Mata 12 - Ma Majawa Waya

Maŋgwah bəley

¹ Dapa pas ana ŋgesey, pas ta masasak vaw, Yesu ke dey jaka pe ley te bəley. Ndah masasəraka jene tata, mayə ke kəɗeceŋ, ac ka ŋgwah yaŋ te bəley ana hay ka ta nday.

² Masa Farisa hay aca wala sə, aca gwaɗa, gege: «Wala ndah masasəraka jene takaa aca ŋgə jə masa ma majawa ka və cəv ta maŋgiya pas ta masasak vaw aabay!»

³ Ke vehecen, gege: «Akwar ka jaŋgaw masa bay Deevet ta ŋgiya masa mayə ta kəɗa, aŋga va ndah tata hay sə, aabay geyey?

⁴ Ke sehw pə way ta Zlavay, ac ka ndə peŋ masa mava kad Zlavay masa kwa aŋga, kwa ndah tata cəv mava kad eceŋ ta mandiya aabay, say ndaakwas hay

⁵ Pas ta masasak vaw, ndaakwas hay maŋga mezlər dapa way ta kwakwas sə, aca nah yaŋ kad pa ma majawa ta pas ta masasak vaw aabay, anjəkar ac ke ŋgə mebər aabay sə, akwar ka jaŋgaw dapa ma majawa ta Muyiz aabay geyey?

⁶ Yaw, ya gwaɗakwar, jə mazlakava mafəna Way ta kwakwas ana sə, fana ɓa.

⁷ Efes daha akwar ka cəna ma masa a wal megweɗ: “Ya wal sə, metekwen fa ndana hay bəna, maŋgə kwakwas bay” sə, akwar ta zlafa metəɗec ma yaŋ ndah masa ac eve mebər aabay ŋgesey sə, aabay,

⁸ afa bay da yaŋ pas ta masasak vaw sə, Wut ta nda.»

Nda masa ha maməca

⁹ Yesu ke zleftek faŋga, ke dey, ke sehw pə Way ta macə mbahw te Zuwef hay.

¹⁰ Dapa way ana faŋga, ndana ɓa ha tata leŋgeɗ maməca. Ac ka nəkafa Yesu ka ta jawiya ava ma hay, gege: «Cəv mava ka ta mbəl ndana pas ta masasak vaw geyey?»

¹¹ Amaa Yesu ke vehecen, gege: «Ndana wa deveŋ akwar masa aŋga ava təmak pal amta, təmak ana ka kazlata pe veɗ mekweleleŋ ana pas ta masasak vaw sə, e dey, e kəsek avəda aabay sə, wa?

¹² Yaw, ndana sə, a fəna təmak ana eve mehehəm aabay geyey! Ara nesey, cəv ɓa te meŋgə jə mambəla ana pas ta masasak vaw.»

¹³ Ka gwaɗa nda masa ha tata maməca sə, gege: Telek ha takaa. Nda sə, ka talan ha ana. Ha sə, ləmadata pa slam ana ara ha leŋgeɗey.

¹⁴ Farisa hay sə, ndal! Ece də kad a vəda, ke te cek mamənak fətiya da yaŋ wewer hay ta makəɗiya.

Yesu, nda maŋga mezlər ta Zlavay

¹⁵ Masa Yesu ka cəna wewer tec da yaŋ ana avəda sə, ndal! A daɓa faŋga. Ndana hay gaa ac ka cəpaw, ke mbəlec avəda fakwanay.

¹⁶ Amaa ke ɓeɓəcec ndah ana, ac ta ŋguzda yaŋ tata kad ndana bay,

¹⁷ afa, masa Izay nda mehwedek ma te gweɗ zleezle sə, da ŋgata. Ke gweɗ, gege:

¹⁸ «Zlav ke gweɗ, gege: “Mawala, nda maŋga mezlərey aɗaw masa ya ka yahaɗha, aŋga nda masa ya waya elehey, ya ka yahaɗha eve mewesley. Ya ta paɗ Mesfeney aɗaw a yaŋ ana, afa e de ŋguzdecen meŋgə mezlər eve cəvey ana kad tərsam hay fakwanay.

¹⁹ A ta yah ma ava ndana aabay, a ta cə lalaw aabay. Ndana ma ta cəna uway tata dapa slam ta macam yaŋ hay aabay.

