Mata 26 - Ma Majawa Waya

Maləmad vaw ta matəhaz Yesu

¹ Masa Yesu ka ndəvda mesesərekey ana hay fakwanay cay, ke gweɗec ndah masasəraka jene tata, gege: «Akwa səniya, manah ecew fana sə, macunam ta Pak cay.

² Ac ta vana Wut ta nda avəda ke te der fa hap mazləlawa.»

³ Mazlakava ta ndaakwas hay va mesnendə hay te Zuwef hay ac ka kwas vaw da way ta Kayfas, mazlakava ta ndaakwas hay.

⁴ Ac ka cacala ma dapa taɓa teceŋ ta matəhaz Yesu eve wewer ke te kəɗey.

⁵ Ec ke gweɗ, gege: «Anda ta təhazakwa dapa macunam na bay, afa ndana hay ac ta ŋgə baazlam hay.»

Macah mal fə yaŋ te Yesu da Betani

⁶ Yesu aŋga da Betani da way ta Simaŋw, nda meskwelme.

⁷ Ŋgwaz ɓa ka ŋgucafa vaw ava kwalaba ta albaatəra aŋga manəha ava mal te meŋgeŋgəzey masa e husem bay. Ka cəhan fə yaŋ te Yesu dapa masa a ndə ɗaf.

⁸ Ndah masasəraka jene tata aca wala ara nesey sə, ke zəmec fa rav, ec ke gweɗ, gege: «Manas jeŋ ana ara nesey sə, mafay te mey?

⁹ Anda zlafakwaɗ mahusamda səlay gaa, mevecen səlay ana kad maslamarga hay!»

¹⁰ Yesu ka səna mawulak yaŋ tec avəda, gege: «Akwa ŋgada hahar kad ŋgwaz ana mafay te mey? Mezlər masa aŋga ta ŋgiya kad yey nesey sə, mezlər mambəla ana,

¹¹ afa maslamarga hay sə, ac ta njah ava akwar cəɗem cəɗem, amaa yey sə, ya ta njah ava akwar cəɗem cəɗem aabay.

¹² Ava macah mal te meŋgeŋgəzey ana nesey kad fa vaw aɗaw sə, e ŋgə a ləmadawa mepəsehey aɗaw.

¹³ Eve metehwe ana ya gwaɗakwar, kwa vəla vəla masa ac ta bəzad Labara mambəla ana dapa vavara fakwanay sə, ac ta kar maɗay ta masənafa ŋgwaz ana da yaŋ jə masa aŋga ta ŋgiya nesey.»

Zudas a və Yesu kad maslagəra tata hay

¹⁴ Ara nesey, nda amta deveŋ ndah masasəraka jene kuraw dapa yaŋ ecew, mezel Zudas Iskariyawt, ke dey vara bay hay ta ndaakwas hay.

¹⁵ Ke gweɗ, gege: «Akwa wal meviyey sə, mey, masa ya ra ta vakwaɗ Yesu ana?» Ac ka ŋgəfana yam ta səlay kwakwar mahkar.

¹⁶ E zler pəsaŋga ana ŋgesey, Zudas ka yah pas mambəla ana te mevecen Yesu.

Maləmad ɗaf ta macunam ta Pak

¹⁷ Manah macaaca ana ta macunam te peŋ masa is dapa aabay sə, ndah masasəraka jene ec ke dey, ka ta gwaɗa Yesu, gege: «Ka wal anda ra ta ləmadakaɗ ɗaf ta macunam ta Pak sə, dama?»

¹⁸ Yesu gege: «Madaɗ pe berne vara vəre sə, ma ta gwaɗa Nda masasəraka nda ke gweɗ, gege: “Pas aɗaw aŋga hukw cay. Ya ta ŋgə macunam ta Pak ava ndah masasəraka jene aɗaw sə, da way takaa.”»

¹⁹ Ndah masasəraka jene tata sə, ac ka ŋgaw ara masa aŋga te gweɗeceŋ, ac ka ləmada ɗaf ta macunam ta Pak ana.

Yesu a ŋguzad nda ma ta husamda

²⁰ Mehusek ta fakwaɗ, Yesu ka njah ava ndah masasəraka jene tata kuraw dapa yaŋ ana ecew ka ta ndə ɗaf.

²¹ Dapa masa aca ndə ɗaf, ke gweɗ, gege: «Eve metehwe ana, ya gwaɗakwar nda amta deveŋ akwar e te veneyey avəda pa ha ta ndana hay.»

²² Ma ana nesey ke məcecen vaw ta ndah masasəraka jene avəda, kwa waawa ka gwaɗa, gege: «Bay Mazlakava, yey geyey?»

