Mata 16 - Ma Majawa Waya

Jene hay ta maɗal pas hay

¹ Farisa hay va Saaduki hay ac ka ŋgucafa vaw Yesu ka ta ŋgayiya. Ac ka nəkafa e de ŋgə cah masa e ŋguzdek aŋga sə, e dek da vara Zlavay.

² Yesu ke vehecen, gege: [«Ta fakwaɗ masa akwa wala dərgazlav gagaza ana sə, akwa gwaɗa: “Tedew yam a ta slə aabay”.

³ Te pərek masa akwa wala dərgazlav magəda ana ɓekɓek sə, akwa gwaɗa: “Pəsana yam a ta slay”. Daha akwa pe ndey kad baymaləvaŋ, akwa sən jə masa e te ŋgey. Amaa jene hay masa ece ŋgə təlam nesey sə, akwa sən ma da yaŋ ana masa aca wal megweɗ bay sə, mafay te mey?]

⁴ Ndah pəsna nesey ac mambəla ana hay aabay, ac ndah maŋga mezlər eve cəvey ana aabay kad Zlavay! Aca nək cahay, amaa aca ŋgat mawala cahay ana aabay, say cah masa ke ŋgə ava Zawnas, nda mehwedek ma.» Ke gərdec faŋga, ka data.

Is ta Farisa hay

⁵ Dapa medə tec jaka luwa leŋgeɗey te təker mazlakava sə, ndah masasəraka jene ac ka sənafa mahəl peŋ sabay.

⁶ Yesu gege: «Mepə leŋgesl fa is ta Farisa hay va ta Saaduki hay!»

⁷ Dapa ŋgesey ana, ndah masasəraka jene tata aca wulakiya, ece gweɗ dapa taɓa tec, gege: «E gweɗ ara nesey sə, afa andə ka kəsakakwa peŋ aabay.»

⁸ Amaa Yesu ka səna mawulak yaŋ tec avəda, gege: «Akwar ndah masa makəsparav pahata. Akwa gweɗ dapa taɓa takwar, masa “andaw ke kəsek peŋ aabay” sə, mafay te mey?

⁹ Akwar ka cəna ma da yaŋ ana aabay suwar geyey? Akwa sənafa peŋ zlam masa ya ta vəniya kad ndah bakatar zlam sə, biba. Naa akwa həlek mezekey ana waŋ hay manəha ecuwey?

¹⁰ Kwa peŋ tasəla masa ye te vənecen kad ndah bakatar faɗ, akwa həlek mezekey ana waŋ hay ecuwey?

¹¹ Dapa masa ya gwaɗakwar: “Mepə leŋgesl fa is ta Farisa hay va ta Saaduki hay” sə, ŋgesey, ye gweɗ da yaŋ peŋ bay. Naa, akwa cəna bay sə, a ŋgana gwagumaw?»

¹² Ara nesey, ndah masasəraka jene ac ka cəna masa anjəkar e gweɗec da yaŋ mepə leŋgesl fa is te peŋ hay sə, bay, amaa da yaŋ mesesərek ta Farisa hay va ta Saaduki hay.

Piyer e ŋguzdek Yesu sə, aŋga Wut ta Zlavay

¹³ Mahusa te Yesu pa vavara ta Sizarey Fəlep. Ke nəkefec ndah masasəraka jene tata, gege: «Ndana hay aca pə Wut ta nda sə, ka wa?»

¹⁴ Ac ka vahan, gege: «Ndana hay aca pakaa ka Zaŋ Baatis, ndah dərziya aca pakaa ka Eli. Ndah mekele, aca pakaa ka Zeremi, daha aabay, ndah mekele saya aca pakaa ka nda amta deveŋ ndah mehwedek ma hay.»

¹⁵ Ke gweɗec, gege: «Naa akwar may, akwa piyey sə, ka wa?»