²⁰ A ta pasl ɓəlev majara ana sə, aabay. A ta məca petərla masa ndana a wala ara mbala a ta məcay sə, aabay, kasl pa pas masa aŋga ta hwadaɗ meŋgə mezlər eve cəvey ana pa bigula.

²¹ Vavara hay fakwanay ac ta pə mawulak yaŋ ta maŋgat jene jaka pe mezel tata.”»

Yesu va Belzebul

²² Ndana hay aca hwadana Yesu nda mahazlaw ana ɓa aŋga ava damkwaw dapa yaŋ, aŋga ɓaɓa. Yesu ka mbəla avəda. Nda ana, ke gweɗey, ka wala ndey saya.

²³ Ndana hay fakwanay ec ke rəzlec da yaŋ mezlər masa Yesu ta ŋgiya. Mafay ana, ec ke gweɗ, gege: «Nda ana nesey sə, aŋga wut te Deevet sə, aabay?»

²⁴ Amaa Farisa hay aca cəna ara nesey sə, ec ke gweɗ, gege: «Nda ana a mbas damkwaw hay sə, ava gədaŋ te Belzebul, bay ta damkwaw hay.»

²⁵ Yesu ka səna mawulak yaŋ tec avəda, gege: «Daha ndah dapa wunam ta bay amta aca ŋgə vəram dapa taɓa teceŋ, wunam ta bay ana a nasata. Daha ndah dapa berne, daha aabay da hwaɗ ta way kwa wula wula, ece ŋgə vəram dapa taɓa teceŋ, wunam ana, daha aabay hwaɗ ta way ana e zlec aabay.

²⁶ Daha Saadan a mbas Saadan sə, ŋgesey, a ŋgə vəram fə yaŋ tata. Daha ara nesey sə, wunam ta bay tata de zlec meemey?

²⁷ Naa daha yey, ya mbas damkwaw hay ava gədaŋ te Belzebul, ndah masasəraka jene takwar hay aca mbasiya sə, ava gədaŋ ta walawa? Ara nesey, eceŋ ana ec te njehec ka ndah ma ta təɗakwar ma yaŋ.

²⁸ Amaa daha yey, ya mbas damkwaw hay ava gədaŋ te Mesfen ta Zlavay, ara nesey, Meŋgə bay ta Zlavay sə, ka husakata kasl varakwar cay.

²⁹ Daha aabay, ndana mazlafa mesehw kad hwaɗ ta way ta nda masa aŋga ava gədaŋ, a da kəriya sə, aabay. Say nda ana aŋga ta jawa nda masa aŋga ava gədaŋ sə, avəda, e sehw a hwaɗ ta way tata, a həla jene hay tata fakwanay.

³⁰ Nda masa aŋga ava yey aabay sə, ŋgesey a ŋgə vəram eve yey. Nda masa e jəniyey te meɓəcekec ndana hay aabay sə, ŋgesey, aŋga nda makwakwaca ndana hay.»

³¹ Mawala mafay te mey, ya gwaɗakwar, mebər ta ndana hay fakwanay va malaf nda ta ndana hay fakwanay kad Zlavay sə, Zlav a ta pəla avəda, amaa nda malafa Mesfen Mavəna sə, Zlav a ta pəlan mebərey tata aabay.

³² Daha ndana ta gwaɗ ma mambəla ana aabay da yaŋ Wut ta nda sə, a ta ŋgat mepəl mebər tata, amaa daha e gweɗ da yaŋ Mesfen Mavəna sə, a ta ŋgat mapəl mebər tata aabay. Kwa dapa vavara pəsna, kwa maayaŋ kad fəma.

Ma hay va rav

³³ Daha wudez mambəla ana sə, wudiya ana hay mambəla ana may. Daha wudez mambəla ana aabay sə, wudiya ana hay mambəla ana aabay may, masən wudez sə, fa wudiya ana hay.

³⁴ Hay, akwar tərsam ta bay ta wudam hay, akwar ndah mambəla ana hay aabay, akwar de gweɗek ma mambəla ana sə, a ŋgana gwagumaw? Afa ɗaf ta ma e gweɗek sə, jə masa manəha dapa rav.

