Salmo 26 - Kuna San Blas

Innikidaedgi-sunmaklenaid

David we-namaked narmaksad.

¹ Bab-Jehováʼye, an-akar-akar-gudisulid be oyoge. Begi an bengussulid, begi gwen an bangussulid.

² Bab-Jehováʼye, be an-wilubdake, an-ulubse be an-dake, bela an-binsanaid be dake, an-gwage-naid bela ulubse be dake.

³ Be-sabed an nue wisid, an be-igar-napiragwadba nanadiid.

⁴ Dule-galagwensurdamaladbali an nanadisulid, wagar-darbodamaladbali an sigdisurbalid.

⁵ Dule-galagwensurdamalad an isdarsun-daked, dule-isganamar an-aiga an imakdisulid.

⁶ An ibmar-isganase-achadisulidba, an-argan swilidik gued. Agala, an sunna nabir be-ibmar-ogumakleged-aila-ebirdii gued.

⁷ Bab-Jehová, agi be-nug-odummogegala, an binnasur namakdii guoed, be-ibmar-dakledisulid-imaksad-barsogegala, an binnasur gordii guoed.

⁸ Bab-Jehová, bese-gorleged-neggi-be-maidbina an nue-soged, be-gargangued-oyomaid-negbina an nue-soged.

⁹ An burgwisale, dule-galagwensulid-abargi, dule-gindakmalad-abargi, mer megega be an-imako.

¹⁰ Ar unnila, we-dulemar ibmar-isganabi imakdimalad, emar-yardakedginbi binsadimalad, manigi emar-binsaed-gaed gudimalad.

¹¹ Bab-Jehováʼye, andi innikigwadba gudiid. Be an-bendake, wile be an-dake,

¹² ar an inniki nanadiid. Bab-Jehová, dulemar-onmakmalad-abargi, an be-nug-odummodii an guoed.