Proverbios 9 - Kuna San Blas

Binsaed-Nikagued, binsaedsulidaedse gochad

¹ Binsaed-Nikagued na e-neg-sobsad, e-buarmar walagugle (7) ogwichisad.

² Binsaed-Nikagued iba-dummad onosad, vino-nued imaknai gualid, mese guakwaa siinai guarbalid.

³ Binsaed-Nikagued, e-garda-berbemalad barmisad, neggwebur-siid-birise barmisad agi iseedi gorbukwa gumalagar.

⁴ Dule-binsaedsurmaladga weyob sogded: “Dule-binsaedsurmalad, anse be dagmala.

⁵ Dagmala, an-mas-nued gundamala, an-vino-oburusad be gobdamala.

⁶ Ar be nabir-gudii gubimalale, be binsaedsuli-gudimalad osulomalargebed, binsaed-nikaa be gudigumalargebed. Deyobi, geb be nabir-gudii guoed.”

Dule-isgana-e-daed, degi, dule-binsaed-ibed-e-daed

⁷ “Be dule-gwen-nabir-dasurmaladse be gotedibe, melle ibmar-isgana be imakye, aka bese-urwega ese be goloed. Ar be dule-isganase uluddibe, aka bese-urwega guoed.

⁸ Dule-gwen-nabir-dasulidse, mer be gole. Aka sae-be-dakega ese be goloed. Dule-binsaed-nikadse be gotedibe, mer ibmar-isgana be imakye, we-duledi, be-sabguoed.

⁹ Dule-binsaed-nikagued be odurdakele, a-dule, bur bule binsaed-nikaa naoed. Dule-inniki-gudiid be odurdakele, a-dule, bur bule binsaed-nikaa naoed.

¹⁰ ”Dule binsaed-nikarba-gubidibe, Bab-Jehová-dobekwaa-gudii guergebed, Dule, Bab-Dummad-Isligwaled wisgubiele, ibmar-wisirba-gued na oyonaid.

¹¹ Ar ani, Binsaed-Nikagued, angi be-ibagan-gudiid suitii guoed, an-nukad deyob guoed. Be-burba-dula-gudiid birgaba sugumai guoed.

¹² Be nabir-binsaed-nikarbaddibe, we-binsaed-nikagued ibnuedga bega gunonikoed. Be galagwensulidaeddibe, na be dukin nunmaked-itodii guoed.”

Binsaedsulidi, binsaed-satemaladse gornaid

¹³ Binsaedsulid, yaisur neg-gagadaed, gwen ibmar wissulid, gwen nabir binsasurbalid.

¹⁴ Binsaedsulid, e-neg-yawagak-naba sigoed. Neggwebur-dogedgine, bela-e-dakmalagala, neggwebur-birigwagi sigoed.

¹⁵ Binsaedsulid, dule-igarba-gudidamaladse gorsidaed, binsaedsate-gudidamaladse gorsidaed.

¹⁶ Weyob dule-binsaed-satemaladga sogdedaed: “Be anse dagmala.

¹⁷ Dii-atursaaled bur-nued gobleged, mas-nued arbakee-dukuar-gullegedi, bur-nued gulleged.”

¹⁸ Ar we-dule-binsaed-satemaladdina, agi burgwed-amileged wissurmalad. Ar dule-binsaedsulidba-ibsasmaladi, emisgindi neg-urba mamaid.