³⁵ Nda mambəla ana sə, e təreŋgek jə mambəla ana dapa rav tata masa aŋga manəha weh eve jene hay mambəla ana, amaa nda mambəla ana aabay sə, e təreŋgek jə mambəla ana aabay dapa rav tata masa aŋga manəha weh eve jə mambəla aabay.

³⁶ Ya gwaɗakwar, pas ta matəɗ ma sə, ndana hay ec te vehek ma mambəla ana hay aabay fakwanay masa ac ta gwaɗiya.

³⁷ Ara nesey, Zlav a ta təɗakaa ma yaŋ sə, ava ma hay masa ka ta gwaɗiya, daha kaa sə, ka nda mambəla ana, kwa ka nda mambəla ana aabay.

Cah hay ta Zawnas

³⁸ Ndah dərziya deveŋ ndah mesesərekecen ma majawa kad ndana hay va Farisa hay dərziya ec ke gweɗ, gege: «Nda masasəraka nda, anda wal ŋgandaw cah masa andə da wala.»

³⁹ Yesu ke vehecen, gege: «Akwar ndah mambəla ana aabay pəsna nesey, ndah maŋgwadafa dəɓa Zlavay, akwa nək cah marəzla nda, amaa akwar ta ŋgat mawala aabay, say cah masa aŋga te ŋgə ava Zawnas, nda mehwedek ma zleezle.

⁴⁰ Ara masa Zawnas te ŋgə pas mahkar, vaɗ mahkar da hwaɗ te kəlef mazlakava, ara aŋga ana Wut ta nda e te ŋgə pas mahkar, vaɗ mahkar dapa wuyak.

⁴¹ Pas ta matəɗ ma sə, ndah dapa vavara te Niniwey ec te beŋgeɗek yaŋ ke te jewec ndah dapa vavara pəsna nesey ava ma hay, afa pas masa Zawnas nda mehwedek ma te bəzedec ma sə, ac ka ŋgwada rav teceŋ. Anjəkar, nda mafəna Zawnas ana sə, fana ɓa.

⁴² Pas ta matəɗ ma sə, ŋgwaz maŋga bay da yaŋ vavara ta Saba zleezle sə, e te beŋgeɗek yaŋ ke te jewec ndah dapa vavara pəsna nesey ava ma hay, afa aŋga sə, e dek da ma ta kwakumakw ta vavara ka ta cak zləmay fe leŋgesl te meven jene hay ta Bay Salmaŋw. Anjəkar, nda mafəna Salmaŋw ana sə, fana ɓa.»

Mevehek ta damkwaw kad pa ndana

⁴³ Daha damkwaw ka data a vəda dapa ndana, a ŋgway vəla vəla dapa səɓak, a yah slam ka ta sasak vaw, amaa ka ŋgataw aabay.

⁴⁴ Ara nesey, a wulakiya dapa rav tata, gege: Zuwan ya vahaɓa pa slam aɗaw masa ye dek dapa. Mevehek tata sə, a ŋgatafa kwa jene dapa aabay, mafaɗa va maləmada eve cəvey ana.

⁴⁵ Ara nesey, e dey, e zelekec damkwaw hay mekele tasəla masa aca fəna eve suwe. Ece sehwey, aca njah pa nda ana. Manjah ta ndana ana sə, a ta nasata ka fəna mezleezle ana. Ara aŋga ana, e te ŋgə ava ndah masa suwe pəsna nesey.

Hwaɗ ta way metehwe ana te Yesu

⁴⁶ Dapa masa Yesu e gweɗ kad miya hay heley sə, ac mamaŋ va malamaŋ hay mazlaca da vəda, aca wal magwaɗa. [

⁴⁷ Ndana ɓa ka gwaɗa, gege: «Mmakw va malamakw hay ac da vəda, aca wal ma ta gwaɗakaa.»]

⁴⁸ Yesu ka vahan kad nda medek magwaɗa sə, gege: «Mma va malama hay sə, wa hay wa?»

⁴⁹ Ava dəɓa ana, Yesu, ka waɗ ha kad fa ndah masasəraka jene tata, ke gweɗ, gege: «Mawala mma va malama hay,

⁵⁰ afa malama, dəma, daha aabay, mma sə, nda masa e ŋgə jene ara Papa da baymaləvaŋ ta waya.»