प्रकास 9 - चितवनिया थारु1 वकरपाछा पाँचु स्वरगदुतवा यापन धुतुहा फुकलिय हसे मुइ यकसवासे एगुडा तरगन धरतियामा खसल देखलहिँ। उअ तरगनवाके अतल-कुन्डक चाभि दियलइ। 2 उअ तरगनवा अतल-कुन्ड खोललिय हसे यगियाक जबडि भठियासे धुवा निकडल नहिँया वकरसे धुवा निकडलइ। उअ धुववा बेरियावाक सिघियाके रोकलिय तके यकसवा फेनि यन्हार भेलइ। 3 उअ धुववासे सलहसभ धरतियामा यलइ हसे हुनुकाके बिछिसभ नहिँया काटेके सक्ति दियाइल रहलइ। 4 हुनुकाके घसवा कि गछवासभके किहो हानि झिन करिह, बाकि लिलरवामा परमेस्वरक छाप हइने लगलि मन्सावानिके मतरे सतोइह कहके आग्या दियाइल रहलइ। 5 मन्सावानिके मारबे त झिन करिह, बाकि पाँच महिनालइ खाँ-सतावेके सलहसभ अधिकार पउलइ। वसके सतोइकि उअ मन्सावानिक बिछिया कटले नहिँया खाँ कस्ट हखइ। 6 उअ पाँच महिनामा मन्सावाह मरे त खोजतइ, बाकि मरे नाहिँ पउतइ। हुनुका मरेके इछा करतइ, बाकि मृत्यु हुनुकरसे भगबिय। 7 उअ सलहसभ लडाइमा जायके तहिँया तयार भेल घोडासभ नहिँया रहलइ। हुनुकर मुडियामा सोनक मकुट नहिँया किहो चिजु रहलइ हसे हुनुकर मोहडवा मन्सेसभक नहिँया रहलइ। 8 हुनुकर केसवा जनिसभक केस नहिँया हसे हुनुकर दतवा सिंहक दाँत नहिँया रहलइ। 9 हुनुकर छतिया लोहक छातिपाताक रहलइ हसे हुनुकर डयनवासभक यवाज लडाइमा दगुरलहर बहुत रथ तके घोडासभक यवाज नहिँया रहलइ। 10 हुनुकर पुछिया हसे खिलवा बिछिक नहिँया रहलइ तके पाँच महिनालइ मन्सावानिके कस्ट देना सक्ति हुनुकर पुछियामा रहलइ। 11 अतल-कुन्डक दुत हुनुकर राजा रहलिय। हिब्रु भासामा “एबाड्डोन” हसे ग्रिक भासामा वकर नाउँ “अपोल्लियोन” हखइ। यकर यरथ “नास करलाहर” हखइ। 12 पहिला विपति बितके गेलइ। दु गो विपति यावेके यखना बाँकि बडइ। 13 वकरपाछा छइठो स्वरगदुतवा यापन धुतुहा फुकलिय हसे मुइ परमेस्वरक यागा भेलि सोनवाक वेदियाक चार गो कोनहरवासे निकडल एगुडा स्वर सुनलहिँ। 14 उअ स्वरवा छइठो स्वरगदुतवाके मुइ यसके कहइकि सुनलहिँ, “युफ्रेटिस नाउँ भेलि जबडि लदियामा बन्हलि चार जन स्वरगदुवानिके छाडदिह।” 15 उअ चार जन स्वरगदुतवासभके छाड देलइ, जम्मे संसारक एक तिहाइ मन्सावाह उहे बरसवा हसे उहे महिनावा उहे दिनवा उहे जुनवामा मारेके तहिँया हुनुका तयार कराइल रहलइ। 16 वहवाँ बिस करोड घोडामा चढलाहर सिपाहिसभ बडइ कहके मुइ सुनलहिँ। 17 मोर दर्सनमा देखलि घोडवा हसे घोडवामा सवार करलहरा यसनुक रहलइ। हुनुका छातिपातासभ यागि नहिँया लाल, पियरमडि नहिँया पियर हसे गन्धक नहिँया हरदियार रङक रहलइ। घोडवानिक मुडवा सिंहसभक मुड नहिँया रहलइ हसे हुनुकर मुहवासे यागि, धुवा तके गन्धक निस्कइ। 18 हुनुकर मुहवासे यागि, धुवा हसे गन्धक तिन गो विपति निकडइ रहलइ। उअ विपतियासे मन्सेसभक तिन भागक एक भाग मरलइ। 19 केहकेकि उअ घोडवानिक मुहवा हसे पुछियामा मारना सक्ति रहलइ। हुनुकर पुछिया साँप नहिँया रहलइ हसे जाकर मुड रहलइ। उअ मुडवासे मन्सावानिके खाँ कस्ट दिय। 20 उअ विपतियासे बचलि मन्सावाह यापन-यापन पापि मनवा परमेस्वरवरि हइने फिरोलइ। हुनुका भुत-आत्मासभ हसे हइने देखाह, हइने सुनाह, हइने बुलाह सोन, चाँनि, पितर, पत्थरा तके काठक यपने बनोलि मुरतियानिके पुजा करेके हइने छडलइ। 21 हुनुका मन्सेसभ मारेके, जादु करेके, धुचुड करेके, चोरिक काम करेकेसे यापन मनवा हइने फिरोलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.