Mata 10 - Ma Majawa Waya

Mezler ta ndah masasəraka jene kuraw dapa yaŋ ana ecew

¹ Yesu ke zelec ndah masasəraka jene tata kuraw dapa yaŋ ana ecew, ke vec gədaŋ da yaŋ mesfen hay maləza, afa ec de mbeseceŋ, ec de mbəlec ndah gwabay fakwanay va ndah masa gəva ta vaw maməca fakwanay.

² Mawala mezel ta maslaŋ hay kuraw dapa yaŋ ana ecew: Macaaca ana, Simaŋw, nda mezel Piyer va Endəre malamaŋ, Zak wut te Zebede va malamaŋ Zaŋ,

³ Fəlep va Bartelemi, Tumas va Mata nda macəkala budaw, Zak wut ta Alfey va Taadey,

⁴ Simaŋw, nda masa a wal wunam tata elehey va Zudas Iskariyawt, nda ana ŋgesey, ma ta vana Yesu pa ha ta maslagəra tata hay.

⁵ Maslaŋ ana hay nesey, Yesu e zlerdec kad pe mezlərey ava mamənak hay ara nesey: «Akwar ta kəs cəv te medə kad vara ndah masa Zuwef hay bay bay. Akwar te sehw pa wunam hay mazlakava ta Samariya hay bay.

⁶ Sesəker madaɗ sə, kad vara Isreyel hay masa ac ke zeceŋ ara təmak hay.

⁷ Dapa cəvey, megweɗec kad ndana hay: “Meŋgə bay ta Zlav da baymaləvaŋ hay sə, aŋga hukw cay”.

⁸ Membəlec ndah gwabay, mepərekec ndah maməca, mepenec meskwelme hay, membesec damkwaw hay. Akwar ka ŋgataw taambəla, mavaw taambəla may.»

⁹ Akwar ta kəs kwa gənaɓ, kwa səlay, kwa yam ta səlay pe jiibe bay,

¹⁰ kwa bakatar ta maŋgway, kwa rəkwat hay ecew, kwa tahkar hay va gada bay, afa nda te mezlərey sə, aŋga eve cəv ta maŋgat jə ta mandə tata.

¹¹ Dapa berne daha aabay, dapa wunam wuje masa akwa husa pa, manəkaw, afa akwar da səna nda masa aŋga mak ta makəsakwar, manjahay faŋga kasl pa pas masa akwa wal madaɓa.

¹² Daha akwar te sehw kad way ta ndana sə, megweɗefeceŋ.

¹³ Daha ndah da way ana ac mak ta maŋgat metehey ana sə, a lada meteh takwar ana de husefeceŋ, amaa daha aca husa bay sə, a lada meteh takwar ana da vahafakwar.

¹⁴ Daha ac ka kəsakwar aabay, ac ka cənakwaɗ ma aabay, dapa madaɓa takwar da way ana, daha aabay dapa wunam ana sə, masləva melbelbe fe sek takwar avəda.

¹⁵ Ya gwaɗakwar, pas ta matəɗ ma sə, matəɗ ma ta vavara ta Sawduma va ta Gwamara sə, a ta ŋgata afəcaka da yaŋ matəɗ ma ta wunam ana ŋgesey.

Maslaf marga hay masa ec te ŋgey

¹⁶ Mawala, yey sə, ya zlardakwar ara təmak hay kad pa taɓa ta gəda te ley hay. Ara nesey, manjah wewer hay ara zezekw hay va makwaɗma hay ara mahwɗagwam hay.

¹⁷ Map leŋgesl fa ndana hay, afa ac ta təhazakwar kad pa ha ta ndah mavən ma hay, ac da kəlapakwar dapa way hay ta macə mbahw te Zuwef hay.

¹⁸ Ac ta hwadakwar kad fəma te gwevernel hay va fəma ta bay hay mafay taaɗaw. Faŋga akwar ta tə yaw fəma teceŋ va fəma ta ndah masa Zuwef hay bay.

¹⁹ Daha ac ka hwadaɗakwar pa slam ta mambaɗ ma hay sə, akwar ta dəŋgazla yaŋ masa akwar te gweɗ gwagumaw daha akwar te gweɗek mey sə, bay, afa ma hay masa akwar ta gwaɗiya sə, akwar ta ŋgatiya faŋga faŋga ana ŋgesey,

²⁰ afa me te gweɗek sə, akwar bay, Mesfen ta Papaŋ takwar e te gweɗ dapa akwar.

²¹ Dapa ŋgesey ana, nda amta a ta vana malamaŋ tec hay avəda ke te kəɗ ka macəhwandaw. Papaŋ ta wat a ta vana wudiya avəda ara aŋga ana may. Wudeh may, ec te beŋgeɗefec yaŋ papaŋ tec hay, ac ta vana Papaŋ tec hay avəda ke te kəɗey.

