Markwas 6 - Ma Majawa Waya

Ndah de Nezeret aca wal makəs ma te Yesu bay

¹ Ava dəɓa ana, Yesu ke zleftek dapa slam ana, ka data e Nezeret, pe berne masa e gəlek dapa. Ndah masasəraka jene tata ac ka cəpaw.

² Ta pas ta masasak vaw, Yesu ke dey pə Way ta macə mbahw te Zuwef hay, faŋga ke sesərekec ndana hay. Ndana hay gaa ac ka cak zləmay fe mesesərek tata sə, ec ke rəzl mabay, ec ke gweɗ, gege: «Masasərakan jeŋ ana hay fakwanay na wa? Mavana leŋgesl va gədaŋ te meŋgə cah hay mazlakava ara na wa?»

³ Amba aŋga sə, aŋga nda macacəɗa hap, aŋga wut ta Maaray. Aŋga sə, aŋga malamaŋ ta Zak, te Zuzes, ta Zud va Simaŋw biba? Na dəmaŋ hay ac deveŋ andakwa fana? Mafay ana, ke recen ma avəda ta makəs Yesu.

⁴ Yesu gege: «Nda mehwedek ma sə, aca kəs ma tata vəla vəla fakwanay, amaa dapa vavara tata, da vara tərsam tata va da hwaɗ ta way tata sə, aca piya ara jene taambəla.»

⁵ Yesu ke ŋgə cah mekele de vereceŋ faŋga aabay, say aŋga te pefec ha ndah gwabay dərziya, te mbəleceŋ.

⁶ Ka rəzlata da yaŋ masa ac ka kəsaw aabay. Ava dəɓa ana, Yesu ke dey kad pa wunam hay mekele mekele, ka ta sasərak ndana hay dərŋga.

Yesu e zlerdec ndah masasəraka jene tata kuraw dapa yaŋ ana ecew

⁷ Ke zelec ndah masasəraka jene tata kuraw dapa yaŋ ana ecew, ke vec gədaŋ ta mambas damkwaw hay, ke zlerdec ecew ecew.

⁸ Wagaa ac te dey sə, ke gweɗec ma majawa, gege: «Madaɗay, akwar ta kəs jene pa ha bay, kwa jə ta manday, kwa bertete ta səlay, kwa səlay dapa jiibe takwar. Amaa makəs pa ha sə, daŋgwar.»

⁹ Ke gweɗ, gege: «Map tahkar pe sek, amaa akwar ta kəs rəkwat ecew ecew bay.»

¹⁰ Ke gweɗec saya, gege: «Da way masa ac ka kəsakwar, manjahay dapa faŋga kasl pa pas masa akwa wal madaɓa da way ana kad pa slam mekele.

¹¹ Daha ndah dapa wunam ana ŋga ac ka kəsakwar aabay, daha aabay ac ka cəkafakwar zləmay aabay sə, madaɓa dapa wunam ana. Dapa masa akwa dey sə, masləva melbelbe fe sek takwar avəda, e de ŋguzdecen sə, ac ke ŋgə jene mambəla ana aabay.»

¹² «Ndah masasəraka jene sə, ec ke dey, ac ka bəzad ma kad ndana hay, afa aca ra ŋgwada rav.»

¹³ Asaya, ac ka mbas damkwaw hay gaa dapa ndana hay. Ec ke mbəlec ndah gwabay gaa ava metəkweɗefec mal fə yaŋ.

Herawt va Yesu

¹⁴ Bay Herawt Aŋtipas ka cəna ma da yaŋ Yesu, afa ndana hay ece gweɗ vəla vəla da yaŋ mezel tata. Ndah ŋgeɗ hay, gege: «Zaŋ Baatis ka pərakata dapa maməcay, mafay ana aŋga ava matimaazlaɓ te meŋgə cah hay.»

¹⁵ Amaa leŋgeɗ hay, gege: «Ŋgesey ana sə, Eli», ndah ŋgeɗ hay saya, gege: «Nda ana ŋgesey sə, aŋga nda mehwedek ma ara nda amta deveŋ ndah mehwedek ma ta Zlav zleezle.»

