Lukas 17 - Ma Majawa Waya

Mavə mawulak yaŋ kad ndah masasəraka jene

¹ Yesu e gweɗec ndah masasəraka jene tata, gege: «Eve metehwe ana, ndah mazada ndana hay cəɗem cəɗem ke ŋgə mebərey sə, ɓa. Amaa wabaw kad nda mazada ndana hay kad pe mebərey ana.

² Kad aŋga sə, zuwan ac ta jawana kekeŋ mazlakava ana pa uway, ac ta kazlaɗ pa yam mafayakfayak ana, da yaŋ masa aŋga ta zadaɗ nda mekusetke ana amta deveŋ ndah makəsa ma aɗaw hay nesey kad pe mebərey.»

³ Mafay ana, mep leŋgesl mambəla ana! «Daha malamakw ke ŋgə mebər fa yam te ndey takaa sə, kətaw eve leŋgesl eve leŋgesl. Daha ka ŋgwada leŋgesl sə, pəlan mebər tata.

⁴ Kwa daha ke ŋgə mebərey ana dəɓa tasəla fa yam te ndey takaa da hwaɗ ta pas amta, ke vehek kad varakaa dəɓa tasəla ana, ava magwaɗakaa, gege: “Mbahw pəlawa mebərey aɗaw” sə, pəlan mebər tata.»

⁵ Maslaŋ hay ac ka gwaɗa Bay Mazlakava Yesu, gege: «Sakandan makəsparav taciya.»

⁶ Bay Mazlakava ke vehecen, gege: «Daha akwar ava makəsparav kwa kusetke ara hulef te venjeh mekusetke ana sə, ŋgesey, akwa zlafa magwaɗa wudez nesey, “Njəɗa vaw takaa avəda fana, daɗ ta ŋgayaɗ vaw takaa pa yam mafayakfayak ana”, ŋgesey a ta cənakwaɗ ma.»

Mezlər ta nda maŋga mezlərey

⁷ «Daha ndana amta deveŋ akwar, aŋga ava nda maŋga mezlər tata ɓa. Nda ana, a həvan ley, daha aabay a ɓəcan bakw ta ɗakw tata hay. Ava dəɓa ana, e dek de ley kad wunam. Bay ta way tata a ta gwaɗa, gege: “Daɗ zef ta ndaɓa jene ta manday” sə, aabay.

⁸ Sesəker a ta gwaɗa sə, “Ŋgwada rəkwat fa vaw takaa, te ləmediyey jə ta manday, ava dəɓa ana, ka da ndaɓa va masaɓa takaa may”.

⁹ Daha nda maŋga mezlərey ana, ka ŋgan ara bay ta way tata, ta gwaɗa sə, a ta ŋgana wasay ɓa geyey?

¹⁰ Akwar sə, ara aŋga ana, ava dəɓa te meŋgə mezlər masa Zlav ta gwaɗakwar fakwanay sə, megweɗ, “Andaw sə, andaw ndah maŋga mezlər tata hay, anda ŋgek nesey sə, mezlər taciya hay masa Zlav ta gwaɗandaw.”»

Yesu e mbəlec ndana hay kuraw dapa meskwelme

¹¹ Yesu ke də Zeruzelem, e də jaka pa kwakumakw ta vavara ta Samariya va vavara te Gelile.

¹² Mahusa tata zef ava wunam ɓa, meskwelme hay kuraw ec ke dek kad vara vaw, ec ke zlec dəreŋ ava aŋga.

¹³ Ac ka cə lalaw ava gədaŋ, gege: «Yesu, nda masasəraka nda, mbahw ŋgafandaw metekweney!»

¹⁴ Masa Yesu e te weleceŋ sə, gege: «Madaɗay, me te ŋguzdecen vaw takwar kad ndaakwas hay.» Dapa masa ece dey, ac ta wala sə, vaw tec ka səɗata kuleɗ kuleɗ.

¹⁵ Nda amta deveŋ eceŋ ɓa, masa a wala vaw tata ka səɗata sə, pəla! E ŋgwedek ma, e veh kad vara Yesu, a hahəm Zlavay ava gədaŋ.

¹⁶ Mahusa tata fəma te Yesu sə, kwerjejekw! E kekəredey, a ŋgana wasay. Nda ana ŋgesey, aŋga nda Samariya ana.

¹⁷ Yesu ke nəkefec ndah da cak tata, gege: «Naa meskwelme hay kuraw sə, ec ke səɗec fakwan biba? Naa mevehek kad fana pal nda amta sə, ndah cuɗ dərziya kəla?

