ Mapəsma ɓa kad ndah makwaɗma hay, afa ac ta ŋgat macam vavara.

⁵ Mapəsma ɓa kad ndah masa ac ava makuɗa dapa ndey, afa ac ta ŋgat matək rav.

⁶ Mapəsma ɓa kad ndah mahura meŋgə jene ara aŋga ana, afa ec te mbəneceŋ.

⁷ Mapəsma ɓa kad ndah maŋga metekwen fa ndana hay, afa ac te ŋgefec metekweney.

⁸ Mapəsma ɓa kad ndah masa rav tec mapana, afa ac ta wala Zlavay.

⁹ Mapəsma ɓa kad ndah mehwedek meteh pa taɓa ta ndana hay, afa ec te zelec wudeh ta Zlavay.

¹⁰ Mapəsma ɓa kad ndah masa ndana hay ece ŋgedec hahar mafay te meŋgə jene ara aŋga ana, afa Wunam ta bay da baymaləvaŋ hay sə, mapa kad eceŋ.

¹¹ Mapəsma ɓa kad akwar daha masa ndana hay aca lafakwar, aca ŋgadakwar hahar va maŋgafakwar mbaɗa mbaɗa hay mafay ta masa akwar ndah taaɗaw.

¹² Manjah dapa mewesley, meweslə masa magaa ana, afa akwar ta ŋgat meyəv takwar mazlakava ana da baymaləvaŋ. Ara nesey ana, ec ke ŋgedec hahar kad ndah mehwedek ma hay masa ac ka njah dapa vavara kamma fakwar.»

Fəceɗ va slam mawaɗa

¹³ «Akwar sə, fəceɗ ta vavara. Daha fəceɗ ka zana mecen tata avəda sə, e de tər ke fəceɗ saya sə, a ŋgana gwagumaw? A jəna nda ɓasabay, aca tamda kad a vəda, ndana hay aca mbərasla avəda.»

¹⁴ «Asaya, akwar sə, slam mawaɗa ta vavara. Wunam mazlakava malama da yaŋ maɗar sə, a zlafa mereɓ bay.

¹⁵ Daha anda gəɗakwa kwakwaw fa petərla sə, ka ta raɓaɗ a dara jene bay, amaa maɗaraɗ a yaŋ jene, ara nesey, e weɗecen slam kad ndah da way ana fakwanay.

¹⁶ Ara aŋga ana, a lada meweɗ takwar de weɗey fa yam te ndey ta ndana hay, afa aca ra wala mezlər hay takwar mambəla ana masa akwar ta ŋgiya, ac da hahəm Papaŋ takwar masa aŋga da baymaləvaŋ.»

Yesu va ma majawa

¹⁷ «Akwar ta kəsiya masa ye dek sə, ka ta həlafa ma majawa ta Muyiz va ma hay ta ndah mehwedek ma bay. Ye dek sə, ka ta həlafa bay, amaa ke te nəheceŋ.

¹⁸ Eve metehwe ana ya gwaɗakwar, ara masa slam da baymaləvaŋ va vavara ac ɓa hel nesey sə, kwa jene kusetke da yaŋ alfabey mekusetke ana, daha aabay jə mavaha mekusetke ana masa mavinda dapa ma majawa ta Muyiz sə, e te veves aabay, kasl pe memeɗ te jene hay fakwanay ta ŋgata.

¹⁹ E zler dəga təlam nesey, nda mambərasla jə mekusetke ana dapa ma majawa ta Muyiz va masasərak ndah dərziya te meŋgə jene ara aŋga ana sə, ac ta zaliya nda mekusetke ana dapa Wunam ta bay da baymaləvaŋ hay. Amaa nda mapafa yaŋ fa ma majawa ana hay va masasərak ndah dərziya te meŋgə ara aŋga ana sə, ac ta zaliya nda mazlakava dapa Wunam ta bay da baymaləvaŋ hay,

²⁰ afa eve metehwe ana ya gwaɗakwar, daha meŋgə jene ara aŋga ana takwar ka fəna meŋgə jene ara aŋga ana ta ndah mesesərekecen ma majawa kad ndana hay va Farisa hay aabay sə, akwar ta ŋgat mesehw pa Wunam ta bay da baymaləvaŋ hay sə, aabay.»

