Mata 14 - Ma Majawa Waya

Maməc ta Zaŋ Baatis

¹ Dapa manah hay ana ŋgesey, Herawt ka cəna ece gweɗey da yaŋ Yesu,

² ke gweɗec madərlam tata hay, gege: «Eve metehwe ana, nda ana nesey sə, aŋga Zaŋ Baatis. Aŋga sə, aŋga nda masa ka pərakakata dapa maməcay. Mafay ana, aŋga ava matimaazlaɓ te meŋgə cah hay.»

³ Herawt ana e gweɗ ara nesey sə, afa ka təhaza Zaŋ ana avəda, ka jawa, ka ɓəzlaɗ pa daŋgay mafay ta Herawdiyat, ŋgwaz ta malamaŋ Fəlep,

⁴ afa Zaŋ ka gwaɗa Herawt, gege: «Cəv mava kad kaa ta makəs Herawdiyat ka ŋgwazak sə, aabay.»

⁵ Herawt ka wal makəɗa Zaŋ ana avəda cukw cukw ka macəhwandaw, amaa e lel fa miya, afa ndana hay fakwanay aca pə Zaŋ ka nda mehwedek ma.

⁶ Dapa macunam ta masənafa pas te mehey ta bay Herawt sə, dem ta Herawdiyat ke gərev fəma ta ndah mazala. Megərvey ana ka wafa bay Herawt mabay,

⁷ ka hwadaɗ kasl pe membeɗ fa yam te ndey ta ndana hay, ta mavana kwa jene wula wula masa dem ana a ta nəkafa.

⁸ Ava mamənak ta mamaŋ, dem ana ka vahan kad Herawt, gege: «Vuwa yaŋ ta Zaŋ Baatis fana pe perentey.»

⁹ Manak jeŋ ana nesey sə, ka məcan vaw ta bay avəda kusaf. Amaa mafay te membeɗ tata va mafay ta ndah mazala sə, ka və cəv te medey ke te yehek yaŋ ta Zaŋ a da vanay.

¹⁰ Ka zlar ndana ke te ŋgəlek yaŋ ta Zaŋ Baatis dapa daŋgay.

¹¹ Ec ke kəsek yaŋ ana pe perentey, ac ka van dem ana. Aŋga may, ka hwadan mamaŋ.

¹² Ava dəɓa ana, ndah masasəraka jene ta Zaŋ Baatis ec ke dey, ac ka kəs macəhwandaw ana, ac ka pəsaha avəda. Ec ke dey ka ta sləfan labara ana kad Yesu.

Yesu e ndec ɗaf kad ndah bakatar zlam

¹³ Masa Yesu a cəna labara ana sə, pərtakaɗ! E zleftek, a daɓa faŋga kad pa kaslkaslah, e də ava zlalav pa slam masa ndana hay dapa aabay. Masa miya hay ac ka səna avəda sə, ac ka gərda wunam tec hay, ac ka cəpaw eve sek.

¹⁴ Mebəreŋgek tata dapa kaslkaslah sə, a wala miya maɓəca mabay. Mafay ana, metekwen ka ŋgana feceŋ, ke mbəlec ndah masa ac eve mehecey hay mekele mekele.

¹⁵ Mehusek ta fakwaɗ, ndah masasəraka jene ac ka ŋgucafa vaw, ac ka gwaɗa, gege: «Andakwa dapa səɓak. Asaya, pas ɓasabay, vehdec miya, aca ra daɓa kad pa wunam hay ka ta husamaɓa jə ta manday.»

¹⁶ Amaa Yesu gege: «Akwa wal aca ra vahaɓa sə, mafay te mey. Akwar ava yaŋ takwar ana, mevec jə ta manday.»

¹⁷ Ac ka gwaɗa, gege: «Magəra varandaw fana sə, peŋ zlam va kəlef ecew.»

¹⁸ Yesu gege: «Mehwedeken kad fana.»

