Lukas 10 - Ma Majawa Waya

Yesu e zlerdec ndah masasəraka jene tata

¹ Ava dəɓa ana, Bay Mazlakava ka zal ndah masasəraka jene tata mekele kwakwar tasəla dapa yaŋ ana ecew, e de zlerdec ecew ecew fəma tata kad pe berne hay fakwanay va gəva hay fakwanay masa a ta də kad pa.

² Ke gweɗec ava ma maɗəva, gege: «Jene hay ke ŋgə de ley macəkuma bay, amaa ndah te meŋgek jeŋ ana hay pahata. Ara nesey, manəkaw vara bay te ley ana e de zlərek ndah te mezlərey kad veŋ ana.

³ Yaw, ara nesey, madaɗay, ya zlardakwar ara Wut ta təmak hay kad pa taɓa ta wagalak hay.

⁴ Akwar ta kəs səlay pa ha bay, akwar ta kəs bakatar bay, kwa tahkar, akwar ta kəsiya daha bay, akwar ta pəsa vaw dapa cəv te megweɗ fa vaw ava ndana hay bay.

⁵ Daha akwa səhw kad way ta ndana, macaaca ana sə, megweɗey, “Meteh ta Zlavay da njah da hwaɗ ta way nesey”.

⁶ Daha nda mayaha meteh ta Zlav da way ana ɓa, ŋgesey, mapəsma takwar a ta njah da yaŋ ana. Daha nda mayaha meteh ta Zlav da way ana aabay sə, mapəsma takwar a ta vahafakwar.

⁷ Daha ndana hay da way ana ac ka kəsakwar, manjah da way ana faŋga, mandə jene va masə jə masa ndah ana ta vakwar, afa nda maŋga mezlərey sə, a ŋgat meyəv te mezlər tata. Akwar ta də fa way fa way ka ta yah jə ta mandə bay.

⁸ Daha akwar ka husata pe berne wula wula, masa ndana hay faŋga ac ka kəsakwar sə, mandaw jene hay masa ndah ana ta vakwar.

⁹ Membəlec ndah gwabay masa ac faŋga, megweɗeceŋ: “Meŋgə bay ta Zlavay sə, ka husafakwar cay”.

¹⁰ Amaa daha akwa husa pe berne masa ndana hay aca wal makəsakwar bay sə, madaɓa pa slam masa ndana hay dapa ɓa, megweɗec fakwanay:

¹¹ “Kwa melbelbe te berne takwar fe sek taciya sə, anda sləvakwaɗay, a wal magwaɗakwar, akwar ke ŋgə jə mambəla ana aabay. Amaa masəna meŋgə bay bay ta Zlavay sə, ka husakata cay”»

¹² Yesu ke gweɗec saya, gege: «Ya gwaɗakwar eve metehwe ana, pas masa Zlav e te təɗec ma a yaŋ ndana hay sə, e te ŋgedec marga mabay kad ndah dapa berne ana mafəna ta ndah dapa berne ta Sawduma.»

¹³ «Wabaw! Akwar ndah dapa berne ta Kurazeŋ! Marga a ta ŋgadakwar hahar. Wabaw! Akwar ndah dapa berne ta Baytisayda! Marga a ta ŋgadakwar hahar. Ye ke ŋgə cah hay mabay dapa taɓa takwar. Cah hay masa ye te ŋgec da varakwar nesey sə, daha ndah dapa berne ta Tir va berne ta Sidaŋw ac ka wala sə, ac ka ŋgwada rav teceŋ. Ac ka pə rəkwat ta bakatar hay fa vaw, ac ka gwadəbal vaw dapa meləwec, e de ŋguzdek ac ka ŋgwada rav tec dapa vavara cay.

¹⁴ Aŋga pas ta matəɗ ma sə, matəɗ ma te Tir va ta Sidaŋw a ta ŋgata afəcaka da yaŋ takwar.

¹⁵ Akwar, ndah dapa berne ta Kafarnahum, akwa wulakiya sə, Zlav a ta baŋgaɗaɗakwar avəda kad a wudam geyey? Away, sesəker Zlav a ta bəraŋgaɗakwar kad pa vavara ta ndah maməca.»