Makəɗa nda ka macəhwandaw va madərazl ma

²¹ «Akwar ka cəna ma masa magwaɗa ana daha kad papaŋ ta papaŋ tandakwa hay: “Ka ta kəɗ ndana cukw cukw bay. Kwa waawa masa ka kəɗaɓa ndana cukw cukw sə, ac ta hwadaɗ fəma ta ndah matəɗa ma a yaŋ ndana hay”.

²² Amaa yey, ya gwaɗakwar, kwa waawa masa a zam rav da yaŋ malamaŋ, daha aabay da yaŋ dəmaŋ sə, ac ta hwadaɗ pa ha ta ndah mavən ma hay. Nda masa a gwaɗa malamaŋ, daha aabay dəmaŋ, “Marəzla”, ŋgesey, ac ta hwadaɗ nda ana fəma ta ndah maca mamənak te Zuwef hay. Nda masa a gwaɗa malamaŋ, daha aabay dəmaŋ, “Kelembe”, ŋgesey, ac ta kazlaɗ pa kwakwaw masa a ta məc aabay.

²³ Daha ke dey ka ta ŋgə kwakwas fa slam te meŋgeŋgez təbekw, faŋga, ka sənafa malamakw, daha aabay dəmakw ka zəm rav da yaŋ kaa,

²⁴ gərda jə ta kwakwas takaa faŋga fəma ta slam te meŋgeŋgez təbekw, daɗ te dərezlek ma avəda ava malamakw. Ava dəɓa ana, ŋguzad jə ta kwakwas takaa.

²⁵ Daha ndana ka cafakaa lalaw da way ta bay, dapa masa akwa də ava aŋga dapa cəvey a pa slam ta mavan ma hay sə, vas vaw ta maləmada ma ana avəda, afa daha aabay sə, nda ana a ta hwadaɗakaa pa ha ta nda matəɗa ma a yaŋ ndana hay. Nda matəɗa ma a yaŋ ndana hay sə, a ta paɗakaa pa ha ta kafaraŋ hay. Kafaraŋ ana hay ac ta kazlaɗakaa pa daŋgay.

²⁶ Eve metehwe ana ya gwaɗakwar, ke te dek kad a vəda dapa daŋgay ana ŋgesey sə, say ka ta pəlan duwa ta nda ana avəda fakwanay.»

Madama va mecəhweney

²⁷ Akwar ka cəna ma masa magwaɗa ana daha, gege: Ka ta kəs vaw fa zaŋ ana bay.

²⁸ Amaa yey, ya gwaɗakwar, kwa waawa masa a ndandazl ŋgwaz ta ndana eve mekekesl ta vaw sə, ŋgesey, ka ŋgə madama ava aŋga cay dapa rav tata.

²⁹ Daha ndey ta zam takaa a hwadakaa pe meŋgə mebərey sə, huslaka avəda, kazlda dəreŋ ava kaa, afa zuwan ka ta zana gəva ta vaw takaa amta avəda, da yaŋ masa ke te dey ava vaw takaa fakwanay kad pa kwakwaw masa e te ndəv aabay.

³⁰ Daha ha ta zam takaa a hwadakaa pe meŋgə mebərey sə, ŋgəla avəda, kazlda dəreŋ. Zuwan ka ta zana gəva ta vaw takaa amta avəda, da yaŋ masa ke te dey ava vaw takaa fakwanay kad pa kwakwaw masa e te ndəv aabay.

Mambas ŋgwaz

³¹ Dapa slam mekele magwaɗa ana daha, gege: «Nda masa a mbasana ŋgwaza sə, a lada a vana ɗelewer te membesey pa ha.

