Mata 24 - Ma Majawa Waya

Yesu a slaf membeɗ ta Way ta kwakwas

¹ Yesu ka dakata a vəda dapa Way ta kwakwas, dapa masa a daɓa, ndah masasəraka jene tata ac ka ŋgucafa vaw ka ta ŋguzdan meteh te melem ta Way ta kwakwas.

² Ara nesey, Yesu ka kəs ma, gege: «Akwa wala jene hay fakwan na biba? Eve metehwe ana, ya gwaɗakwar, way nesey sə, kwa kekeŋ e te zek da yaŋ kekeŋ aabay. Ac ta mbəɗa avəda fakwanay.»

³ Ara masa Yesu aŋga manjaha fa ŋguɗa ta Awliviyey hay, ndah masasəraka jene ac ka ŋgucafa vaw babəla teceŋ, ka ta nəkafa, gege: «Gwaɗandaw, jeŋ ana e te ŋgə ewey? Me te ŋguzdek pas te medek takaa va mendəv ta vavara sə, jene mey?»

Mezler ta marga hay ta vavara

⁴ Yesu ke vehecen, gege: «Mepə leŋgesl, a lada kwa ndana da zlakdakwar bay,

⁵ afa ndana hay gaa ec te dekey eve mezeley aɗaw, ec te gweɗ, gege: “Yey sə, ye Kəristi”. Ara nesey, ec te zlekdec ndana hay gaa.

⁶ Akwar ta cəna labara ta vəram hay mezef ana va labara ta vəram hay masa dereŋ ava akwar. Map leŋgesl! A kwar te kekesl bay. A lada jeŋ ana ŋga da ŋgata ɗagay, amaa ŋgesey ana sə, mendəv ta vavara bay heley,

⁷ afa tərsam ŋgeɗey a ta ŋgə vəram ava tərsam leŋgeɗey, bay ta wunam ŋgeɗey a ta ŋgə vəram ava bay ta wunam leŋgeɗey. May e te ŋgə dapa slam hay mekele mekele va vavara a ta ɓəla vaw.

⁸ Jeŋ ana hay fakwanay nesey, ec te ŋgə ara mezler te mehec hay te mesəfey.

⁹ Dapa ŋgesey, ac ta paɗakwar pa ha ta ndana hay, ac ta ŋgadakwar hahar, ac ta kəɗakwar avəda cukw cukw. Tərsam hay fakwanay ac ta walakwar fe ndey bay mafay taaɗaw.

¹⁰ Dapa pas ana hay ŋgesey, ndana hay gaa ac ta gərda makəsparav. Ac ta vana malamaŋ tec hay avəda amta amta ke te kəɗey, ac ta wala ndey fa vaw tec bay.

¹¹ Ndah mapana yaŋ tec ka ndah mehwedek ma gaa ec te dekey, ec te zlekdec ndana hay mabay.

¹² Meŋgə suwe e te zlezləney fəma fəma, mawal vaw a ta taslata dapa ndana hay gaa.

¹³ Amaa nda masa ka sasala vaw kasl pe memeɗey ana sə, a ta mbəlata.

¹⁴ Labara mambəla ana da yaŋ Wunam ta bay sə, a ta ŋguzdata dapa vavara fakwanay, afa ndah masa aca sən Zlav bay aca ra ŋgat matə yaw da yaŋ ana. Ara nesey, mendəv ta vavara e te dekey.»

Marga mazlakava

¹⁵ Yesu ke gweɗec saya, gege: «Pas masa akwar ta wala: “Jə masa a ndara nda magədasa jene”, dapa slam mavəna ara masa nda mehwedek ma Deniyel te gweɗey sə, a lada nda majaŋga ma ana da cəna mambəla ana.

¹⁶ Dapa ŋgesey ana, ndah masa ac ta njah dapa vavara te Zudey aca ra hwaɓa kad pa wudam hay.

¹⁷ Nda masa a ta sasak vaw da yaŋ way tata sə, e te bəreŋgə ke te kəs jene da hwaɗ ta way bay.