¹⁶ Simaŋw Piyer ka kəs ma, ka gwaɗa, gege: «Ka Kəristi, Wut ta Zlav masa aŋga eve ndey.»

¹⁷ Yesu ka kəs ma, ke gweɗ, gege: «Mapəsma ɓa da yaŋ kaa Simaŋw, wut ta Zawnas, afa ma masa ke gweɗ nesey sə, ndana dapa slaw ta vaw ta ŋguzdakaɗ bay, amaa Papa masa aŋga da baymaləvaŋ.

¹⁸ Taaɗaw sə, ya gwaɗakaa eve metehwe ana, kaa sə, ka Piyer, ara megweɗey pəra. Da yaŋ pəra ana nesey, ya ta lam Macam yaŋ ta makəsparav aɗaw hay fətiya. Ara nesey, gədaŋ mazlakava ta maməcay sə, a ta ŋgana jene kwa kusetke aabay.

¹⁹ Ya ta vakaa kəle ta Wunam ta bay da baymaləvaŋ hay. Jə masa ka ta jawiya fakwanay dapa vavara nesey, a ta jawata ara aŋga ana da baymaləvaŋ may. Jə masa ka ta pəliya fakwanay dapa vavara nesey, a ta pəlata ara aŋga ana da baymaləvaŋ may.»

²⁰ Ara nesey, ke ɓeɓəcec ndah masasəraka jene tata, ac ta ŋguzda masa aŋga Kəristi sə, kad ndana hay bay.

Yesu a slaf maməc tata va mepərek tata dapa maməcay

²¹ E zler dapa pəsaŋga ana ŋgesey, Yesu Kəristi ka zlar ŋguzdecen kad ndah masasəraka jene tata, gege: «A lada ye dey e Zeruzelem, ye te ɓəsek marga te mesnendə hay te Zuwef hay, ta mazlakava hay ta ndaakwas hay va ta ndah mesesərekecen ma majawa kad ndana hay, ec de kəɗiyey avəda cukw cukw ka macəhwandaw. Amaa dapa manah mamahkar ana sə, ya ta pərakata dapa maməcay.

²² Piyer, gujahw! A zala ava zlalav, a ɓaɓəciya, gege: Away, Bay Mazlakava, Zlav da raɓdakaa, jeŋ ana ara na da ŋgatafakaa bay!

²³ Amaa Yesu pəla! A ŋgwadafa ma a gwaɗa, gege: Ŋgəliyey vaw fana da cak taaɗaw, kaa Saadan. Kaa sə, ka yah cəv te mezlekdeyey, afa mawulak yaŋ takaa nesey sə, e dek da vara Zlav bay, amaa mawulak yaŋ ta ndana hay.»

Cəv hay ta macəp Yesu

²⁴ Yesu ke gweɗec ndah masasəraka jene tata, gege: «Daha nda masa a wal mecəpiyey, a ta wulak yaŋ sə, fa yaŋ tata bay, a da zaɓ hap mazləlawa tata, e de cəpiyey,

²⁵ afa kwa waawa masa a wal maraɓaɗ mesfen tata ha sə, a zana avəda, amaa nda mazana mesfen tata mafay taaɗaw sə, a ta ŋgata avəda.

²⁶ Daha ndana ka ŋgat zleley hay ta vavara fakwanay, amaa ka zana mesfen tata avəda sə, zleley ana hay ac ta jəniya eve mey? Daha aabay jene mey masa ndana da viya te meyembeɗek mesfen tata avəda ava aŋga?

²⁷ Aŋga, Wut ta nda e te vehek ava maskəla tata hay dapa mehehəm ta Papaŋ. Pas ana ŋgesey, a ta pal meyəv te mezlər ta kwa waawa təɗe fe mezlər ta nda ana.

²⁸ Ya gwaɗakwar, deveŋ ndah masa ac fana, dərziya hay ac ta macə aabay, say ac ta wala Wut ta nda e te dek ara bay.»