³² Amaa yey, ya gwaɗakwar, kwa waawa masa a mbasana ŋgwaza anjəkar ka ŋgə madama aabay sə, ŋgesey, ka zadaɗ ŋgwaz ana kad pa makəs vaw fa zaŋ ana. Nda masa a kəs ŋgwaz barvəla sə, ŋgesey, aŋga nda maŋga madama.»

Membeɗey

³³ «Asaya, akwar ka cəna, ma masa magwaɗa ana daha kad papaŋ ta papaŋ tandakwa hay: “Ke te mbeɗ ava maŋgal ma bay, amaa ŋgana jə masa ka ta gwaɗiya dapa membeɗ takaa fa yam te ndey ta Bay Mazlakava sə, avəda.”

³⁴ Amaa yey, ya gwaɗakwar, kwa akwar te mbeɗ bay: Kwa ava slam da baymaləvaŋ sə, akwar te mbeɗ bay, afa baymaləvaŋ sə, slam ta bay ta Zlavay.

³⁵ Kwa ava vavara, afa vavara sə, slam te mep sek tata hay, kwa ava Zeruzelem, afa Zeruzelem sə, berne ta mazlakava ta Bay hay.

³⁶ Ke te mbeɗ kwa ava yaŋ takaa bay, afa kwa ka zlafa metər ŋgwec ta yaŋ takaa amta ke məsle ana, daha aabay ka magəda ana bay.

³⁷ Daha akwa gweɗey, megweɗ: “Aŋga”, daha aabay “away”. Ma hay dərziya sə, ece dek da vara bay ta haalay.»

Mavah suwe

³⁸ «Akwar ka cəna ma masa magwaɗa ana daha, gege: “Ndey kad ndey, zleŋ kad zleŋ”.

³⁹ Amaa yey, ya gwaɗakwar, daha ndana ka ŋgakaa jə masa e teh bay sə, ka ta vahan eve jə masa e teh bay bay. Sesəker daha ndana a kəɗakaa pa baazlam jaka luwa ta zam sə, ŋgwadan gəva leŋgeɗ saya may.

⁴⁰ Daha ndana ka cafakaa lalaw da way ta bay, a wal makəs rəkwat da hwaɗ ta rəkwat takaa sə, gəran ava rəkwat da yaŋ ana cuweeney.

⁴¹ Daha ndana ka tatəkakaa te mezeɓ jene mandalndal ana kilewmeeter amta sə, zəɓan jeŋ ana kasl kilewmeeter ecew.

⁴² Kad nda manəkafakaa jene sə, vana. Kad nda manəkafakaa duwa sə, ka ta ŋgwadafa dəɓa bay.»

Mawal maslagəra hay

⁴³ «Akwar ka cəna ma masa magwaɗa ana daha, gege: “Wal maslavda takaa, amaa maslagəra takaa sə, ka ta waya bay.”

⁴⁴ Amaa yey, ya gwaɗakwar, mawal maslagəra takwar hay va macə mbahw mafay ta ndah masa aca ŋgadakwar hahar,

⁴⁵ afa akwar de tər ke wudeh metehwe ana ta Papaŋ takwar masa aŋga da baymaləvaŋ, afa aŋga sə, a wun pas kad yaŋ ndah suwe va ndah mambəla ana. Asaya, e slek yam kad yaŋ ndah maŋga mezlər eve cəvey ana va kad yaŋ ndah masa ece ŋgə jene eve cəvey ana aabay,

⁴⁶ afa daha akwa wal sə, ndah masa aca walakwar babəla, naa akwar da ŋgat meyəv takwar sə, wula? Kwa ndah macəkala budaw hay ac ta ŋgiya ara aŋga ana aabay ŋgəɗa geyey?

⁴⁷ Daha akwa gweɗ fa vaw sə, say kad malamaŋ va dəmaŋ takwar hay babəla sə, naa jə masa akwa ŋgek waya hay sə, wula? Kwa ndah masa aca sən Zlav bay sə, ac ta ŋgiya ara aŋga ana aabay ŋgəɗa geyey?

⁴⁸ Manjah ndah maŋga jene fakwanay ara Papaŋ takwar da baymaləvaŋ aŋga nda maŋga jene hay fakwanay.»