Mata 3 - Ma Majawa Waya

Zaŋ Baatis

¹ Dapa manah hay ana ŋgesey, ndana ɓa mezel Zaŋ Baatis, e ŋguzdek vaw, a bəzad ma dapa yaŋ ta səɓak dapa vavara te Zudey.

² E gweɗ, gege: «Maŋgwada rav takwar, afa Meŋgə bay ta Zlav da baymaləvaŋ hay sə, ka husakata cay.»

³ Zaŋ ana sə, aŋga nda masa Izay nda mehwedek ma zleezle ke gweɗ da yaŋ ana, gege: «Uway e cənek dapa yaŋ ta səɓak, e gweɗ, gege: “Maləmadana cəv kad Bay Mazlakava, maləmadan cəv hay wuje mambəla ana nduwak nduwak”.»

⁴ Zaŋ aŋga ava rəkwat te ŋgwec ta zlagumay fa vaw, ŋgwah tata majawa ava kanda ta mbal, a ndə sə, yakw va ŋgbam de ley.

⁵ Ara nesey, ndah de Zeruzelem, dapa vavara te Zudey fakwanay va dapa vavara masa zef ava wayam te Zurdeŋ ana fakwanay, ec ke dey kad vara vaw.

⁶ Ec ke ŋguzdek mebər tec hay, Zaŋ may, ke ŋgec beetem da wayam te Zurdeŋ ana.

Matal ma ta Zaŋ kad pa maŋgwad rav

⁷ Masa Zaŋ e welec Farisa hay va Saaduki hay mabay ece dey kad vara vaw ke te ŋgə beetem sə, gege: «Hay! Akwar tərsam ta bay ta wudam hay! Maŋguzdakwar wewer ta mambəlaɓa fe mezem ta rav ta Zlav masa e te dekey sə, wa?

⁸ Meŋguzdek mezlər hay mambəla ana masa aca tə yaw da yaŋ maŋgwad rav takwar,

⁹ akwar ta wulakiya te megweɗ dapa leŋgesl takwar: “Papaŋ ta papaŋ taciya sə, Abəraham” bay. Aŋga, eve metehwe ana ya gwaɗakwar, dapa kekeŋ hay nesey, Zlav aŋga ava gədaŋ ɓa ta mavana wudeh kad Abəraham.

¹⁰ Jan maləmada daha ka ta ŋgal wudez hay dəga dapa slaslalay ana. Wudez wula wula fakwan masa e hey wudiya ana mambəla ana aabay sə, aca ŋgəla avəda, aca kazlaɗ pa kwakwaw.»

Beetem ta yam va ta kwakwaw

¹¹ «Yey sə, ya ŋgakwar beetem dapa yam masa e ŋguzdek akwar ka ŋgwada rav takwar. Amaa nda masa e te dek ava dəɓa taaɗaw sə, e fəniyey ava gədaŋ, kwa ka ta cəkwan tahkar dapa sek tata sə, ya husa bay. Aŋga sə, a ta ŋgakwar beetem dapa Mesfen Mavəna va dapa kwakwaw.

¹² Aŋga ava daram ta mapav jene dapa ha, a ta faɗ gədak tata a da hal bəley tata kad pa wuda, amaa sləɗa sə, a kuyaɗ pa kwakwaw masa a ta məc aabay katar ka midakw.»

Beetem te Yesu

¹³ Dapa ŋgesey ana, Yesu ke zleftek dapa vavara te Gelile ke də kad wayam te Zurdeŋ vara Zaŋ Baatis, a da ŋgana beetem.

¹⁴ Amaa Zaŋ Baatis a wal maŋgana beetem ana bay, ka gwaɗa, gege: «Away! Me te ŋgiyey beetem sə, sesəker kaa, naa kaa, ke dek kad vereyey sə, memey?»

¹⁵ Amaa Yesu ka vahan, gege: «Kəsaw təlam nesey, ara nesey masa a da ladandaw te meŋgə jə masa aŋga eve cəvey ana fakwanay.» Ara nesey, Zaŋ ka kəs maŋgana beetem.

¹⁶ Dapa masa Yesu ka ŋgata beetem cay, a daɓa dapa yam kad a vəda. Faŋga faŋga ana, slam da wudam ke wuney, ka wala Mesfen ta Zlavay e bəreŋgek da wudam ara mahwɗagwam, a njah fətiya.

¹⁷ Uway ke cənek da baymaləvaŋ, ke gweɗ, gege: «Nda nesey sə, aŋga Wat aɗaw masa ya waya elehey. Aŋga masa ke wefiyey ta mayahiya.»