¹⁶ Yesu ke gweɗec saya, gege: «Nda masa a cənakwaɗ ma takwar sə, a ŋgə ŋgesey, a cənawa ma aɗaw may. Amaa nda masa ka kəs ma takwar aabay sə, a kəs bay ŋgesey, yey. Nda masa ka kəs ma aɗaw aabay may sə, a kəs bay ŋgesey nda mezlərekiyey.»

¹⁷ Ava dəɓa ana, maslaŋ hay te Yesu kwakwar tasəla dapa yaŋ ana ecew sə, ec ke vehek eve meweslə mabay, ac ka gwaɗa Yesu, gege: «Bay Mazlakava, dapa masa anda gweɗ eve mezel takaa sə, kwa damkwaw hay ac ka cənandan ma.»

¹⁸ Yesu ke vehecen, gege: «Yey, ya ka wala Saadan e təɗek da wudam ara mewecəkeɗ ta yam te ŋgek da baymaləvaŋ kad fa vara.

¹⁹ Mawala, ya ka vakwar matimaazlaɓ ta mambərasl zezekw hay va rac hay va gədaŋ mazlakava ta maslagəra. Ara nesey, kwa jene ma ta ŋgakwar aabay.

²⁰ Amaa akwar te wesl mafay ta masa mesfen hay maləza ac ka cənakwaɗ ma bay. Amaa meweslə mafay te mezel takwar hay mavinda da baymaləvaŋ.»

Maŋguzad jene hay kad wudeh mekweskwes ana

²¹ Faŋga faŋga ana, Mesfen Mavəna ka vana meweslə kad Yesu mabay. Yesu ka hahəm Zlav, gege: «Papa, Bay Mazlakava da yaŋ jene hay da baymaləvaŋ va fa vara, ya ŋgakaa wasay, mafay ta masa ke te ŋguzdek mambəla ana takaa kad ndah masa aca sən jene bay ara wudeh mekweskwes ana. Amaa ndah masa ac eve leŋgesl va ndah masəna jene hay sə, ka ka raɓda mambəla ana takaa fa yam te ndey teceŋ. Aŋga, Papaŋ, kaa sə, ka ka walaw e de ŋgə ara aŋga ana cay.»

²² Yesu ke gweɗec ndana hay, gege: «Papa ka vuwa jene hay fakwanay pa ha taaɗaw. Kwa nda amta masəna Wut ta nda aabay, say Papaŋ, kwa nda amta masən Papaŋ aabay may, say Wudiya va ndah masa a wal meŋguzdeceney.»

²³ Ke ŋgwedefec ma ndah masasəraka jene, ke gweɗec babəla tec, gege: «Meweslə ɓa kad ndey hay masa ac ka wala jene hay masa akwar ta wala nesey.

²⁴ Yaw, ya gwaɗakwar, ndah mehwedek ma ta Zlav zleezle va Bay hay gaa, ac ka wal mawala jene hay masa akwar ta wala təlam nesey, amaa ac ka wala aabay. Ac ka wal macəna jene hay masa akwar ta cəna təlam nesey, amaa ac ka cəna aabay.»

Mawal vaw sə, aŋga cəv ta maŋgat manjah katar ka midakw

²⁵ Faŋga ana, nda masasəraka ma majawa ta Muyiz kad ndana hay ɓa, ka wal macak Yesu. Ke zleftek ka nəkafa, gege: «Nda masasəraka nda, ya da ŋgana gwagumaw masa ya da ŋgat manjah katar ka midakw?»

²⁶ Yesu ka vahan, gege: «Mavinda dapa ma majawa tandakwa sə, a gwaɗandakwa gwagumaw? Masa ka jaŋgiya sə, ka cəna e gweɗ gwagumaw?»

²⁷ Nda ana ka vahan kad Yesu, gege: «Ma ana ke gweɗ, gege: “Wal Bay Zlavay ava rav takaa fakwanay, eve mesfen takaa fakwanay, ava gədaŋ takaa fakwanay, eve leŋgesl takaa fakwanay. Asaya, wal maslavda takaa ara ka ta wal yaŋ takaa.”»

²⁸ Yesu ka gwaɗa saya, gege: «Ma takaa təɗe. Daɗ ta ŋgaw ara aŋga ana, ka da ŋgat manjah katar ka midakw.»

