Mata 28 - Ma Majawa Waya

Yesu aŋga dapa jəv ɓasabay

¹ Ava dəɓa ta pas ta masasak vaw te Zuwef hay, dapa mezler ta manah macaaca ana ta hwaɗ ta luma, Maaray ta Magədala va Maaray leŋgeɗey, ec ke dey ka ta wuzaɗ jəvay.

² Faŋga faŋga ana vavara ka ɓəla vaw ava gədaŋ, maskəla ta Bay Mazlakava ke bəreŋgek da baymaləvaŋ, ka tatalama beelem mazlakava da ma ta jəvay ana avəda, ka njahata a yaŋ ana.

³ Maskəla ana e weɗ ara mewecəkeɗ ta yam, rəkwat tata e weɗ məsle ana ndeɗ ndeɗ ara gagəmay.

⁴ Kafaraŋ hay sə, zidaw ke keɗeceŋ, ec ke kekeslə kpar kpar, ec ke tərec ara ndah maməca.

⁵ Amaa maskəla ana, ke gweɗec ŋgwazah sə, gege: «Akwa ŋgə zidaw bay, ya səniya, akwa yah Yesu masa ac ta dariya fa hap mazləlawa.

⁶ Aŋga fana aabay, afa ka pərakata dapa maməcay ara masa aŋga te gweɗey. Medekey, mawuzaɗa slam masa ac ta nahaɗ fətiya.

⁷ Akwar de veh zef ke te gweɗec ndah masasəraka jene tata, gege: “Ka pərakata dapa maməcay, ka ŋgəlakwaɗ ma kad Gelile, akwar ta wala sə, dərŋga”. Ma aɗaw kad akwar sə, nesey.»

⁸ Ŋgwazah sə, ac ka gərda jəvay ana ava mavas vaw. Ava zidaw dapa vaw teceŋ va meweslə dapa rav tec macəkuma bay sə, ac ka hway ka ta hwad labara ana kad ndah masasəraka jene tata.

⁹ Dapa cəvey, Yesu ka cə yaŋ eve eceŋ, ke gweɗefec, gege: «Ya gwaɗafakwar.» Ac ka ŋgucafa vaw, ac ka təhazaw pe sek eve mekekəred fəma tata.

¹⁰ Dapa ŋgesey ana, Yesu gege: «Akwa ŋgə zidaw bay, madaɗay me te sləfecen malama hay, aca ra daɗay e Gelile. Ac te weleyey sə, dərŋga.»

¹¹ Masa ac dapa cəv heley sə, kafaraŋ hay dərziya maɓəla jəvay ana, ec ke dey kad pe berne ke te sləfecen kad mazlakava hay ta ndaakwas hay jene hay masa ac ke ŋgə fakwanay.

¹² Eceŋ may, ava dəɓa ta macam yaŋ teceŋ eve mesnendə hay te Zuwef hay va ava dəɓa ta macə mamənak, ec ke vec səlay gaa kad kafaraŋ ana hay,

¹³ ava mamənak ana nesey: «Madaɗay, megweɗec kad ndana hay sə: “Ndah masasəraka jene tata ac ke dek ta vaɗ nesey, ac ka kəra avəda dapa masa anda njawaŋ”.

¹⁴ Daha gwevernel ka ta cəna ma ana sə, andə ta mbaca ma ana avəda, andə ta ŋgə jə masa ac da ŋgadakwar hahar bay.»

¹⁵ Kafaraŋ hay sə, ac ka kəs səlay ana, ec ke dey, ac ka ŋgaw ara masa ac te kəteceŋ. Maŋgal ma ana ŋgesey ka kwakwacata dapa taɓa te Zuwef hay kasl pəsna.

Yesu e zlerdec ndah masasəraka jene tata

¹⁶ Ndah masasəraka jene kuraw dapa yaŋ ana amta sə, ec ke dey e Gelile pa wudam masa Yesu te gweɗec ece re də kad pa.

¹⁷ Masa ac ta wala sə, ec ke kekəredey, amaa ndah mekele deveŋ eceŋ ac ka wulak yaŋ ecew ecew.

¹⁸ Yesu ke ŋgucefec vaw, gege: «Gədaŋ fakwanay da baymaləvaŋ va dapa vavara sə, aŋga mava kad yey.

¹⁹ Ara nesey, madaɗay, pa vavara hay fakwanay, metərec ndana hay ka ndah masasəraka jene taaɗaw. Meŋgec beetem dapa mezel ta Zlav Papaŋ, ta Wudiya va te Mesfen Mavəna,

²⁰ mesesərekecen manah yaŋ kad pe jə masa ya ta vakwar cəv ta maŋgiya fakwanay. Yey sə, ya ava akwar pas fakwanay kasl pe mendəv ta vavara.»