Proverbios 16 - Kuna San Blas

¹ Dule na e-gwagegine-soged, ibmar-imakoye, degi-inigwele, ibmar-imakleged Bab-Jehováʼse bergusiid.

² Dule na bela-ibmar-imakedi, inniki-imakdiiye-bied, degi-inigwele, Bab-Jehová sogoed, bule ibmar-inniki-imakdidibe.

³ Be ibmar-imakbied, Bab-Jehováʼga be uke, deyob be imakele, nabir bega igarga gunonikoed.

⁴ Bab-Jehová-ibmar-imakedi, igar-nikaa imaked. Ar dule-isganagase-bakale, odurdakleged-iba ega imaklesmogad.

⁵ Bab-Jehová dule-na-san-buled-imakdiid gwen-nabir-daksulid, ar we-dule sogedba-odurdaklegedsegad.

⁶ Isgued-nudaklegegala, unnila sabgued-nikadba, degi, innikigwadba nudakleged. Bab-Jehová-dobekwaa-gudiidgine, isguedgi banguleged.

⁷ Bab-Jehová dule-e-daed nued-dakele, dule-e-isdarmaladse-bakale, ebo-nued-gudii imakbalid.

⁸ Dule ibmar-isgana-imakdiidgi ibmar-bukidar-amied, aba bur nuedid, dule ibmar-inniki-imakdiidba wis-belagwasaar-gudii gued.

⁹ Dule ibmar-imakoye na sogedi, Bab-Jehová-sogedba we-dulega ibmar-gumai guoed.

¹⁰ Ar rey-sogdibe, ibmar deyob guoye, rey-igar-mesnonikidi irgwen-sogar meged.

¹¹ Nibir-innikigwadi, nibir-e-bate-sogedbalid, Bab-Jehováʼgadid, ar Bab-Dummad bela ibmar-wilubsaleged imaksad.

¹² Rey, ibmar-isgana-imaklegedi nabir-daksulid, ar e-garganguedi, unnila ibmar-inniki-imaklegedgi siid.

¹³ Rey, gayaburba-innikigwad-sunmakleged yeer daked, dule-napiragwad-sunmakedi, nued dakbalid.

¹⁴ Rey-e-urwedi, burgwed-igar-daged obared. Dule-binsaed-ibeddina, rey-e-gwage bogidik imaked.

¹⁵ Rey weligwaledba-emar-dakedi, igar-nuegan-oyoged. Rey-emargi-nued-binsaedi, dii-wieyob gued.

¹⁶ Or-nued-nikuedba, binsaed-nued-nikued bur-nuedid. Mani-nikuedba, ibmar-nue-wisigued bur-nuedid.

¹⁷ Dule-innikidaedi ibmar-isganaba nanadisulid. Dule-deyob-gudiidi na san-burba-bendakdiid.

¹⁸ San-odummolegedgine, ibitoged-igar maid. San-dummarba-imaklegedgine, yoleged-igar maid.

¹⁹ Dule san-dummarba-imakdimalad-abargi ibmar-nuegan-abingaedba, bur nuedid, dule-mesagwar-gudimalad-abargi wilesakwasaar-gudii gued.

²⁰ Dule gayaburba-itogedi ibmar-nuegan amied. Dule Bab-Jehováʼgi bengudisulile, ise-nued egi binsalesad.

²¹ Dule-binsaed-ibed-sunsogedgindi, sogleged, dule-gurgin-nued-nikadye. Dule gayaburba-nuedgi-sunmaked, dule-eba-daega imaked.

²² Dule-itoakwaa-ibmar-imakedi, undar-gudiguoed. Dule-binsaedsulidaeddina, e-binsadiidgi na sabsur-odurdaklegoed.

²³ Dule-binsaed-ibed-sunsoged, e-sunmaked nabir na bargaed. E-gayaburba-sunmakedgine, ibmar-nuegan-wisguleged onisiid.

²⁴ Gayaburba-nuegan achanis-malegedyobi, gwage-ulubgine yeer-ito emar-imaked. Gayaburba-nuegan, san-burbagala ina-nuediyob gued.

²⁵ Imbagwenale, dule, na e-ibmar-imakedi inniki-imakye bidaed, degi-inigwele, e-ibmar-imakedgine, sunna burgwed-igar amied.

²⁶ Dule-arbadiid mas-gunnega arbaergebed, ar e-ukumaad-itoged oarbaega-imaked.

²⁷ Dule-isgana, unnila igar-isgana-imaked amidiid. E-sunmakedi, igi-soo-ibmar-ogumake, deyob emar-imaked.

²⁸ Dule-isgana, emarga urwed-amied. Dule-binsa-yogasaar-ibmar-sogedi, ai-nuegan-mamaredid.

²⁹ Dule-gadi-urwed e-ai-yardakerbad, e-ai-galagwensulidae imaked.

³⁰ Dule-ibyagi-sunmaked, ibmar-isgana-imakedgi binsadaed. Dule-gaya-gunnar-imaked, ibmar-isgana bato imaksa gudiid.

³¹ Dule-selebagus-nono-sipu-gudiidi, ologurgin-nikayob gudiid. Ibmar-inniki-imakdiidbali, e-nug ogannolediid.

³² Dule-na-niga-gandik-oyodiidba bur-nuedid, dule-na-e-gwage-bargaed-nika gudigued. Dule gandikidgi neggwebur-suedba bur nuedid, dule na san-bargaed-wisi gudigued.

³³ Ibmar-imaklegegala, wilub-daklegar imakleged. Degi-inigwele, ibmar-guoed, Bab-Jehováʼse bergusiid.