¹⁸ Nda masa e te də kad ley sə, e te veh kad wunam ka ta kəs rəkwat tata bay.

¹⁹ Wabaw kad ŋgwazah ava hwaɗ va ŋgwazah masa ac ava wudeh masa aca sə wa dapa manah hay ana ŋgesey.

²⁰ Macə mbahw kad Zlavay, afa mahway takwar ana e de ŋgə dapa kiya te memeɗ bay, kwa dapa pas ta masasak vaw te Zuwef hay bay,

²¹ afa dapa pas ana ŋgesey, marga mazlakava ana e te ŋgey. Marga ana nesey, ke ŋgə dəga mezler ta vavara kasl pəsana nesey sə, aabay heley, e te ŋgə ava dəɓa ana ara nesey sə, ɓasabay.

²² Daha Zlav ka vahafa pas ana hay ŋga aabay sə, kwa nda amta e te zek eve ndey aabay. Amaa Zlav a ta vahafa pas ana hay ŋgesey sə, mafay ta ndah masa aŋga te peleceŋ.

²³ Ara nesey, daha ndana a gwaɗakwar: “Kəristi sə, aŋga kana”, daha aabay “aŋga katay” sə, akwar ta kəsiya bay.

²⁴ Eve metehwe ana ya gwaɗakwar, ndah mapana yaŋ tec ke Kəristi va ndah mapana yaŋ tec ka ndah mehwedek ma, ec te təhekey. Ac te ŋgə cah hay mazlakava va jə marəzla nda hay ka ta zlak ndana hay. Daha e ŋgefeceŋ sə, kwa ndah masa Zlav ke peleɗec ha, ec te zlekdeceŋ.

²⁵ Mawala, ya ka gwaɗakwaɗ ma ana ha dəga təlam nesey.»

Mevehek ta Wut ta Nda

²⁶ Daha aca gwaɗakwar, gege: «Aŋga kana fana dapa yaŋ ta səɓak sə, akwar ta də bay. Daha aabay Aŋga maraɓa fana sə, akwar ta kəsiya bay.»

²⁷ Ara masa mewecəkeɗ ta yam te ŋgek dapa dar e weɗ kasl a ma ta wudam, ara aŋga ana e te ŋgə eve medek ta Wut ta nda.

²⁸ Dapa slam masa jene maməca ɓa sə, mandasltabay hay aca kwas vaw faŋga.

²⁹ Faŋga faŋga ava dəɓa ta marga dapa pas ana hay ŋgesey, pas a ta tərata ləvaŋ, kiya e te weɗ ɓasabay, menjewzle hay ec te kwiyekec da baymaləvaŋ kad fa vara, gədaŋ hay mazlakava da baymaləvaŋ ac ta ɓəla vaw.

³⁰ Ara nesey, jə me te ŋguzdek medek ta Wut ta nda sə, e te təhek da baymaləvaŋ. Ara nesey tərsam hay dapa vavara fakwanay ac ta kəɗ rav. Ac ta wala Wut ta nda e te dek da yaŋ zlav ta yam da wudam manəha ava gədaŋ mazlakava va membeɗey.

³¹ Dərem mazlakava ana e te fətey, ara nesey, Zlav e te zlerdec maskəla tata hay kad dərgazlav hay faɗanay ke te kwesekec ndah masa aŋga te peleɗec ha ka ndah tata.

³² Macəna ma da yaŋ mesesərek ta ma maɗəva ava maftay. Daha masa akwa wala maftay maɗa, e zerɗek deslesle sə, ŋgesey akwa səniya kiya te medə kad ley hwak cay.

³³ Ara aŋga ana akwar may, daha akwa wala jeŋ ana hay fakwanay ece ŋgə ara nesey sə, ŋgesey masəna, Wut ta nda aŋga hukw te mevehek cay, aŋga fəma ta way takwar hay.

