Habacuc 1 - Chol: I T’an Dios

Habacuc tsi' ts'a'le chuqui jontol

¹ Jiñʌch jini t'an tsa' bʌ i yubi ti espíritu jini x'alt'an Habacuc.

² ¿Jayp'ejl to ora yom mic pejcañet c Yum, jinto ma' wubibeñon c t'an? Mic pejcañet ti c'am bʌ t'an: A wocolic coltañon lojon, cho'on, pero ma'anic ma' coltañon lojon.

³ ¿Chucoch ma' wʌq'ueñon j q'uel ili jontolil, yic'ot i maña winicob? Jini jach mulil wolij q'uel ti pejtelel ora. Mi' tic'lañob i bʌ winicob. Baqui jach mic majlel an a'leya yic'ot leto.

⁴ Ma'anix i p'ʌtʌlel a mandar ba' ma'anic mi' jac'ob. Mach tojix mi' yujtel meloñel che' bajche' yom. Come an cabʌl xjontolilob, pero ma'anic jaytiquil tojo' bʌ. Jini xmeloñel mi' ch'ʌm i majtan ti' c'ʌb jini am bʌ i mul. Jini cha'an mach tojic mi' loq'uel jini meloñel.

Lac Yum mi caj i c'ʌn caldeojob cha'an mi' yʌq'uen castigo Judá

⁵ Lac Yum tsi' yʌlʌ: Pam q'uele pañimil. Yom ma' ch'ʌmben isujm. Mi caj i toj sajtel a pusic'al cha'an jini mu' bʌ caj c cha'len, come an chuqui mi caj c mel che' cuxulet to ti pañimil. Ma'anic mi caj a ñope' jinto che' q'uelelix a cha'an.

⁶ Wolic p'ʌtesan jini caldeojob ch'oyolo' bʌ ti Babilonia. Wen jontolob. Mach yujilobic bʌq'uen. Mi' cha'leñob xʌmbal ti pejtelel pañimil cha'an mi' chilob chuqui tac yomob mach bʌ i cha'añobic.

⁷ Wen ch'ejlob jax, wen bʌc'ñʌbilob, come mi' melob che' bajche' jach yomob. Ma'anic mi' jac'ob i tic'ol.

⁸ Ñumen ajñel mi' cha'len xʌmbal i caballo che' bajche' bajlum. Ñumen jontol che' bajche' jini mate'el ts'i' am bʌ i wi'ñal. C'ʌchʌl woli' tilelob jini ch'oyolo' bʌ ti ñajtʌl. Mi' chañ'esañob i bʌ. Ora jach mi' tilelob che' bajche' xiye' mu' bʌ caj i c'ux i colojm.

⁹ Talob i jisañetla. Ma'anic majqui mi' mʌctañob. Wersa mi caj i bʌc' ochelob ti la' tojlel che' bajche' ic' ch'oyol bʌ ti' pasibal q'uin. Ma'anic i tsicol jini cʌchʌlo' bʌ mu' bʌ caj i pʌyob majlel.

¹⁰ Mi' wajleñob reyob yic'ot yumʌlob. Mi' ñumelob ti ts'ajc. Mi' p'ulchocoñob letsel lum ti' t'ejl cha'an mi' letselob ochel. Jini ts'ajc ma'anic mi' mʌctañob. Mi caj i mʌjlel i cha'añob.

¹¹ Ti ora jach mi' ñumelob majlel che' bajche' p'ʌtʌl bʌ ic'. Añob i mul ili winicob come cʌyʌlob ti' dios te' tac. Mi' lon ña'tañob ya' tilem i p'ʌtʌlel, che'en lac Yum.

I t'an Habacuc

¹² C Yum Dios ch'ujulet bʌ, ¿mach ba jatetic jach mero Dioset c'ʌlʌl ti' cajibal pañimil? Ma'anic mi caj c chʌmel lojon, c Yum. Tsa' jach a chocoyob tilel cha'an ma' melon lojon. Xuc'ulet c Yum, c Xajlel. Tsa' wʌc'ʌyon lojon ti wocol ti' tojlel caldeojob cha'an ma' ju'sʌbeñon lojon c pusic'al cha'an mij cʌy lojon c mul.

¹³ Jontolon lojon. Pero ñumen an i jontolil jini caldeojob. Sʌquet. Mach cujchic a q'uel mulil tic tojlel lojon. Jini cha'an ¿chucoch ma' chʌn cuchbeñob i mul jini caldeojob woli bʌ i jisañon lojon? Mach yomic che' jach ma' q'uelob come woli' tic'lañon lojon xjontolilob ñumen cabʌl bʌ i mul bajche' joñon lojon.

¹⁴ Mach lajalonic lojon che' bajche' chʌy mu' bʌ c chuc lojon mu' bʌ c tsʌnsan. Mach lajalonic lojon bajche' bʌte'el tac mach bʌ anic i yum.

¹⁵ Jini caldeojob mi' chucob chʌy ti luquijib yic'ot ti chimo'chʌy. Tijicña i pusic'al che' chuculon lojon i cha'an bajche' chʌy.

¹⁶ Mi' ch'ujutesañob i chimo'chʌy. Mi' lon alob jiñʌch i dios. Mi' pulbeñob pom come ya' tilem cabʌl i chubʌ'an.

¹⁷ ¿Mu' ba caj a chʌn ac'on lojon ti chujquel ti pejtelel ora? ¿Mu' ba caj i chʌn mʌjlel i cha'añob mach bʌ yujilobic p'untaya?