Éxodo 6 - Kuna San Blas

¹ Bab-Jehová Moisés-abin sogded: —Emigindi be dakodo, igi an Faraón-imakoe. Emide, an-dutusur-ganguedgine an ibmar-imakedba, Faraón bemarga sogdagoed, ‘bemar namarye.’ Ar an-dutusur-ganguedgine an ibmar-imakedba, Faraón bemarga sogdabaloed, ‘bemar an-yargi nomarye.’

² Bab-Dummad Moisésʼga sunmakdebalid, ega sogded: —Ani an Bab-Jehová gued.

³ Ani an Bab-Dummad-Bela-Gangued-Nikadid. We-nugba Abrahamʼse, Isaacʼse, Jacobʼse, an magarosad. An-nug-Jehováʼye-nugadbardi, an ese magarossulid.

⁴ Deginbali, amar-ebogwa an igar-mesisad, an sogsad, bemarga Canaán-yala an ukoye. A-yargi, Abraham, Isaac, Jacob, e-yarsulidgi sikwas gudigusmalad.

⁵ Emide, Israel-dulemar nunmakedba bodidimalad. Degine, Egipto-dulemar na e-maiga gandikidgi-be-imakdidimalad an itosad. Be-dadganbo an igar-mesisad an iessulid.

⁶ “Degisoggu, Israel-dulemarga be sogna: ‘Ani, an Bab-Jehová gued. Egipto-dulemar-maiga be gubukmaladgi, sabsur be-imakdimaladgi an bemar-onogoed. An-gangued-nikadba an Egipto-dulemar sabsur-odurdakoed. Aba an be-bendakoed.

⁷ Ani an be-sumaloed, an-dulamarga an be-imakmaloed. Ani an be-Bab-Dummadga guoed. ” ’Deyobi, bemar wisgumaloed, ani an be-Bab-Dummad-Jehová gued. Deginbali, bemar wisgumarbaloed, ani an Egipto-dulemar sabsur-bemar-oarbananaimargu an bemar-onosad.

⁸ Abrahamʼga, Isaacʼga, Jacobʼga an sogsagusad, Canaán-yala an bemarga ukedseye. A-yalase an be-nidmaloed. A-yala, degisadegu an bemarga ukoed. Ani an Bab-Jehová gued.’ ”

⁹ Moisés bela weyob Israel-dulemarga sogsad. Degi-inigwele, Israel-dulemar maiga-gudidimalad-ular, nue bukib-itodidimalad-ular, Moisésʼba ibsassurmalad.

¹⁰ Geb degine, Bab-Jehová Moisésʼga sogded:

¹¹ —Egipto-rey-Faraónʼga be sogna, Israel-dulemar-Egipto-yargi-bukwad be onogoye.

¹² Ar Moisésʼdi Bab-Jehová-abin sogded: —Israel-dulemarbela anba ibsassurmalad, ar Faraón-bulesunna. Ar ande nued sunmaksurbalid.

¹³ Geb degine, Bab-Jehová Moisésʼga, degi, Aarónʼga, Israel-dulemargi, degi, Egipto-rey-Faraónʼgi sunmakded. Geb Bab-Jehová Israel-dulemar-Egipto-yargi-bukwad-onogega, Moisésʼga, degi, Aarónʼga igar uksad.

Aarón, Moisésʼbo

¹⁴ Israel-dulemar-e-dadgansik wemar e-gwenadgan-iduedga gumalad: Israel-machi-sailagined-Rubén-e-masmala, wemalad: Hanoc, Falú, Hezrón, Carmi. Wemar Rubén-e-masmala gumalad.

¹⁵ Simeón-e-masmaladi, wemalad: Jemuel, Jamín, Ohad, Jaquín, Zohar, Saúl. We-Saúlʼde, ome-Canaánʼgined-e-machid. Wemala, Simeón-e-masmala gumalad.

¹⁶ Leví-e-masmaladi, machi-dummad-inse, geb bipigwadse, wemalad: Gersón, Coat, degine, Merari. Levíʼdi birga-dulanergwa-gakambe-gakagugle-nika (137) burgwisad.

¹⁷ Gersón-e-masmaladi, degi, e-gwenadgandi, wemalad: Libni, degine, Simei.

¹⁸ Coat-e-masmaladi, wemalad: Amram, Izhar, Hebrón, Uziel. Coatʼdi birga-dulanergwa-gakambe-gakapaa-nika (133) burgwisad.

¹⁹ Merari-e-masmaladi, wemalad: Mahli, degine, Musi. Wemar, garda-maidba Leví-e-gwenadgan gumalad.

²⁰ Amram e-ammor-Jocabed nikusad. Amarga Aarón, degi, Moisés uklenonikid. Amram birga-dulanergwa-gakambe-gakagugle-nika (137) burgwisad.

²¹ Izhar-e-masmaladi, wemalad: Coré, Nefeg, Zicri.

²² Uziel-e-masmaladi, wemalad: Misael, Elzafán, Sitri.

²³ Aarónʼdi, Elisabet nikusad. Elisabetʼde Aminadab-e-sisgwad, Naasón-e-bunad. Geb Aarónʼga, degi, Elisabetʼga machimala-uklenonikid: Nadab, Abiú, Eleazar, Itamar.

²⁴ Coré-e-masmaladi, wemalad: Asir, Elcana, Abiasaf. Wemala, Coré-dulemar-idumaladga gusmalad.

²⁵ Aarón-e-machi-Eleazar, Futiel-e-sisgwa-wargwen nikunonikid. Machigwa ega uklenonikid, Finees. Wemala, Levita-e-gwenadgan gumalad, na e-idumaladid.

²⁶ Ar Bab-Jehová Aarónʼga, degi, Moisésʼga wemar-sunnadga sogsagusad, Israel-dulemar-Egipto-yargi-bukwadi danar-danar na e-gwenadgan-e-gwenadganba be onogoye.

²⁷ Amba Moisés, degi, Aarón, Israel-dulemar-Egiptoʼgi-wilebukwad-onogega, Egipto-rey-Faraón-ebo sunmakap gusmalad.

Aarón Moisés-anar sunmaksad

²⁸ Bab-Jehová Egipto-yargi Moisésʼbo sunmaksagua, ega sogsad:

²⁹ —Ani an Bab-Jehová gued. Bela an bega ibmar sogoedi, Egipto-rey-Faraónʼga bela be ibmar-sogmogoed.

³⁰ Ar Moisésʼdi Bab-Jehová-abin sogded: —Bab-Jehová, ar ande gale-gale sunmaksoggu, ¿igi Faraón an-ibmar-ega-sogedba ibmar-imakosunna? An-sogedba ibmar imakosuli.