¹⁶ Masa bay Herawt a cəna ma ana hay fakwanay ara nesey sə, ke gweɗ, gege: «Say na Zaŋ Baatis ana! Ya ka zlar ndana hay ka ta ŋgəlan yaŋ, amaa ka pərakata dapa maməcay!»

Maməc ta Zaŋ Baatis

^17-18 Bay Herawt ka kəsa Herawdiyat, ŋgwaz ta malamaŋ Fəlep avəda ka ŋgwaza dapa masa malamaŋ ana aŋga eve ndey heley. Zaŋ Baatis ka gwaɗa bay Herawt ana, gege: «Ma tandakwa majawa ka vakaa cəv ta makəs ŋgwaz ta malamakw dapa masa aŋga eve ndey heley sə, aabay.» Ara nesey, bay Herawt ka və cəvey ta matəhaz Zaŋ ana, ta majawiya va makazlaɗ pa daŋgay.

¹⁹ Herawdiyat sə, ka gəɗana dapa rav mabay fa Zaŋ ana, ka wal makəɗa avəda. Amaa ka ŋgat cəv ta makəɗiya aabay,

²⁰ afa bay Herawt e lel fa Zaŋ Baatis ana. A səniya Zaŋ Baatis sə, aŋga nda maŋgana mezlər eve cəvey ana, aŋga nda mapana fa yam te ndey ta Zlavay. Mafay ana, a bərɗiya, a cəkafa zləmay cəɗem cəɗem. Amaa dapa masa a cəkafa zləmay sə, ma tata ana ka dəŋgazlan yaŋ mabay.

²¹ Yaw, pas mambəla ana masa Herawdiyat da ŋgat cəv ka ta kəɗ Zaŋ Baatis ana sə, ka husakata cay. Pəsaŋga ana ŋgesey, macunam ta masənafa pas te meheyə ta bay Herawt. Bay ana ka tə jene ta mandə mabay kad ndah mazlakava dapa vavara te Gelile, kad bay ta kafaraŋ hay va madərlam tata hay.

²² Masa ac dapa meŋgə macunam ana heley sə, dəm ta Herawdiyat ke sehw pa slam masa ac dapa, ke gərvey fəma teceŋ. Megərvey ana, ka wafa bay Herawt va ndah tata hay mazala dapa macunam ana mabay. Bay ana ka nəkafa dəm ana, gege: «Nəkefiyey jə masa ka waya, ya ta vakaa.»

²³ Herawt sə, ka vana gədaŋ ma tata ana eve membeɗey, gege: «Ye mbeɗ eve metehwe ana, jə masa ke te nəkefiyey fakwanay sə, ya ta vakaa, kwa vavara aɗaw, ya ta vəna ecew, ya ta vakaɗ gəva leŋgeɗey.»

²⁴ Dəm sə, ke dey kad a vəda vara mamaŋ, ka nəkafa, gege: «Ya da nəkafa ana sə, mey?» Mamaŋ ka vahan, gege: «Nəkafa yaŋ ta Zaŋ Baatis.»

²⁵ Dəm sə, ka vas vaw, ke veh kad vara bay ana, ka gwaɗa, gege: «Ya wal vuwa yaŋ ta Zaŋ Baatis təlam təlam nesey pe perentey.»

²⁶ Dapa ŋgesey ana, bay Herawt ke wesl ɓasabay, ma ana ka məcan vaw avəda kusaf. Amaa ava aŋga fakwanay, ka zlafa mavahda ma tata ana ɓasabay, afa ke mbeɗ fəma ta ndah tata mazala.

²⁷ Ara nesey, bay ana ka zlarda kafaraŋ maɓəliya amta faŋga faŋga, ke te ŋgəlek yaŋ ta Zaŋ Baatis dapa daŋgay. Kafaraŋ sə, ke dey ke te ŋgəlek yaŋ ta Zaŋ Baatis ana.

