Lukas 14 - Ma Majawa Waya

Yesu a mbəl nda gwabay pas ta masasak vaw

¹ Pas ta masasak vaw ɓa, Yesu ke dey a way ta nda amta deveŋ bay ta Farisa hay ka ta ndə ɗaf. Ndah manjaha faŋga ac ka səŋgal Yesu eve leŋgesl eve leŋgesl fe jene hay masa a ta ŋgiya.

² Ndana ɓa deveŋ eceŋ, aŋga gwabay, aŋga mazlaca fəma tata. Sek va ha tata hay mahəzla mafay te mehecey.

³ Yesu ke gweɗec ndah mesesərekecen ma majawa kad ndana hay va Farisa hay, gege: «Ma tandakwa majawa e gweɗ sə, gege: “Mey?” Mambəl ndana pas ta masasak vaw sə, mambəla ana geyey, mambəla ana bay?»

⁴ Amaa ndana hay ac ka wal mavahan ma ana aabay. Yesu ka pafa ha nda ana, ka mbəla avəda, ka gwaɗa da daɓa.

⁵ Ava dəɓa ana, Yesu ke nəkefec ndah faŋga sə, gege: «Daha nda amta deveŋ akwar aŋga ava wat ɓa, daha aabay aŋga ava zla ɓa, daha wat ana, daha aabay zla ana ka təɗata pa ɓaandaw pas ta masasak vaw sə, kwa pas ta masasak vaw sə, nda ana a ta vas vaw ke te kəsek avəda dapa ɓaandaw ana aabay geyey?»

⁶ Amaa ndah ana, ac ka zlafa mavahan ma ana kad Yesu sə, aabay.

Mayah slam ta manjahay dapa macunam

⁷ Yesu ka ɗala ndah mazala ka ta ndə ɗaf da way ta nda Farisa ana. A wala aca yah sə, slam ta manjah ta ndah mazlakava hay. Mafay ana, Yesu ke gweɗec ava ma maɗəva, gege:

⁸ «Daha akwar mazala, ka ta ndə ɗaf ta macunam ta madəmay, ka ta yah manjah fa slam ta mazlakava hay fəma bay. Gəla ka ta wala ec ke zelek nda mazkalava mafənakaa ɓa ma.

⁹ Ara nesey, bay ta macunam ana, e te dekey, a ta gwaɗakaa, gege: “Ana gəran slam nesey, kad nda nesey”. Mafay ana, ka ta gərda slam ana, ka ta njah fa slam ta manjah mamaɗ yaŋ ava hwaray.

¹⁰ Amaa daha ac ka zalakaa, ka ta ndə ɗaf ta macunam sə, daɗ ta njah fa slam ava dəɓa, afa nda mazalakaa de dek gwaɗakaa, gege: “Guula aɗaw, dek njah fa slam hay fəma nesey”. Ara nesey, ka ta ŋgat mehehəm fəma ta ndah masa akwar ta ndə ɗaf eve eceŋ.

¹¹ Yaw, eve metehwe ana, kwa nda wula wula mapana yaŋ tata ka nda mazlakava sə, ac ta paɗ ka nda mekusetke ana. Nda mapana yaŋ tata ka nda mekusetke ana sə, ac ta paɗ ka nda mazlakava.»

Mazal sə, maslamarga hay

¹² Yesu ka gwaɗa nda mazala ka ta ndə ɗaf sə, gege: «Daha ka zal ndana hay ka ta ndə ɗaf ta macunam sə, ka ta zal guula takaa hay bay, ka ta zal malamakw hay, kwa tərsam takaa hay va maslavda takaa hay masa ec eve zleley, ke te zelec bay. Ke te zelec bay sə, afa pas mekele, ac ta zalakaa ara aŋga ana, ac ta pəlakaɗ jene hay masa ke ke vec fakwanay.

¹³ Amaa daha ka zal ndana hay kad pa macunam sə, zal maslamarga hay, ndah masa sek va ha hay maməca, ndah mahahalɓa va mahazlaw hay.

¹⁴ Ke te wesl mabay, afa ec eve jene masa ta mapəlakaɗ sə, aabay. Amaa Zlavay a ta pəlakaɗ pas masa ndah maŋga jene eve cəvey ana ec te pərekek dapa maməcay.»

Ma maɗəva da yaŋ ndah mazala kad pa macunam

¹⁵ Ava macəna ma ana hay nesey, nda amta deveŋ ndah mazala ka gwaɗa Yesu, gege: «Mapəsma ɓa kad nda masa a ta ŋgat meven ma ta ɗaf tata dapa Wunam ta bay ta Zlavay.»

¹⁶ Yesu ka kərana maɗay ava ma maɗəva, gege: «Ndana ɓa, ka ŋgə macunam, ka zal ndana hay mabay.

¹⁷ Pas təɗe ta mandə ɗaf cay, ka zlar nda maŋga mezlər tata kad vara ndah mazala, e de gweɗe, gege: “Jene hay fakwanay maləmada cay, ara nesey, medekey təlam nesey”.