Nda Samariya mambəla ana

²⁹ Amaa nda ana ka wal meŋguzdek yaŋ tata sə, aŋga nda maŋga mezlər eve cəvey ana. Mafay ana, ka nəkafa Yesu saya, gege: «Maslavda aɗaw sə, ndana wa?»

³⁰ Yesu ka vahan ava ma maɗəva, gege: «Nda Zuwef ana ɓa ke zleftek de Zeruzelem, ke dey kad Zeriku. Dapa medə tata sə, ac ta cə yaŋ ava makar hay. Makar ana hay, ac ka təhaza avəda, ac ka kəɗa mabay, gazləbarayaɗ ha fa vara, ac ka həlan jə tata hay avəda fakwanay, ac ka gərda faŋga dapa cəvey ana, ec ke hweyeceŋ.

³¹ Ava dəɓa ana, ndaakwas ɓa, ke dey jaka pe cəvey ana. A ta wala nda masa makar hay ta kəɗiya sə, ka ŋgəlana vaw ava zlalav, ka data.

³² Ava dəɓa ana saya, ndaakwas mekele ɓa, aŋga deveŋ tərsam te Levi ke dey jaka pe cəvey ana ŋgesey. Dapa medə tata, a ta wala nda masa makar hay ta kəɗiya sə, ka ŋgəlana vaw ava zlalav, ka data ara nda macaaca ana sə, jaŋgata.

³³ Amaa nda məlaŋ ana ɓa, aŋga nda Samariya ana, ke dey jaka pe cəvey ana may. Mahusa tata a cak ta nda masa makar hay ta kəɗiya sə, ka wala ka ŋgafa metekwen macəkuma bay.

³⁴ Ka ŋgucafa vaw nda ana, ka cəhafa mal va menjev fe mbəlek tata ana, ka təkaɗa ava rəkwat mambəla ana. Ava dəɓa ana, ka zəɓaɗ fa zaŋgwa tata, ka hwadaɗ pə way ta manah məlaŋ hay aca ra pafa ndey.

³⁵ Tedew ana, masa a ta daɓa kad maŋgway tata sə, ka vana səlay kad bay ta way ana, ka gwaɗa, gege: “Pafa ndey nda aɗaw nesey. Pas masa ye te vehek da maŋgway aɗaw sə, yey ava yaŋ taaɗaw, ya ta pəlakaɗ jene hay masa ka ta nasiya mafay ta nda ana nesey ava dəɓa taaɗaw fakwanay.”»

³⁶ Ava dəɓa ta ma ana, Yesu ka nəkafa nda mesesərekecen ma majawa kad ndana hay sə, saya, gege: «Ara mawulak yaŋ takaa sə, deveŋ ndah mahkar nesey sə, maslavda ta nda masa makar hay ta kəɗiya sə, wa?»

³⁷ Nda ana ka vahan, gege: «Maslavda tata sə, nda maŋgafa metekweney.» Yesu ka gwaɗa saya, gege: «Daɗ ta ŋgaw ara aŋga ana.»

Yesu aŋga da way ta Marta va Maaray

³⁸ Yesu va ndah masasəraka jene tata ac dapa medey dapa cəv heley. Mahusa tec pa wunam ɓa, faŋga, ŋgwaz ɓa mezel Marta ke kəseceŋ kad way tata.

³⁹ Marta ana sə, aŋga ava dəmaŋ ɓa mezel Maaray. Maaray sə, tata ka njahata a cak ta Bay Mazlakava, a cəkafa zləmay fa ma tata.

⁴⁰ Marta e ŋgə mezlər hay mekele mekele de kəɗek. Ke dek kad vara Yesu, ka gwaɗa, gege: «Bay Mazlakava, dəma ka gərawa mezlər hay fakwanay ara nesey kad yey sə, a wafakaa geyey? Gwaɗa e de dek jəniyey.»

⁴¹ Bay Mazlakava Yesu ka vahan, gege: «Marta, Marta, ka dəŋgazlə yaŋ takaa mafay te mezlər elehey.

⁴² Amaa jə mazlakava mambəla ana pal amta ɓa te meŋgey. Jə masa Maaray a ŋgiya nesey. Maaray sə, ka yah meŋgə jə mambəla ana masa ndana a zlafa makəsan bay.»