²³ Ke vehecen, gege: «Me te veneyey pa ha ta ndana hay sə, nda masa anda tal ha pe perentey amta ava aŋga nesey.

²⁴ Wut ta nda sə, cama a ta məcata ara masa mavinda da yaŋ aŋga. Amaa marga a ta ŋgatafa nda ma ta viya pa ha ta ndana hay nesey. Nda ana ŋgesey sə, zuwan aŋga te heyek bay.»

²⁵ Zudas, nda ma ta vana Yesu pa ha ta ndana hay sə, ka nəkafa may, gege: «Raabi, ma ta vanakaa pa ha ta ndana hay sə, yey geyey?» Yesu ka vahan, gege: «Kaa ana, ke te gweɗey.»

Ɗaf Mavəna metekweɗ ana

²⁶ Dapa masa aca ndə jene, Yesu ka kəs peŋ, ava dəɓa ta maŋgana wasay Zlavay, ka ŋgəla, ke vecen ndah masasəraka jene tata, ke gweɗ, gege: «Makəsaw, mandaw, nesey sə, vaw aɗaw.»

²⁷ Ka kəs kwap, ava dəɓa ta maŋgana wasay Zlavay, ke veceney eve megweɗ, gege: «Masaw akwar fakwanay,

²⁸ afa nesey ana sə, bembez aɗaw. Bembez ta madərazl ma, masa aŋga macəha mafay ta ndana hay gaa, mafay ta mapal mebər hay.

²⁹ Eve metehwe ana ya gwaɗakwar, kwa ya ta sə yam te rezeŋ nesey ɓasabay kasl pa pas masa ya ta siya ava akwar saya dapa Wunam ta bay ta Papa.»

Maslaf macə ma te Piyer

³⁰ Ava dəɓa ta maslə law hay dapa Jaabura, ec ke tep fa ŋguɗa ta Awliviyey hay.

³¹ Ara nesey, Yesu gege: «Ta vaɗ nesey, akwar fakwanay, akwar te gərdeyey, afa mavinda dapa Ɗelewer mavəna, gege: “Ya ta kəɗa gwala jene avəda, bakw ta təmak ana hay ec te kwekwececeŋ.

³² Amaa daha ya ka ta pərakata dapa maməcay cay sə, ya ta ŋgəlakwaɗ ma kad Gelile.”

³³ Piyer ka kəs ma, ka gwaɗa, gege: “Kwa daha ndah dərziya fakwan aca gərdakaa, taaɗaw sə, kwa ya ta gərdakaa aabay.”

³⁴ Yesu ka gwaɗa, gege: “Eve metehwe ana ya gwaɗakaa, ta vaɗ ana nesey, wagaa balaŋgwaz a ta ŋgal uway sə, ke ke cefiyey ma cay dəɓa mahkar.”

³⁵ Piyer ka gwaɗa saya, gege: “Kwa daha mapa andə da məc ava kaa sə, ya ta cafakaa ma aabay.” Ndah masasəraka jene dərziya ece gweɗ ara aŋga ana.»

Yesu a cə mbahw de Gecemeney

³⁶ Ara nesey, Yesu va ndah masasəraka jene tata aca husa pa slam ɓa mezel Gecemeney, gege: «Manjah fana dapa masa ye te dey pe mecek mbahw fatay.»

³⁷ Ka kəs Piyer va wedeh te Zebede cuweeney. Faŋga faŋga ana, vaw tata ka zlar maməcay va rav ke bəzlewey.

³⁸ Ara nesey, gege: «Vaw aɗaw ka məcata kusaf, ya wala ara ya ta maməcay. Manjaha fana va manjah eve ndey eve yey.»

³⁹ Ka ŋgəla vaw kusetke, ke kekəredey, dəŋgaɗ dac fa vara, ka cə mbahw eve megweɗ, gege: «Papa, daha efes e ŋgey sə, a lada kwap ta marga nesey da ŋgəla vaw dəreŋ eve yey. Amaa ŋgaw ara masa ka ta waya, bəna ara masa ya ta waya bay!»

⁴⁰ Kem veh kad vara ndah masasəraka jene mahkar sə, e ŋgetefec ac dapa waŋ. Ka gwaɗa Piyer, gege: «Akwar ka ŋgat gədaŋ ta manjah eve ndey kwa da hwaɗ te ler amta eve yey aabay war geyey!

⁴¹ Manjah eve ndey va macə mbahw, afa akwar de təɗ kad pa matimaazlaɓ te jə mafəca nda bay. Rav sə, a hwar meŋgə jə mambəla ana, amaa vaw sə, aŋga eve bəle.»

