प्रकास 10 - चितवनिया थारु

स्‍वरगदुत हसे कागतक झिनिक मुठा

¹ वकरपाछा मुइ दोसरे सक्‍तिसालि स्‍वरगदुतके स्‍वरगसे तर यवइकि देखलहिँ। वकर देहिया लुगा घेउटाइल नहिँया बादरसे घेउटाइल रहलइ हसे मुडवा वपरा धनबास रहलइ। वकर मोहडवा बेरिया नहिँया तके वकर टङवाह यागिक खामा नहिँया रहलइ।

² वकर हथवामा एगुडा झिनिक खोलल कागतक मुठा रहलइ। वकर दहिनि टङवा समुनदरवामा हसे लबडि टङवा भुयवामा रखलिय।

³ उअ जबड माहे सिंह नहिँया गुरनेलिय हसे गुरनेतेकि सातपारि गुरगुरभटभटक यवाज यलइ।

⁴ उअ बदरिया सातपारि गुरगुरभटभट करतेकि, मुइ लिखे लगलहिँ, बाकि स्‍वरगसे यसनुक एगुडा यवाज मुइ सुनलहिँ, “सात गो गुरगुरभटभट करलि यवाज झिन लिखहि, बाकि इअ बतवा मनवामा लोकाके रखसि।”

⁵ मुइ समुनदरवा हसे भुयवामा ठडियलि स्‍वरगदुतवाके देखले रहलहिँ, उअ यापन दहिनि हथवा स्‍वरगवरि उठोलिय।

⁶ सबदिन जिउते रहलाहर, यकास, धरति, समुनदर हसे हुनुकरमा भेलि जम्‍मे चिजु सिरिस्‍टि करलाहर परमेस्‍वरक नाउँमा उअ किरिया खाके याबे ढिला नाहिँ हतइ कहलिय।

⁷ बाकि सातु स्‍वरगदुतवा यापन धुतुहवा फुकलेपर परमेस्‍वर यापन सेवक अगमवक्‍तावानिके कहलि गुप्‍त योजना पुरा करबसि।

⁸ तब स्‍वरगसे मोर सुनलि स्‍वर मोरके फेरि यसके कहलिय, “जाहि! समुनदरवा हसे भुयवामा ठडियलि स्‍वरगदुतवाक हथवासे खोललि कगतवाक मुठवा लेहि।”

⁹ तब मुइ उअ स्‍वरगदुतवा लघिना जाके उअ झिनकि कगतवा मङलहि हसे उअ मोरके कहलिय, “इअ लेहि तके खाहि। इअ खेबहि जउँ, तोर मुहवामा मधुक रस नहिँया गुरिह हतइ, बाकि तोर पेटवामा यामित हतइ।”

¹⁰ मुइ स्‍वरगदुतवाक हथवासे उअ झिनकि कगतवाक मुठवा लेके खेलहिँ। मोर मुहवामा उअ मधुक रस नहिँया गुरिह भेलइ, बाकि उअ खइलेपर मोर पेटवा यामित भेलइ।

¹¹ तब मोरके यसके कहेलइ, “तुइ बहुत मन्‍सेसभके, बहुत जातिसभके, बहुत भासा हसे बहुत राजासभके परमेस्‍वरक वचन बारेमा फेरि सुनोहि परतइ।”