¹⁹ Ava dəɓa ana, ke və cəv kad miya aca ra njah fa vara a yaŋ kəzeŋ hay. Dəlam! A kəs peŋ zlam va kəlef ecew sə, baŋgaɗana ndey kad a wudam, a ŋgana wasay Zlavay. Ka waca peŋ, ke vecen kad ndah masasəraka jene, ece re vənecen kad miya hay.

²⁰ Ac fakwanay ac ka ndaw mban. Ec ke ɓəcek mezekey ana hay, waŋ hay manəha kuraw dapa yaŋ ana ecew.

²¹ Anjəkar ndah masa ac ka ndaw sə, ece ŋgə mawulah bakatar zlam, ŋgwazah va wudeh maŋgəfa bay.

Yesu e də da yaŋ yam mafayakfayak ana

²² Faŋga faŋga ana, Yesu ke tetəkec ndah masasəraka jene ece re tep pa kaslkaslah, ece re zleŋ kamma fətiya kad luwa leŋgeɗey ta yam mafayakfayak ana. Aŋga sə, ka njahata ke te vehdec miya.

²³ Ava dəɓa te mevehdec miya sə, ka tapaɓa pə yaŋ ta wudam ka ta cə mbahw ava zlalav. Mehusek ta fakwaɗ, aŋga faŋga pal aŋga amta.

²⁴ Kaslkaslah sə, aŋga dəreŋ ava rav ta zazay, meŋgeŋgel ta yam a daŋgwafiya, afa memeɗ e dek dere eve eceŋ.

²⁵ Ta slamɓal te pərek sə, Yesu ke də eve sek kad vereceŋ da yaŋ yam mafayakfayak ana.

²⁶ Masa ndah masasəraka jene aca wala e dey da yaŋ yam mafayakfayak ana sə, ec ke ŋgə zidaw eve mekekesley, ec ke gweɗ, gege: «Antisey sə, nda te veɗ!» Dapa zidaw teceŋ ana, ac ka cə lalaw ava gədaŋ.

²⁷ Amaa, faŋga faŋga ana, Yesu gege: «Matəhaza rav, nesey ana sə, yey, akwa ŋgə zidaw bay!»

²⁸ Piyer ka gwaɗa, gege: «Bay Mazlakava, anjəkar daha kaa eve metehwe ana sə, viyey cəv ta madaɗ kad varakaa da yaŋ yam ana may.»

²⁹ Yesu ka gwaɗa, gege: «Dekey!» Piyer ke bəreŋgey dapa kaslkaslah, ke də eve sek da yaŋ yam kad vara Yesu.

³⁰ Amaa masa a wala memeɗ e ŋgey sə, zidaw ka ŋgana. Ka zlar mendərmeɗ kad pa yam, takw ana lalaw, gege: «Bay Mazlakava, mbəliyey!»

³¹ Faŋga faŋga ana, Yesu ka talana ha, ka təhazaw, ka gwaɗa, gege: «Hay, nda masa makəsparav tata pahata, ka wulak yaŋ ecew ecew sə, mafay te mey?»

³² Masa ec ke sehwec pa kaslkaslah sə, faŋga faŋga ana, memeɗ sə, ndeŋ! A həla ma.

³³ Ndah masa ac dapa kaslkaslah sə, ec ke kekəred fəma tata, ac ka gwaɗa, gege: «Anjəkar kaa sə, ka Wut ta Zlavay tehwe.»

Mambəl ndana hay de Genezeret

³⁴ Ava dəɓa ta mazlaŋgə yam mafayakfayak ana sə, ac ka husa pa vavara te Genezeret.

³⁵ Ndah dapa slam ana faŋga ac ka səna Yesu avəda. Ac ka slaf labara ana dapa vavara ana fakwanay. Ac ka hwadana ndah gwabay fakwanay.

³⁶ Ac ka ŋgana mbahw, e de gərdec ndah gwabay aca ra pafa ha ma ta rəkwat tata. Ndah fakwan mapafa ha ma ta rəkwat tata sə, ac ke mbəleceŋ.