⁴² Ke veh ke ecew ana saya, ka ŋgəla vaw zəŋgaɗa, ka cə mbahw, eve megweɗ, gege: «Papa, daha kwap ana a zlafa maŋgəla vaw bay cama ya da siya sə, a lada jə masa ka waya sə, da ŋgata.»

⁴³ Ava dəɓa ana, ke veh saya, ke ŋgetefec ac dapa waŋ jaŋgata, afa waŋ ke fənec fa gədaŋ.

⁴⁴ Ke gərdeceŋ, ka ŋgəla vaw zəŋgaɗa saya mamahkar ana ka ta cə mbahw, a ciya ara macaaca ana jaŋgata.

⁴⁵ Ke veh kad vara ndah masasəraka jene, gege: Təlam nesey, manjaɓa waŋ, masasakaɓa vaw! Mawala, ler masa ac ta paɗ Wut ta nda pa ha ta ndah te mebərey sə, ka husakata cay.

⁴⁶ Mezleftek, amcakwa! Nda me te veneyey pa ha ta ndana hay sə, ka husakata cay.

Metəhez te Yesu

⁴⁷ Masa Yesu aŋga dapa megweɗ heley sə, Zudas, nda amta deveŋ ndah masasəraka jene kuraw dapa yaŋ ana ecew e husekey, ac ava ndana hay gaa, ece dekey ava kafaya va gada fa ha fa ha. Mezlərekec mazlakava hay ta ndaakwas hay va mesnendə hay ta tərsam te Zuwef hay.

⁴⁸ Zudas, nda ma ta vana Yesu pa ha ta ndana hay sə, ke vec meɗel jene, gege: «Nda masa ya ta gwaɗafa ava mahumbat vaw sə, ŋgesey, aŋga ana, matəhazaw.»

⁴⁹ Mahusa tata a cak te Yesu sə, ka gwaɗafa, gege: «Raabi, ya gwaɗafakaa!» Ka humbataw.

⁵⁰ Yesu ka vahan, gege: «Guula aɗaw, jə masa ka wal maŋgiya sə, ŋgaw ke zef!» Ara nesey, ndah dərziya, ac ka ŋgucafa vaw Yesu, ac ka təhazaw.

⁵¹ Nda amta deveŋ ndah masasəraka jene faŋga, pat e seɗek kafaya tata kad a vəda, cərahan zləmay ta nda maŋga mezlər ta mazlakava ta ndaakwas hay.

⁵² Amaa Yesu ka gwaɗa, gege: «Vahaɗ kafaya takaa pə way ana, afa ndah maŋga vəram ava kafaya sə, me te kəɗec kafaya ana.

⁵³ Ka wulakiya sə, ya zlafa manəkafa Papa e de zləriyey macam yaŋ ta maskəla hay maŋga vəram kuraw dapa yaŋ ana ecew təlam təlam nesey ke te jəniyey aabay geyey?

⁵⁴ Daha ara nesey, ma hay masa ac mavinda dapa Ɗelewer mavəna sə, ac de ŋgə gwagumaw? Ma ana, ke gweɗ, gege: “A lada de ŋgə ara aŋga ana.”»

⁵⁵ Dapa ŋgesey ana, Yesu ke gweɗec kad miya, gege: «Akwa dek kad vereyey ava kafaya va gada fa ha fa ha ke te təheziyey ara ya makar mapərasla nda sə, mafay te mey? Cəɗem cəɗem ya manjaha dapa Way ta kwakwas ke te sesərekec ndana hay, akwar ke təheziyey aabay.

⁵⁶ Amaa jeŋ ana fakwanay e ŋgə ara nesey sə, afa ara masa mavinda dapa ɗelewer ta ndah mehwedek ma sə, da ŋgata.» Ara nesey, ndah masasəraka jene fakwanay ac ka gərda, ec ke hweyeceŋ.

Yesu aŋga fəma ta mazlakava hay te Zuwef hay

⁵⁷ Ndah matəhaza Yesu sə, ac ka hwadaɗ a way ta Kayfas, mazlakava ta ndaakwas hay. Da way masa ndah mesesərekecen ma majawa kad ndana hay va mesnendə hay te Zuwef hay aca makwasa dapa.

⁵⁸ Te Piyer sə, ka cəp Yesu ana dəreŋ kasl pa zaŋ ta way ta mazlakava ta ndaakwas hay. Ke sehw a way ana, ka njah da cak ta ndah maŋga mezlər da way ana faŋga, a wal a da wala memeɗ te jə masa ac ta ŋgana kad Yesu.

