मरकुस 7 - चितवनिया थारु

रितिथितिक बारेमा

¹ एक दिन यरुसलेम सहरवासे यइलि किहो फरिसियाह हसे व्‍यवस्‍थाक-गुरुसभ याके येसुजिक चारिवरि जामा भेलइ।

² तखनहिँ हुनुका येसुजिक कुनहुँ-कुनहुँ चेलवानिके हथवा हइने धोके खाइकि देखलइ।

³ (केहकेकि फरिसियाह हसे जम्‍मे यहुदियाह हथवा हइने धोके जेउना हइने करइ। इअ हुनुकर पुरखावासे याइल चलन रहलइ।

⁴ हुनुका बजरवासे यइलेपर धोके हसे सुद्ध भके मतरे खाइ। यसने हुनुकर लोटा, कचोरा, भडिया-कुडिया धोवेके याको बहुत रितिथितिसभ फेनि रहलइ।)

⁵ उहेसे फरिसियाह हसे व्‍यवस्‍थाक-गुरुसभ येसुजिके पुछलइ, “यपनहुँक चेलवाह यापन पुरखावाक चलन यनुसार केहके हइने चलसइ, बरु हथवा हइने धोके खेसइ?”

⁶ तब येसुजि हुनुकाके कहलसि, “यसइया अगमवक्‍ताक कितबवामा लिखइलि इअ बतवा तोहरा कपटियानिके ठिकसे मिलसइ। केहकेकि उअ यसके लिखले बडिय, ‘इअ मन्‍सावाह मोरके मुहवासे मतरे यादर करसइ, बाकि हुनुकर हृदय मोरसे तनाउ बडइ।

⁷ हुनुका मोरके व्‍यरथमा उपासना करसइ, केहकेकि हुनुका मन्‍सावानिक बनावल नियमसभ सिखोसइ।’

⁸ “तोहरा परमेस्‍वरक धारमिक आग्या माने छाडके मन्‍सावानिक रितिथिति मतरे मनसह।”

⁹ वकरपाछा येसुजि कहलसि, “तोहरा यापन रितिथितिसभ मानेके तहिँया कतुरा चलाखसे परमेस्‍वरक आग्या इन्‍कार करसह।

¹⁰ जसने मोसा कहले बडिय, ‘यापन दाओ-बाबाके यादर करिह’ हसे ‘जुने यापन दाओ-बाबाके सरापतइ वकरेके मारहिँ परतइ।’

^11-12 बाकि तोहरा यसके सिखोसह, यगर कुनहुँ मन्‍से यापन दाओ-बाबाके मदत करेके तहिँया जथि देवेके रहलइ, उअ ‘कुरबान’ हखइ, (यरथ परमेस्‍वरक तहिँया भाखल भेल बडइ) कहके कहबह जउँ, उअ मन्‍सावा यापन दाओ-बाबाक तहिँया किहो करे नाहिँ परतइ।

¹³ यसने तोहरा यापन चलल याइल रितिथितिसभ पालन करके परमेस्‍वरक वचनके हेला करसह हसे वसने याको बहुत काम फेनि करसह।”

मन्‍सेके असुद्ध पारना चिजुसभ

¹⁴ वकरपाछा येसुजि फेरि मन्‍सावानिके यापन लघिना बलोलसि हसे हुनुकाके यसके कहलसि, “तोहरा जम्‍मे जन मोर बतवा सुनह हसे बुझह।

¹⁵ बाहरासे मन्‍सावाक भितरा पेसलि खइना चिजु मन्‍सावाके असुद्ध नाहिँ बनोतइ, बाकि मन्‍सावाक भितरासे निकडलि बतवा मतरे मन्‍सावाके असुद्ध बनोतइ।

¹⁶ [जाकर कान बडइ, उअ सुनिय।”]

¹⁷ जब येसुजि मन्‍सावानिके छाडके घरवा भितरा पेसलसि, तब हुनेक चेलवाह इअ दृस्‍टान्‍तक बतवाक यरथ बुझादेहुँ कहके कहलइ।

¹⁸ तब येसुजि हुनुकाके कहलसि, “कथि यखनिलइ तोहरा हइने बुझले बडह? जथि चिजु बाहरासे मन्‍सावाक भितरा पेससइ, उअ चिजुवा वकरेके असुद्ध हइने बनोसिय कहके तोहार हइने थाह बडइ?