²⁸ Ke hwedek yaŋ ana dapa perentey, ka van kad dəm ana, dəm sə, ka hwadan kad mamaŋ may.

²⁹ Ava dəɓa ana, masa ndah masasəraka jene ta Zaŋ aca cəna labara ana ara nesey sə, ec ke dey, ec ke kəsek slaw ta vaw ana, ac ka pəsahaw.

Yesu e ndec ɗaf kad ndah bakatar zlam

³⁰ Maslaŋ hay te Yesu kuraw dapa yaŋ ana ecew masa aŋga te zlerdec ka ta bəzad ma ta Zlavay sə, ec ke vehekeceŋ, ac ka cam vaw a cak te Yesu. Ac ka ŋguzdan jə masa ac ta ŋgiya fakwanay va masa ac te sesərekecen kad ndana hay.

³¹ Yesu gege: «Amcakwa andakwa babəla pa səɓak ma ta sasakakwa vaw kusetke.» E de gweɗec ara nesey sə, afa ndana hay gaa ec ke dey kad vara vaw, ec ke veheceŋ, mekele hay ece dey saya. Kwa Yesu va ndah masasəraka jene tata aca ŋgat ha ka ndə ɗaf aabay.

³² Dapa ŋgesey ana, ec ke tepə pa kaslkaslah, ec ke dey babəla teceŋ pə yaŋ ta səɓak.

³³ Dapa masa ece dey sə, ndana hay gaa ec ke weleceŋ, ac ka səna slam masa ece dey kad pa sə, avəda. Mafay ana, ndah dapa wunam ana fakwanay ac ka hway ava sek kad pa slam masa Yesu va ndah masasəraka jene tata ece də kad pa. Ac ke ŋgəlecen ma tec Yesu va ndah masasəraka jene tata kad pa slam ana.

³⁴ Masa Yesu ece bəreŋgə kad fa vavara sə, a wala miya makwasa faŋga gaa. Metekwen ka ŋgana mabay da yaŋ ndah ana, afa e weleceŋ sə, ac ara bakw ta təmak hay masa gwala təmak ana hay aabay. Ke sesərekec jene hay mekele mekele gaa.

³⁵ Pas ɓasabay, mbala e te kezl kad a way cay, ndah masasəraka jene ac ka ŋgucafa vaw Yesu ana, ac ka gwaɗa, gege: «Təlam nesey pas ɓasabay, andakwa dapa yaŋ ta səɓak fana.

³⁶ Gweɗec ndah ana, aca ra daɓa ka ta yah jə ta manday dapa wunam hay da ma ta səɓak, daha aabay pa wunam hay masa zef ava andakwa.»

³⁷ Amaa Yesu ke vehecen, gege: «Akwar ava yaŋ takwar ana, mevec jə ta manday.» Ac ka gwaɗa, gege: «Ka wal andaw te husemeceŋ jə ta manday ana ava səlay temere ecew geyey?»

³⁸ Ke gweɗec, gege: «Akwar eve peŋ ecuwey? Madaɗ ma ta wuzaɗa.» Masa ac ke wuzeɗek cay sə, ac ka gwaɗa, gege: «Andaw eve peŋ zlam va kəlef ecew.»

³⁹ Mafay ana, Yesu ke gweɗec ndah masasəraka jene tata, ece re njeheɗec ndana hay njakw! Njakw, da yaŋ kəzeŋ dendeɓek.

⁴⁰ Dapa ŋgesey ana, ndana hay ac ka njah maanjahay. Dapa slam amta sə, ndana hay ece ŋgə temere temere, daha aabay kwakwar zlam kwakwar zlam.

⁴¹ Ava dəɓa ana, Yesu njəram! A hal peŋ zlam va kəlef ecew sə, e pə ndey kad a wudam, a ŋgana wasay Zlavay. Ava dəɓa ana saya, wac wacana peŋ ana, ke vənecen kad ndah masasəraka jene tata aca ra vənecen ndana hay. Ka waca kəlef ara aŋga ana saya, ke vənecen fakwanay.