¹⁸ Ndana mawulaka yaŋ te mevehek ka ta hahəm Zlav aabay, say nda məlaŋ na war geyey?»

¹⁹ Ava dəɓa ana, Yesu ka gwaɗa nda ana, gege: «Zleftek, daɗay, makəsparav takaa, ka mbəlakaa avəda.»

Medek te Meŋgə bay ta Zlavay

²⁰ Farisa hay ac ka nəkafa Yesu, gege: «Meŋgə bay ta Zlavay ana e te dek sə, ewey?» Ke vehecen, gege: «Meŋgə bay ta Zlavay sə, e dek ara jə masa ndey a wala sə, bay.

²¹ Ec te gweɗ masa: “Aŋga kana”, daha aabay “Aŋga katay” sə, aabay. Masəna, Meŋgə bay ta Zlavay sə, aŋga dapa taɓa takwar cay.»

Pas te medek ta Wut ta nda

²² Yesu ke gweɗec ndah masasəraka jene tata, gege: «Pas ana e te dekey, akwar ta hwar mawala Wut ta nda eve ndey takwar, amaa kwa pas amta akwar ta wala ɓasabay.

²³ Ac ta gwaɗakwar: “Aŋga fana”, daha aabay “Aŋga fatay”, amaa akwar ta də bay, akwar ta vas vaw bay.

²⁴ Ara ndana hay ta wala mewecəkeɗ ta yam masa a waɗ slam da baymaləvaŋ va dapa vavara fakwanay sə, Wut ta nda, e te vehek ara aŋga ana may.

²⁵ Amaa macaaca ana sə, a lada a sə marga gaa ɗagay, ndah ta vavara təlam nesey aca kazlda ɗagay.

²⁶ Pas masa Wut ta nda e te vehekey sə, e te ŋgə ara jene hay te ŋgə dapa masa Nuwe aŋga ɓa heley.

²⁷ Dapa ŋgesey ana, ndana hay ac ka ndə jene, ac ka sə jene, mawulah ac ka kəs madəmay, ac ka və dehw tec kad pa ŋgwaz, kasl pa pas masa Nuwe te sehw pa kaslkaslah mazlakava. Ava dəɓa ana, yam ka slə mabay, ka nəha vavara sleesle, ka zana ndana hay avəda fakwanay.

²⁸ Asaya, pas ana e te ŋgey ara jene hay te ŋgey dapa masa Ludaw aŋga dapa vavara. Dapa ŋgesey ana, ndana hay ac ka ndə jene, ac ka sə jene, ac ka husam jene hay, ac ka husamda jene tec hay, ec ke sləkey, ac ka lam way hay.

²⁹ Amaa pas masa Ludaw e dek kad a vəda dapa berne ta Sawduma sə, Zlav ke kezlek kwakwaw fa valakw da baymaləvaŋ kad fa vara, ke bezlec avəda fakwanay.

³⁰ E te ŋgə ara aŋga ana, pas masa Wut ta nda e te ŋguzdek vaw.»

³¹ «Dapa pas ana ŋgesey, nda masa aŋga manjaha da vəda, amaa jene tata hay ac da way, e te sehw kad way ke te həlekec bay. Daha nda masa aŋga de ley sə, e te vehek kad a wunam bay.

³² Masənafa jene hay masa aca ŋgə ava ŋgwaz ta Ludaw.

³³ Nda mayaha membəl mesfen tata sə, ŋgesey, a ŋgə a ziya. Amaa nda mazana mesfen tata mafay taaɗaw sə, ŋgesey a raɓiya.

³⁴ Ya gwaɗakwar, da hwaɗ ta vaɗ ana ŋgesey, ndah ecew manaha fa slam ana, nda amta a ta kəsata, nda leŋgeɗ a ta gərata.

³⁵ Ara aŋga ana, daha ŋgwazah ecew aca hayə daw fe ləgeŋ amta, ŋgwaz amta a ta kəsata, ŋgwaz leŋgeɗ a ta gərata. [

³⁶ Daha mawulah ecew ece həv de ley, nda amta a ta kəsata, nda leŋgeɗ a ta gərata.»]

³⁷ Ndah masasəraka jene ac ka nəkafa, gege: «Jeŋ ana e te ŋgə dama, Bay Mazlakava?» Ke vehecen, gege: «Dapa slam masa jə maməca ana ɓa sə, mandasltabay hay aca kwas vaw faŋga.»