¹⁸ Amaa ac fakwanay amta amta ac ka ŋgana mbahw. Nda macaaca ana macana yaŋ ava nda maŋga mezlər sə, ka gwaɗa, gege: “Mbahw, pəlawa mebərey aɗaw bəna, ya ta husaɗ aabay, afa ya ka husam ley ɓa, ye dey, ye te wuzeɗekey”.

¹⁹ Nda leŋgeɗ ka gwaɗa, gege: “Mbahw, pəlawa mebərey aɗaw bəna, ya ta husaɗ aabay, afa ye ke husemek zla hay kuraw te mehəvey, ye te cekeceŋ!”

²⁰ Nda leŋgeɗ saya, ka gwaɗa, gege: “Ya ŋgat madaɗ pa aabay bəna, afa ye ke kəsek madəm təlam nesey!”»

²¹ «Nda maŋga mezlər sə, ka vahata kad vara bay ta way tata, ka ŋguzdan ma ana hay masa ndah ana ta gwaɗa. Ara nesey, bay ta way ana, rav ka haca mabay da yaŋ ndah ana, ka gwaɗa nda maŋga mezlər tata sə, gege: “Daha ara nesey sə, daɗ zef pa slam masa ndana hay dapa ɓa va mewezləŋger te cəv hay dapa berne, zelekec maslamarga hay, ndah masa sek va ha hay maməca, mahazlaw hay va ndah mahahalɓa”.

²² Ava dəɓa ana kusetke, nda maŋga mezlər sə, ke vehek kad vara bay ta way tata ka gwaɗa, gege: “Bay aɗaw, ye ke zelekec ndana hay ara masa ke te gweɗiyey, amaa slam da way ana maza ɓa hel suwar”.

²³ Bay ta way tata sə, ka gwaɗa saya, gege: “Daɗ pe cəv hay dapa səɓak ava cəv te ley hay, e ŋgə gədaŋ a lada ndana hay ece re dek gaa kad way aɗaw, a da nəhaɗay.

²⁴ Yaw, ya gwaɗakwar, kwa nda amta deveŋ ndah mazala macaaca ana nesey sə, a ta caka mandə ɗaf ta macunam aɗaw nesey ɓasabay!”»

Maŋgwadafa dəɓa jene fakwanay ka ta cəp Yesu

²⁵ Ava dəɓa ana, Yesu ke dey ava ndana hay gaa dapa cəvey. Yesu pəla! E ŋgwedefec ma, gege:

²⁶ «Daha ndana a wal mecəpiyey sə, a lada e de weliyey ka fəna papaŋ va mamaŋ, ka fəna ŋgwaza va wudiya hay, ka fəna malamaŋ va dəmaŋ hay. Asaya, kwa mesfen tata. Daha aabay sə, a zlafa manjah ka nda masasəraka jene taaɗaw aabay.»

²⁷ Nda masa a zlafa maɓəs marga masa a ta ŋgatafa mafay te mecəpiyey aabay sə, ŋgesey, a zlafa manjah ka nda masasəraka jene taaɗaw aabay.

²⁸ Yaw, daha ndana deveŋ akwar a wal malam way mazlakava ana, a wulaka mambəla ana ɗagay, way ana a kəs səlay ecuwey? Ava dəɓa ana, a wuzaɗa daha səlay tata ana a ta husan te meŋgə mezlər tata ana fakwanay.

²⁹ Daha səlay ana a husa bay, amaa ka zlar matatah dar ta way ana, ŋgesey, a ta zlafa mandəvda malam way ana aabay. Dapa ŋgesey ana ndana hay fakwanay mawala way ana sə, ac ta sasarafa.

³⁰ Ac te gweɗ, gege: «Nda nesey, ka zlar malam way, amaa ka zlafa mandəvda aabay!»

³¹ «Yaw, daha bay a wal meŋgə vəram ava bay mekele, a wulaka ma da yaŋ ndah tata bakatar kuraw ɗagay, daha a ta zlafa makəɗa bay leŋgeɗ masa e te dek ava ndah tata bakatar kwakwar ecew ana avəda kwa.

³² Daha a wala a ta zlafa bay, a zlar madərlam tata hay kad vara bay leŋgeɗey dapa masa aŋga dəreŋ heley. A da nəkafa jə ta madərazl ma ta manjah dapa metehey dapa taɓa teceŋ.»

³³ Yesu ke gweɗec saya, gege: «Ara aŋga ana, kwa waawa deveŋ akwar masa ka gərda zleley tata va ndah tata fakwanay ke te cəpiyey aabay sə, a zlafa manjah ka nda masasərak jene taaɗaw aabay.»

Ma da yaŋ fəceɗ

³⁴ Yesu ke gweɗec saya, gege: «Fəceɗ sə, jə mambəla ana. Amaa daha fəceɗ ana e cən sabay sə, ma da ŋgana masa e de cən saya sə, gwagumaw?

³⁵ Fəceɗ ana a jəna nda ɓasabay. Kwa ke kwi kad ley ara gəraŋ sə, mambəla ana ɓasabay. Ac ta həliya, ac ta tamda fa vara taambəla. Daha nda masa aŋga ava zləmay ɓa sə, da cəna ma ana mambəla ana.»