⁴² Kwa waawa ka ndaw mban.

⁴³ Ava dəɓa ana, ndah masasəraka jene ece ɓəcek mezek te peŋ va te kəlef masa ndana hay ta gərda sə, pa waŋ hay manəha kuraw dapa yaŋ ana ecew.

⁴⁴ Ndah mandana peŋ ana sə, mawulah bakatar zlam.

Yesu e dey da yaŋ təker mazlakava

⁴⁵ Ava dəɓa ana kusetke, Yesu ke tetəkec ndah masasəraka jene tata ke te tep pa kaslkaslah, aca ra də cak cak kad ma te təker mazlakava jaka luwa ta Baytisayda. Dapa ŋgesey ana, ke gweɗec ndana hay aca ra daɓa kad a wunam.

⁴⁶ Ava dəɓa ta mavan vaw teceŋ sə, ka data aŋga amta kad fa ŋguɗa ka ta cə mbahw.

⁴⁷ Dapa masa slam e zeweley, ndah masasəraka jene ac da yaŋ təker mazlakava dapa kaslkaslah, amaa te Yesu sə, aŋga amta fa ŋguɗa sə, heley.

⁴⁸ A wala ndah masasəraka jene tata ac dapa marga mabay, afa bərgadaŋ e tecen ma elehey da yaŋ təker ana. Dapa ŋgesey ana sə, mbala slamɓal cay. Ava dəɓa ana, Yesu ke ŋgetefeceŋ, ke dey da yaŋ yam ana eve sek. Mahusa tata a cak ta kaslkaslah sə, e dey ara e te gərdeceŋ.

⁴⁹ Amaa dapa masa aca wala e dey da yaŋ yam ana, aca cə lalaw, aca wulakiya sə, nda te veɗ te ŋgetefeceŋ.

⁵⁰ Dapa masa aca wala ara nesey sə, ac ka ŋgə zidaw macəkuma bay. Amaa faŋga faŋga ana, Yesu gege: «Matəhaza rav, akwa ŋgə zidaw bay, nesey sə, yey ana bəna, nda mekele bay!»

⁵¹ Dapa ŋgesey ana, ke tepefec kad pa kaslkaslah a cak teceŋ, bərgadaŋ sə, ka kəɗa ma. Mafay ana, ndah masasəraka jene tata ac ke rəzlec mabay,

⁵² afa cah masa Yesu ta ŋgiya ava peŋ sə, ac ka cəna aabay. Rav teceŋ masasala ta macəna gədaŋ te Yesu da yaŋ jene hay fakwanay.

Yesu a mbəl ndah gwabay dapa vavara te Genezeret

⁵³ Masa Yesu va ndah masasəraka jene tata ec ke zleŋgec da yaŋ təker mazlakava, aca husa pa vavara te Genezeret, ac ka jawaɗ kaslkaslah ana a ma te təker ana faŋga.

⁵⁴ Mebəreŋgek tec dapa kaslkaslah sə, ndana hay ac ka səna Yesu avəda zef.

⁵⁵ Mafay ana, ndana hay ec ke hwekey dapa vavara ana kad vara vaw, ec ke hwedek ndah gwabay hay mabay kad pa slam masa Yesu aŋga dapa faŋga. Ndah gwabay sə, ac manaha fa lambaŋ tec hay.

⁵⁶ A pa slam masa Yesu e də kwa fəla fəla fakwanay, kwa pe berne, kwa pa gəva hay, daha aabay, pa wunam hay da ma ta səɓak, ndah ana hay sə, aca nahaɗ ndah tec gwabay pa slam ta makwas vaw. Aca bərakw Yesu, aca wal ndah tec gwabay sə, aca ra pafa ha kwa fəma ta rəkwat tata war. Ndah gwabay mapafa ha rəkwat te Yesu sə, ac ke mbəlec fakwanay.