प्रकास 8 - चितवनिया थारु

सातु छाप हसे धुप बारना

¹ जब पठवा सातु छपवा खोललसि, तब लगभग याधा घन्‍टालइ स्‍वरगमा सुनसान भेलइ।

² वकरपाछा मुइ परमेस्‍वरक यागा ठडियाइल सात जन स्‍वरगदुतसभके देखलहिँ। हुनुका हरेक जनके एकहक गो धुतुहा दियलइ।

³ सोनक धुप बारना बोकके दोसरे एक जन स्‍वरगदुत याके वेदिया लघिना ठडियलिय। परमेस्‍वरक मन्‍सावानिक परथानासाङे सिंहासनक यागा सोनवाक वेदियामा चढावेके तहिँया वकरेके बहुत धुप दियाइल रहलइ।

⁴ परमेस्‍वरक यागा ठडियलि स्‍वरगदुतवाक हथवासे जरइकि धुपवाक धुवा परमेस्‍वरक मन्‍सावानिक परथानासाङे वपरावरि गेलइ।

⁵ वकरपाछा उअ स्‍वरगदुतवा धुपवा लेके वकरमा वेदियाक यगिया भरलिय हसे धरतियामा फाँक देलिय। तखनहिँ यकसवामा गुरगुरभटभटक यवाज यलइ, चिलकलइ तके भुइचाल गेलइ।

सात गो धुतुहासभ

⁶ वकरपाछा उअ सात जन स्‍वरगदुतवा, जाकरसाङे धुतुहा रहलइ, हुनुका उअ फुकेके तहिँया तयार भेलइ।

⁷ पहिलो स्‍वरगदुतवा धुतुहा फुकलेपर रकत मिझराइल पथरा हसे यागि धरतियामा झरलइ। धरतियाक तिन भागक एक भाग, गछवासभक तिन भागक एक भाग हसे जम्‍मे पियरि घसवाह जरलइ।

⁸ वकरपाछा दोसरो स्‍वरगदुतवा यापन धुतुहा फुकलिय हसे यागि लागल परवत नहिँया देखार चिजु समुनदरवामा झरलइ तके समुनदरवाक तिन भागक एक भाग रकत भेलइ।

⁹ समुनदरवामा भेलि जम्‍मे जिउति प्रनियासभक तिन भागक एक भाग मरलइ तके जहजावासभक तिन भागक एक भाग फेनि नास भेलइ।

¹⁰ वकरपाछा तिसरि स्‍वरगदुतवा यापन धुतुहा फुकलिय हसे यकसवासे उका बरइकि नहिँया एगुडा जबड तरगन खसलिय। उअ एक तिहाइ लदियासभक हसे पनियाक मोहरवासभमा खसलिय।

¹¹ उअ तरगनवाक नाउँ “तिता” हखइ हसे उअ पनियाक तिन भागक एक भाग तिता बनादेलिय तके उअ तिता पनिया पिके बहुत मन्‍सेसभ मरलइ।

¹² वकरपाछा चउथि स्‍वरगदुतवा यापन धुतुहा फुकलिय, बेरियावा, जोन्‍हवा हसे तरगनवानिक तिन भागक एक भागमा ठोकलिय तके हुनुकर तिन भागक एक भाग यन्‍हार भेलइ। यसने दिन हसे रातक तिन भागक एक भाग यन्‍हार भेलइ।

¹³ तब मुइ हेरलहिँ, यकसवा वपरा एगुडा जबड चिल यसके कहते जबड माहे बजइकि सुनलहिँ, “धरतियामा बास करलहरानिके धिकार! धिकार! धिकार! केहकेकि बाँकि रहलि तिन जन स्‍वरगदुतवा यापन-यापन धुतुहा फुकतइ जउँ, धरतियामा यउना विपति झन कसनुक हतइ?”