प्रकास 15 - चितवनिया थारुसात स्वरगदुतसभ हसे सात विपति 1 तब मुइ स्वरगमा एगुडा जबड हसे यचम्मक दोसरे चिन्हा देखलहिँ। सात जन स्वरगदुतसभ हरेक जन एकहक गो अन्तिम विपति लेले रहलइ, केहकेकि हुनुकरमाहिँ परमेस्वरक खिस वराट भेल बडइ। 2 मुइ यागिसाङे मिझराइल सिसासे बनल समुनदर नहिँया देखलहिँ। वहवाँ पसुवा हसे वकर मुरतिया वपरा तके वकर नाउँक संख्या वपरा विजय पउलहरानिके देखलहिँ। हुनुका यापन हथवामा परमेस्वरक विडा लेके उअ सिसवाक समुनदरवाक तिरवामा ठडियाइल रहलइ। 3 हुनुका यसके कहके परमेस्वरक दास मोसा हसे पाठाक गित गवइ रहलइ, “हे परमप्रभु परमेस्वर सरवसक्तिमान, यपनहुँक काम महान हसे यचम्मक बडइ, जाति-जातिक राजा, यपनहुँक योजना ठिक हसे सत्य बडइ। 4 हे परमप्रभु, यपनहुँक डर कुने नाहिँ मान्तइ? हसे यपनहुँक नाउँक महिमा कुने नाहिँ करतइ? केहकेकि यपनहुँ मतरे पवितर बडहुँ। जम्मे जतिया याके यपनहुँके मान-यादर करतइ, केहकेकि यपनहुँक धारमिक कामसभ देखार भेल बडइ।” 5 यकरपाछा मुइ हेरलहिँ हसे स्वरगमा भेलि गवाहिक तम्बुवा भितरा सबसे पवितर ठउरिया खोललइ देखलहिँ। 6 साफा हसे चहकार लुगा लगावल तके छतियामा सोनक फिता बन्हाइल सात जन स्वरगदुतसभ सात गो विपति लेके पवितर ठउरियासे बाहरा निकडलइ। 7 तब उअ चार गो जिउते प्रनियामध्ये एगुडा प्रनिया उअ सात जन स्वरगदुतवानिके सात गो सोनक कचोरा देलइ। उअ सात गो सोनवाक कचोरवामा सबदिन जिउते रहलहरा परमेस्वरक खिस रहलइ। 8 परमेस्वरक महिमा हसे हुनेक सक्तिक कारन पवितर ठउरिया धुवासे भरेलइ। उअ सात जन स्वरगदुतवाक बोकलि सात विपति हइने वराइलइ कुनहुँ फेनि मन्दिरवा भितरा पेसे हइने सकलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.