Génesis 30 - Kuna San Blas

¹ Raquel geg Jacobʼga mimmi-bake-itoargu, e-ior-Leaʼgi nobgualid. Raquel e-sui-Jacobʼga sogded: —¿Ibiga geg be anga mimmi bake? Mimmi an abege. Be anga baksulile, an burgoed.

² Jacobʼdi Raquelʼse uluded, ega sogded: —¿Ar ani an Bab-Dummadsi? Ar Bab-Dummad geg mimmi-bake be-imaksad. Ani an deyob be-imaksasulid.

³ Geb degine, Raquel Jacobʼga sogded: —An-mai-Bilhaʼse be gole. A-omegwa mimmigan-nikusale, an-sunnad mimmigan-nikusadyob an guoed.

⁴ Weyob Raquel e-sui-Jacobʼga e-mai-Bilha-uksad, adi, Jacob Bilhaʼse golegar. Geb degine, Jacob Bilhaʼse gochad.

⁵ Agi, Bilha bonigwar gunonikid, Jacobʼba machi-wargwen baknonisunnad.

⁶ Geb degine, Raquel sogded: “Ar Bab-Dummad anga igar-nued imaksad. Ar Bab-Dummad an ese-gordiid an-itosadba, anga machigwa uknonikid.” A-ular, we-machigwa Danʼye nugguoed.

⁷ A-sorbali, Raquel-e-mai-Bilha machigwa-baid Jacob-ebo baknonibalid.

⁸ Agi, Raquel sogded: “An-iorbo an nue-urwedii gusad, emidi an egi obichad. A-ular, we-machigwadi Neftalíʼye nugguoed.”

⁹ Lea geg bar mimmigan-bake-itoargu, e-mai-Zilpaʼye-nugad, Jacobʼga uksad, adi, Jacob Zilpaʼse golegar.

¹⁰ Agi, Zilpa Jacobʼba machigwa baknonikid.

¹¹ Geb degi, Lea sogded: “¡Ibiyob nued angi binsalesa!” A-ulale, a-machigwa Gadʼye onugsasad.

¹² Geb a-sorbali, Lea-e-mai-Zilpa Jacob-ebo machigwa-baid baknonibalid.

¹³ Geb agine, Lea sogded: “¡Yeer-itoleged! Emigindi, omegan sogmaloed, ande weligwar-itoye.” A-ulale, machigwa Aserʼye onugsasad.

¹⁴ Ibagwengine, orosgi-dakleged-trigo-weed-ibagangine, Rubén sapurba naded. Agi, sapi-bipi-sanmar mandrágoraʼye-nugad amisad. A-sapi-bipi-sanmar e-nan-Leaʼga sesad. Raquel a-sanmar-daksagu, Leaʼga sogded: —Mandrágora-e-sanmar be-machi-bega-senonikid, wis be anga udamoga.

¹⁵ Ar Leaʼdi abin-sogded: —¿Ar emide, be angi-sui-egwachad, unni be itosursi? Ar emide, mandrágora-sanmar an-machi-anga-senonikid be abebalid. Raquel abin-sogded: —Be-machi-mandrágoraʼmar-bega-senonikid be anga ukele, emi-mutik Jacob bese goloed.

¹⁶ Sedogidba, Jacob sapurba-gudidanigu, Lea Jacob-abin noded, ega sogded: —Emi-mutik be anse goloed, ar ade, an-machi mandrágora-e-san-anga-senonikidbo an be-ogwasad. A-mutik, Jacob, Leaʼse gochasunnad.

¹⁷ Bab-Dummad Lea-ese-goled-itosadba, Lea bonigwar gunonisunnad. Lea wesega Jacobʼga masmala walatargus bakdanikid.

¹⁸ Geb degine, Lea sogded: “Ar an-suiga an-machi an uksadbali, Bab-Dummad nabir angi binsasad.” Lea we-machigwa Isacarʼye onugsasad.

¹⁹ Geb a-sorbali, Lea baid-machigwa Jacob-ebo nikunonibalid. Agi, machimala walanergwa (6) guded.

²⁰ Lea sogded: “Bab-Dummad ibmar-nued anga uksad. Emigindi, an-sui bur-yeer an-dakoed, ar ade, an ega masmala walanergwagus (6) nikudanikid.” A-ulale, we-machigwa Zabulónʼye onugsasad.

²¹ Napidgine, Lea bunolo nikunonikid. A-bunolo, Dinaʼye onugsasad.

²² Bab-Dummad Raquelʼgi nued binsadmogad. Bab-Dummad Raquel-ese-goledi itosad, mimmigan-nikuega imaksad.

²³ Geb degine, Raquel bonigwar gunonisunnad, machigwa ega uklenonikid. Agi, Raquel sogded: “An geg-mimmi-bakedba an-bingegudiidi, Bab-Dummad anga osulosad.