⁵⁹ Anjəkar mazlakava hay ta ndaakwas hay va ndah maca mamənak te Zuwef hay fakwanay aca yah matə yaw ava maŋgal ma da yaŋ Yesu ta majawiya ke te kəɗey.

⁶⁰ Amaa ndah mata yaw hay gaa ec ke ŋguzdek yaŋ ta maŋgəlafa ma sə, ac ka ŋgataw aabay. Mamaɗ yaŋ ana sə, say ndah ecew ɓa te ŋguzdek yaŋ,

⁶¹ ec ke gweɗ, gege: «Nda ana nesey ke gweɗ, gege: “Ya zlafa mambəɗa Way ta kwakwas ta Zlav avəda, ya lama avəda dapa manah mahkar.”»

⁶² Mazlakava ta ndaakwas hay ke zleftek ka gwaɗa Yesu, gege: «Kaa sə, ka ava ma te megweɗ aabay war geyey? Ndah ana nesey, aca cafakaa lalaw sə, da yaŋ mey?»

⁶³ Amaa Yesu manjaha teete. Mazlakava ta ndaakwas hay sə, ka gwaɗa saya, gege: «Ya kəɗakaa ha eve mezel ta Zlav masa aŋga eve ndey, gwaɗandaw eve membəɗey daha kaa sə, ka Kəristi, Wut ta Zlavay.»

⁶⁴ Yesu ka vahan, gege: «Ka ka gwaɗa cay. Amaa, ya gwaɗakwar, maayaŋ kad fəma kusetke sə, akwar ta wala Wut ta nda manjaha da ha ta zam ta Zlav masa aŋga ava gədaŋ mazlakava va masa e dek da yaŋ zlav ta yam hay da baymaləvaŋ.»

⁶⁵ Dapa ŋgesey ana, mazlakava ta ndaakwas hay sə, kəzar! A ŋgar rəkwat tata hay, e gweɗec ndah faŋga sə, gege: «Ka lafa Zlav avəda. Anda walakwa nda mata yaw mekele sə, ɓasabay. Naa akwar ka cəna masa a laf Zlav sə, biba!

⁶⁶ Təlam na mawulak yaŋ takwar gwagumaw?» Ac ka vahan, gege: «Aŋga mak te mekəɗey ka macəhwandaw.»

⁶⁷ Ac ka cəɓafa slesleɓ fe ndey, ac ka kəɗaw. Ŋgeɗ hay, ac ka darana ha darzləmay.

⁶⁸ Ac ka gwaɗa, gege: «Ŋguzdandanay, daha kaa sə, ka Kəristi, gwaɗandaw, makəɗakaa na wa?»

Piyer a cə ma fa Yesu

⁶⁹ Anjəkar Piyer aŋga manjaha dapa zaŋ ta ma ta way da vəda. Dəm maŋga mezlər da way ana faŋga ɓa, ka ŋgucafa vaw Piyer, ka gwaɗa, gege: «Kaa may, naa ka ka njah ava Yesu nda Gelile antisey!»

⁷⁰ Amaa Piyer ka cə ma fa yam te ndey ta ndana hay fakwanay, gege: «Ya san jə masa ka wal megweɗ na bay.»

⁷¹ Ara masa e dey kad fəma ta way mazlakava, dəm maŋga mezlər mekele ɓa saya ka wala, ke gweɗec ndah faŋga, gege: «Nda nesey sə, ka njah ava Yesu nda Nezeret antisey.»

⁷² Piyer ka cə ma saya eve membeɗey, gege: «Ya san nda ana anti bay.»

⁷³ Ava dəɓa ana kusetke saya. Ndah faŋga sə, ac ka ŋgucafa vaw, ac ka gwaɗa Piyer, gege: «Metehwe ana, kaa sə, ka nda amta deveŋ eceŋ, afa ɗaf ta ma takaa e ŋguzdek sə, ka deveŋ eceŋ.»

⁷⁴ Ara nesey, Piyer dəɗa! E mbeɗ, gege: «Ya san nda ana bay, daha ya ŋgal ma sə, Zlav de gwederiyey avəda!» Dapa ŋgesey ana, balaŋgwaz ka zlar maŋgal uway.

⁷⁵ Ma masa Yesu ka gwaɗa Piyer sə, ka hwana pə yaŋ, afa Yesu ana ka gwaɗa, gege: «Wagaa balaŋgwaz a ta ŋgal uway sə, ke ke cefiyey ma cay dəɓa mahkar.» Piyer ndal, a daɓa kad a vəda, ka kuɗa macəkuma bay ava mazal marava.