¹⁹ केहकेकि उअ चिजुवा मन्‍सावाक हृदय भितरा हइने पेससइ, बरु पेटवामा जेसइ हसे वहवाँसे फेनि बाहरा निकडके जेसइ।” (इअ कहके येसुजि जम्‍मे खइना चिजुसभ सुद्ध बडइ कहके कहलसि।)

²⁰ वकरपाछा येसुजि कहलसि, “मन्‍सावाक हृदय भितरासे निकडलि बतवा वकरेके असुद्ध पारसिय।

^21-22 केहकेकि, खराब विचार, बेसिया, चोरि, हत्‍या, धुचुड, लोभ, दुस्‍ट काम, छल, कामुकता, डाह, घिरिना, घमन्‍डि हसे मुरुखता मन्‍सावाक हृदयसे निकडोसइ।

²³ यसनुक जम्‍मे खराब बातसभ मन्‍सावाक हृदयसे निकडके वकरेके असुद्ध पारसइ।”

ग्रिक-जाति जनियानिक विस्‍वास

²⁴ वकरपाछा येसुजि उअ ठउरिया छाडके टुरोस हसे सिदोन सहरवाहवरि गेलसि। इअ बतवा कुनहुँ फेनि थाह झिन पवइ कहके हुने एक जनक घरमा पेसलसि, बाकि मन्‍सावाह थाह पउबे करलइ।

²⁵ तखनहिँ एक जन जनियानि, जाकर बेटियाक दुस्‍ट-आत्‍मा लागल रहलइ, उअ येसुजिक बारेमा सुनके वइघरहिँ याके हुनेक पाउ परलिय।

²⁶ उअ जनियावा सिरियाक फोनिके छेतरमा जरमल एगुडा ग्रिक जातिक जनियानि रहलिय। उअ यापन बेटियासे दुस्‍ट-आत्‍मा निकडादेहुँ कहके येसुजिके बिन्‍ति करलिय।

²⁷ बाकि येसुजि कहलसि, “पहिला हमरा यापन बाल-बचवानिके खियावे परसइ। हुनुकर खइना चिजुवा निछुरके कुकुरानिक यागा फाँकेके डउल हइने हखइ।”

²⁸ तब उअ जनिनिया कहलिय, “प्रभुजि, इअ त ठिके हखइ! बाकि कुकुराह फेनि त बाल-बचवानिक खइलि ठउरियासे झरलि खडवासभ खेसइ।”

²⁹ इअ सुनके येसुजि वकरेके कहलसि, “तुइ ठिक उतर देलहि, उहेसे याबे सान्‍तिसे घर जाहि, तोर बेटियासे दुस्‍ट-आत्‍मा निकडके गेसकल बडिय!”

³⁰ जब उअ फिरके घर गेलिय, यापन बेटियाके डउल भके बिछोनवामा सुतल देखलिय, केहकेकि वकर बेटियासे दुस्‍ट-आत्‍मा निकडल रहलिय।

बहिर हसे गेडाह मन्‍से डउल भेल

³¹ वकरपाछा येसुजि टुरोससे फिरके सिदोन सहर हसे डेकापोलिस छेतर हखते गालिल तलवावरि गेलसि।

³² तखनहिँ कतेक जन मन्‍सेसभ बहिर हसे डउलसे फदके हइने सकलाहर एक जन मन्‍सेके येसुजि लघिना यनलइ। हुनुका येसुजिसाङे इअ मन्‍सावा वपरा यापन हथवा राखदेहुँ कहके बिन्‍ति करलइ।

³³ उहेसे येसुजि वकरेके भिडवासे इचिका वताहुँ लिगलसि। वकरपाछा, हुने वकर कनवामा यापन यङगुरिया गहदेलसि हसे थुकके वकर जिभिया छुदेलसि।

³⁴ वकरपाछा येसुजि स्‍वरगवरि हेरके नमहर सास लेते कहलसि, “इफ्‍फाता” यकर यरथ “खोलाहि” हखइ,

³⁵ इअ कहतेकि वकर कनवा खुललइ, वकर जिभिया चललइ हसे उअ डउलसे फदके लगलिय।

³⁶ तब येसुजि हुनुकाके “इअ बतवा ककरहुँके फेनि झिन कहिह” कहके काडा आग्‍या देलसि। बाकि जतुरा बहुत हुने मन्‍सावानिके झिन कहिह कहके आग्‍या देलसि, हुनुका उअ बतवा झन याको फइलोते गेलइ।

³⁷ इअ बतवा सुनलहरा जम्‍मे जन खाँ यचम्‍म मानके यसके कहे लगलइ, “येसुजि जम्‍मे कमवा यसल करले बडसि। हुने बहिराके सुनाह हसे गेडहाके फदकाह बनोससि।”