²⁴ Bitigi Bab-Jehová baid-machigwa anga ukbalina gadin.” A-ulale, machigwa Joséʼye onugsasad.

Jacob ibmar-ibedga gusad

²⁵ Raquel goe-José-baksad-sorbali, Jacob Labánʼga sogded: —An-yarse gannar an naega be anga igar uke.

²⁶ Ar be nue-wisid, igi an-omegan-ular an bega arbasa. Degisoggu, an-omeganga, degi, an-mimmiganga be igar uke, anba namalagar.

²⁷ Ar Labánʼdi abin-sogded: —Ar nued be angi binsaele, mer be nagwele, wis be napi-begwele. Ar an nerse-oyosadba an wisgusad, be-nukad, Bab-Jehová ise-nued angi binsamaid. Labán Jacobʼga sogdebalid:

²⁸ —Anga be sogdo, igi-manigi anga be arbaoe. An be-bennukoed.

²⁹ Geb degine, Jacob ega sogded: —Ar nue be wisid, igi an bega arbasa, igi an bega be-ibmar-durgan an akwisa.

³⁰ An-nonikid-idu ibmar-ichee-be-nikadi, bega napiragwad merguded, ar ade, an bese nonikid-akar Bab-Jehová ise-nued begi binsasad. Degite, ¿emide, sana an-mimmiganga an na arbadmogosunna?

³¹ Geb Labán Jacobʼse egisdesunnad: —Degite, ¿igi-mani be-bennukbi be an-abesunna? Jacob weyob abin-sogded: —Mer be an-bennuke. Ar ibmar an bega sogoed nabir be itogele, napi an bega be-sibad-wawaadmar an edarboed.

³² Emi an be-sibadmar-abargi, bela sibad-wawaadmar-gutu-nanaimalad, mata-matamalad, sibad-wawaad-senigan-sichigana egwaoed. Deginbali, sibadmar-gutu-nanaimalad, mata-matamalad an egwabaloed, adi, weyob-daklemalad angadga guegar. We-ibmar-durgangi be an-bennukodo.

³³ Degisoggu, ibagwengi be dakdanikogu, be dakoed, an bule ibmar-inniki-imaked-duledibe. An-sibadmar-abargi, sibad-gutu-nanaisurmalad, mata-matasurmalad, sibad-wawaad-senigan-sichiganasurmalad gudiile, an bei atursasdo.

³⁴ Labán Jacob-abin sogded: —Nueddo. Be-sogedba an imakodo.

³⁵ Degi-inigwele, aka Labánʼdi, a-ibagi, e na sibad-machergan bara-baramalad, mata-matamalad, sibad-omegan gutu-nanaimalad, wis sipu-sipu nanaimalad, degine, sibad-wawaad-sichigana, bachikii urbisad. Geb degine, Labán e-masmalaga uksad, adi, ega akwemalagar.

³⁶ Geb Jacobʼgi we-sibadmar-obanguegala, ibapaa-bangu-nanalege-wilub sesad. Jacobʼdina, sibad-baigan Labánʼga akwedii gusad.

³⁷ Jacob we-sapi-e-anagan siksad: Álamo-e-ana, almendro-e-ana, degi, castaño-e-ana. Degine, amar-sapi-anagan bara-bara-daklegegala, a-e-uka saguar-saguar esisad.

³⁸ Geb degine, sibadmar-dii-gobnonidamaladgi sibadmar-asabin, a-sapi-anagan-bara-bara-dakleged urbisad. Ar ade, agi sibad-machergan sibad-omegangi nakwenonidamalad.

³⁹ Ar suarmar-bara-barad-asabin sibadmar nakwedamarsoggu, e-mimmigan bara-bara, gutu-gutu, degine, mata-mata gwalulemamaid.

⁴⁰ Geb degine, Jacob a-sibadmar Labán-e-sibadmar-bukwad-asabin bachikii urbisdaed. Weyob Jacob Labán-sibadmargi na e-sibad bachikii urbemai gusad.

⁴¹ Sibadmar-bur-wardadamalad omegi-nakwed-irbali, Jacob sibadmar-dii-gobedgi suarmar-bara-barad urbisdaed, adi, omegi nakwialile, suarmar-bara-barad dakegar.

⁴² Ar sibadmar-garagana-nakwialirdi, Jacob suarmar-bara-barad urbedasulid. A-ulale, sibadmar-garagandi, Labánʼgad daed. Sibad-wardummagandi, Jacobʼgad daed.

⁴³ Weyob Jacob mani-ibedga gunonikid, ichesur sibadmar-wawaad, maigan-machergan, maigan-omegan, moli-yargan-muremalad, degine, moli-uayasuigan-nika gunonikid.