Génesis 25 - Kuna San Blas

Abraham Ceturaʼga mimmigan-baksad

¹ Abraham ome-baid-nikusbalid, a-ome Ceturaʼye nugad.

² A-omebogwa, mimmigan-nikusad wemalad: Zimram, Jocsán, Medán, Madián, Isbac, Súa.

³ Jocsán-e-masmala, wemalad: Seba, Dedán. Dedán-e-waganmar, wemalad: Asurim-dulemar, Letusim-dulemar, Leumim-dulemar.

⁴ Madián-e-masmaladi, wemalad: Efa, Efer, Hanoc, Abida, degi, Elda. Bela-wemala Cetura-e-wagan gumalad.

⁵ Abraham bela ibmar-nikadi e-machi-Isaacʼga bela uksad.

⁶ Abraham omegan-baiganba-mimmi-nikusmaladgardi, unnila ibmar ega wis ichesaar binsa uksad. Amba Abraham dula-gudigua, e-mimmigan-baigan e-machi-Isaacʼgi dikasur dad-nakwedsik barmisad.

Abraham-burgwisad

⁷ Abraham birga-dulabaabak-gakambe-gakatar-sergu (175) megisad.

⁸ Nue-selebaa-mai burgwisad, ar ade, bato burgwedginmogad. Deyob na e-sergan-burgwarmamaidse megidapmogad.

⁹ E-masmala, Isaac, degi, Ismael, Mamre-dad-nakwedsik akwasaila-ollor-siid-Macpelaʼye-nugadgi, Abraham-digsamalad. A-nainude, Efrónʼgadinad. Efrónʼde Zohar-machid, Het-duled.

¹⁰ We-nainu, Abraham Het-dulemarse baksad. We-akwasaila-ollor-siidgi e-ome-Sara-dikarba Abraham diglesad.

¹¹ Abraham-burgwisad-sorba, Bab-Dummad Isaacʼgi ise-nued binsasad. Isaacʼde dia-naba megidapid. We-diade Lajay-Roíʼye nugad.

Ismael-e-wagan

¹² Ismael, Abraham Agarʼbo-machi-baksadid. Agarʼde, Sara-e-maid, Egipto-duled.

¹³ Ismael-e-masmala e-gwalulesadba ilemakar naid. Weyob nugmalad: Nebaiot. A e-machi-dummad, geb a-yarba, Cedar, Adbeel, Mibsam,

¹⁴ Misma, Duma, Massa,

¹⁵ Hadar, Tema, Jetur, Nafis, degi, Cedema.

¹⁶ Wemala, Ismael-e-masmala-warambe-gakabogwad-e-nugmalad (12). Na megismaladgi, e-nugba neg onugsasmalad. Ar wemala, e-sordamar-e-dummadga gusmarbalid.

¹⁷ Ismael birga-dulanergwa-gakambe-gakagugle-nikadgi (137) burgwisad. Deyob e-sergan-burgwarmamaidse megidapmogad.

¹⁸ Ismael-e-wagana Egipto-yar-asabin, Havila-yar, degi, Shur-yar-abargi, Asiria-yar-igarba, ambikudapmalad. Amba e-gwenadgan egi gwisgunanaigus-inigwele, agi megidapmalad.

Jacob Esaúʼbo gwalulesad

¹⁹ Abraham-machi-Isaac-e-igar weyobdo. Abrahamʼga e-machi-Isaac gwalulenonikid.

²⁰ Isaac birga-dulabo-nikadgine (40), Rebeca-nikunonikid. Rebecaʼde, Betuel-sisgwad. E-susdi, Labánʼye nugad. Amarde, Arameo-dulemalad, Padan-Aram-neggweburgi bukwamalad.

²¹ Rebeca geg mimmi-baked. Degisoggu, Isaac Bab-Jehováʼse ega gochad. Bab-Jehová Isaac-ese-gochad itosad. Agi, Rebeca gurgin-nika gunonikid.

²² Ar warbogwadi amba sapidukugi-mamaiunni, bato gaemamaid. Agi, Rebeca binsaded: “¿Ar ibiga anga weyob gunai? Degisoggu, a-ular, Bab-Jehováʼse igar-aminad gusad.”

²³ Bab-Jehová Rebeca-abin sogded: “Be-sapi-dukugine, neggwebur-sogabo danikid, amba yoo napnegse-aideged-idu, bato neggwebur-sogabogwad na ebo gae-nanaid. Gwensak, baidba bur-dutusur guoed, ia, urba-sogedba nanadii guoed.”

²⁴ Rebeca-e-nugued-ibagan warmaknonikid. Susugwa ega warbo uklenonikid.

²⁵ Gebe-aidenonikidi saila gisii nikad, bela wawaadikid. A-susugwa Esaúʼye onugsasmalad.

²⁶ Geb a-sorba, e-urba e-argan-nailikgi e-ia-maligi-akanai aidenonikid. A-ulale, Jacobʼye onugsasmalad. Deunni, Isaac birga-dulapaa (60) nikad.

Esaú machi-sailaginedga-gued osulosad

²⁷ Masmala-warbogwad dungudmalad. Esaú ibmar-make-duledid. Sapurba-gudiile, yeer-itodaed. Jacobʼdi dule-boo-daedid. Neggi-gudiile, bur-yeer-itodaed.

²⁸ Isaac bur bule Esaú-sabed, ar ade, Esaú-ibmar-maked-gunned yeer-itodaed. Ar Rebecaʼdina bur bule Jacob-sabmogad.

²⁹ Ibagwengine, Esaú sapurba-gudii, nue-geggus nonigua, Jacob ingwa-burwi-gisi-dunai daknonikid.

³⁰ Geb Esaú, Jacobʼga sokalid: —An ukudmaada itoged, wis be anga we-ibmar-gisi-dunaid be udage. (A-ulale, Esaú, Edomʼye bilebalid).

³¹ Jacob abin-sogded: —Nabirdo. Degiile, ar be machi-sailaginedsoggu, bela-bega-ibmar-uklegoed, be anga udagodo.

³² Esaú abin-sogded: —An ukudba burgwedanisoggu, anga-bela-ibmar-uklegoed, an bega ukodo. ¿Ar ibiga bar an we-ibmar abesunna? An abesuli.

³³ Geb Jacob sogded: —Emisbinne, ise-sogar be anga sogdo, deyob an bega ibmar ukedseye. Esaú abin-sogded: —Ise-sogar an bega sogye, deyob an bega ibmar ukedseye. Esaú, machi-sailagined-guedgi-bela-ega-ibmar-uklegoed e-urba-Jacobʼga uksad.

³⁴ Geb degine, Jacob, Esaúʼga ingwa-burwi-gisi-dualed madubo ega uksad. Esaú masgunned-bergusgua, degi, gobsabargua, gwisgusad, geb nadegusad. Weyob, Esaú na machi-sailagined-guedgi bela-ega-ibmar-uklegoedi, baisur-daksad.