³⁴ Eve metehwe ana ya gwaɗakwar, jeŋ ana hay fakwanay nesey ec te ŋgec ɗagay, wagaa ndana hay ta pəsana, ac ta məcay.

³⁵ Slam da baymaləvaŋ va vavara sə, ec te ndəveceŋ, amaa ma aɗaw hay ec te ndəv aabay.

Ndana masən pas ana aabay, manjah eve ndey

³⁶ «Amaa pas ana va ler ana sə, ndana masəniya aabay, kwa Maskəla hay da baymaləvaŋ, kwa Wudiya, kwa ndana masən pas ana aabay, masəna pas ana sə, say Zlav Papaŋ, pal amta.

³⁷ Jene hay masa ec ke ŋgey dapa pas te Nuwe sə, ac te ŋgə ara aŋga ana dapa pas te mevehek ta Wut ta Nda,

³⁸ afa ara masa jeŋ ana hay ac ke ŋgey wagaa yam mazana vavara e te ŋgey, dapa pas ana hay ŋgesey, ndana hay aca ndə jene, aca sə jene, aca kəs ŋgwaza hay, aca və dehw tec hay kad way ta mawal kasl pa pas masa Nuwe te sehw pa kaslkaslah,

³⁹ kwa ndana masəna jə masa e te ŋgetefeceŋ sə, aabay kasl pa pas masa yam mazana vavara te ŋgey, ke həlec avəda fakwanay. Pas te mevehek ta Wut ta nda sə, e te ŋgə ara aŋga ana.

⁴⁰ Pəsaŋga ana ŋgesey, daha ndah ecew ec de ley, nda amta a ta kəsata, nda leŋgeɗ a ta gərata.

⁴¹ Daha ŋgwazah ecew ac ta hayə daw fe ləgeŋ amta sə, ŋgwaz amta a ta kəsata, ŋgwaz leŋgeɗ a ta gərata.

⁴² Ara nesey, manjah eve ndey, afa akwa san pas ana wula masa Bay takwar Mazlakava e te vehek sə, bay.

⁴³ Akwa səniya, daha bay ta way a san ler masa makar e te dek kad way tata ta vaɗ sə, a ta njah eve ndey, a ta pəlan ma ta makar ana da zləlan way tata aabay.

⁴⁴ Mafay ana, akwar may, maləmada vaw mambəla ana, afa Wut ta nda e te vehek sə, fe ler ana masa akwar ka wulakaw aabay ŋgesey.»

Nda maŋgana mezlər eve cəvey ana

⁴⁵ Nda maŋgana mezlər eve cəvey ana va masa aŋga eve leŋgesl sə, wa? Nda ana sə, aŋga nda masa bay ta way tata ka paɗ ka nda mapana ndey fa ndah maŋga mezlər da hwaɗ ta way tata ke te vec jə ta manday daha pas ana ka husakata.

⁴⁶ Mapəsma ɓa kad nda maŋga mezlər masa bay ta way tata e te vehekey, a ta ŋgatafa aŋga dapa meŋgə mezlərey ana.

⁴⁷ Eve metehwe ana ya gwaɗakwar, bay ta way ana, a ta paɗ a yaŋ zleley tata hay fakwanay.

⁴⁸ Amaa daha nda maŋga mezlərey ana aŋga eve suwe, a wulakiya dapa rav tata, gege: «Bay ta way aɗaw ana, e te vek zef aabay»,

⁴⁹ ara nesey, a zlar meŋgedec marga kad ndah maŋga mezlər hay ara aŋga, a ndə jene, a sə wuzam ava ndah makwa ana hay.

⁵⁰ Bay ta way ta nda maŋga mezlərey ana ŋgesey, e te vehek sə, dapa pas masa nda maŋga mezlərey ana ka wulakaw aabay va fe ler masa a səniya bay.

⁵¹ A ta mbasana, a ta ŋgada marga masa e teh teh bay, a ta vana meyev tata ara ta ndah masa neneŋ dapa ma ecew. Dapa faŋga sə, makuɗa hay va mapaɗ zleŋ hay.