²² Ndana hay fakwanay ac ta walakwar fe ndey bay mafay te mezel taaɗaw. Amaa nda masa ka ɓəsa avəda kasl pe memeɗey ana sə, a ta mbəlata.

²³ Daha aca mbasakwar dapa wunam leŋgeɗey, madaɓa pa wunam mekele. Ya gwaɗakwar, akwar ta zlafa matulaka wunam hay mazlakava te Isreyel wagaa Wut ta nda e te vehekey sə, aabay.

²⁴ Nda masasəraka jene a fəna nda masasərakan jene aabay. Nda maŋga mezlərey, a fəna bay ta way tata aabay may.

²⁵ Ta nda masasəraka jene, dapa rav tata sə, e de tər ara nda masasərakan jene. Ta nda maŋga mezlərey, dapa rav tata sə, e de tər ara bay ta way tata. Daha aca zal bay ta way, Belzebul sə, naa ac ta zal ndah da hwaɗ ta way tata mafəna ana aabay ŋgəɗa geyey?

Akwar te lel bay

²⁶ Akwar te lel fa ndana hay bay. Jene maraɓa masa e te wel bay sə, aabay. Asaya, jə masa ndana a səniya bay e te sən bay sə, aabay.

²⁷ Masa ya gwaɗakwar dapa ləvaŋ nesey sə, magwaɗaw ta yaŋ pas. Masa akwa cəna dapa masasak ma sə, magwaɗaw ava gədaŋ da yaŋ way hay.

²⁸ Akwar te lel fa ndah makəɗa vaw bay, amaa aca zlafa makəɗa mesfen bay. Sesəker melel sə, fa nda masa a ta zana mesfeney va vaw takwar avəda dapa kwakwaw masa a ta məc aabay.

²⁹ Aca zlafa mahusamda ɗiyak titey hay ecew fa səlay amta aabay geyey? Anjəkar, kwa ɗiyak amta masa e te kezlek kad fa vara ka ta məcay daha Papaŋ takwar ta wayiya bay sə, aabay.

³⁰ Takwar, kwa ŋgwec ta yaŋ takwar hay, ac maŋgəfa fakwanay.

³¹ Akwa ŋgə zidaw bay, akwar sə, akwar ka fəna ɗiyak ana hay fakwanay eve mehehəm aabay geyey?

³² Mafay ana, kwa waawa masa a tə yaw fəma ta ndana hay, a səniyey sə, ŋgesey, yey may, ya ta tə yaw da yaŋ ana fəma ta Papa da baymaləvaŋ,

³³ amaa kwa waawa masa e te cefiyey ma fəma ta ndana hay, ya ta cafa ma fəma ta Papa da baymaləvaŋ may.

Metehey va vəram

³⁴ «Akwar ta kəsiya masa ye hwedek meteh kad pa vavara sə, ara na bay. Ye ke dek te mehwedek metehey sə, aabay, amaa vəram.

³⁵ Aŋga, ye dek sə, ka ta vən ndana ava papaŋ, dem ava mamaŋ, ŋgwaz ta wat ava mamaŋ ta mawula.

³⁶ Maslagəra ta ndana sə, ndah da hwaɗ ta way tata ana.»

Macəp Yesu

³⁷ «Nda masa a wal papaŋ daha aabay mamaŋ ke fəniyey sə, a husa manjah ka nda aɗaw bay. Nda masa a wal wudiya daha aabay daŋgwaya ke fəniyey sə, a husa manjah ka nda aɗaw bay.

³⁸ Nda masa a zlafa mazaɓ hap tata mazləlawa va mecəpiyey bay sə, ŋgesey, a husa manjah ka nda aɗaw bay.

³⁹ Nda masa a wal ma ta raɓaɗ mesfen tata ha sə, a zana avəda. Nda mazana mesfen tata mafay taaɗaw sə, a ta ŋgata vəda.»

Makəsa nda

⁴⁰ «Nda masa a kəsakwar sə, a kəs ŋga yey ana. Nda mekəsiyey, a kəs ŋgesey, nda mezlərekiyey.

⁴¹ Nda makəsa nda mehwedek ma afa aŋga nda mehwedek ma sə, a ta ŋgat meyəv tata ara ta nda mehwedek ma ana. Ara aŋga ana, nda makəsa nda maŋga mezlər ara aŋga ana, afa aŋga nda maŋga mezlər ara aŋga ana sə, a ta ŋgat meyəv tata ara ta nda maŋga mezlər ara aŋga ana may.

⁴² Kwa waawa mavana yam matasla kusetke pa gwagway ta yam amta kad nda kusetke ana amta, afa aŋga nda masasəraka jene, ya gwaɗakwar, a ta zana meyəv tata sə, aabay.»