Salmos 148 - Chol: I T’an Dios

La' i sub i ñuclel lac Yum pejtel melbil tac bʌ

¹ ¡Aleluya! Subula i ñuclel lac Yum ya' ti panchan. Subula i ñuclel ya' ti chan.

² La' i subob i ñuclel Dios pejtelel i yángelob. La' i subeñob i ñuclel Dios pejtelel i cha'año' bʌ ti panchan.

³ Jini q'uin yic'ot uw, la' i pʌs i ñuclel Dios. Jini ec' tac i t'ojol jax bʌ ti ac'ʌlel, la' i pʌs i ñuclel.

⁴ La' i pʌs i ñuclel Dios jini chan bʌ panchan, Yic'ot jini ja'al am bʌ ti tocal.

⁵ La' i pʌs i ñuclel i c'aba' lac Yum, Come tsi' yʌc'ʌ i t'an, tsa' mejli tac.

⁶ Tsi' wa'choco cha'an mi' yajñel ti pejtelel ora. Tsi' yʌc'ʌ i t'an. Ma'anic mi' q'uextiyel ti pejtelel ora.

⁷ La' i pʌs i ñuclel lac Yum wʌ' ti pañimil, Jini colem bʌ i chʌñil tac ñajb yic'ot i yʌbʌnlel ja',

⁸ Yic'ot c'ajc yic'ot tuñija' yic'ot i ña'al tsʌñal, Yic'ot jini p'ʌtʌl bʌ ic'. Mi' laj jac'ben i t'an.

⁹ Jini wits tac ja'el yic'ot pejtel bujtʌl, Yic'ot te' tac am bʌ i wut yic'ot pejtel jini ch'ujte',

¹⁰ I bʌte'el ja'el yic'ot pejtel alʌc'ʌl, Yic'ot jʌlʌcña bʌ mi' majlel ti lum, yic'ot te'lemut.

¹¹ Jini reyob ti pañimil ja'el yic'ot pejtelel winicob x'ixicob ti mojt ti mojt, Jini yumʌlob ja'el yic'ot pejtel año' bʌ i ye'tel ti pañimil,

¹² Jini ch'iton winicob yic'ot xch'ocob, Yic'ot xñoxob yic'ot ch'itoñob,

¹³ La' i subob i ñuclel lac Yum, Come i bajñel an i ñuclel. Ñumen ñuc Dios bajche' pejtel an tac bʌ ti pañimil yic'ot ti panchan.

¹⁴ Tsi' yʌc'ʌ ti c'uxbintel i cha'año' bʌ. Tsi' cʌntesayob ti c'ay jini israelob cʌntʌbilo' bʌ i cha'an, Cha'an mi' c'ʌyiñob i ñuclel. Subula i ñuclel Dios. ¡Aleluya!