मरकुस 2 - चितवनिया थारु

धार-हइने चल्‍ना रोग लागल मन्‍से डउल भेल

¹ किहो दिन पाछा फेरि येसुजि कफरनहुम सहरवामा फिरलसि। जब हुने घरवामा बडसि कहके समाद फइललइ,

² तब यतुरा मन्‍से जामा भेलइ कि वहवाँ ठउरि हइने भेलइ। यहवाँलइ कि दुवरियाक बाहरा फेनि ठउरि हइने रहलइ। तखनहिँ येसुजि मन्‍सावानिके परमेस्‍वरक वचन परचार करइ रहलसि।

³ तखनहिँ चार जन मन्‍से धार-हइने चल्‍ना रोग लागल एक जन मन्‍सेके बोकके वहवाँ यनलइ।

⁴ बाकि मन्‍सेसभक भिड भेलेसे, वकरेके येसुजिक लघिना याने हइने सकलइ। उहेसे हुनुका येसुजि भेलि ठउरियाक ठिक वपराक छनिया उजरलइ हसे उजरलि ठउरियासे उअ धार-हइने चल्‍ना रोग लगलि मन्‍सावाके बिछोनवासाङे येसुजिक यागा नभोलइ।

⁵ येसुजि हुनुकर विस्‍वास देखके, उअ धार-हइने चल्‍ना रोग लगलि मन्‍सावाके कहलसि, “अरे बबुवा, तोर पापसभ छमा भेलइ।”

⁶ इअ बतवा सुनके वहवाँ भेलि कतेक व्‍यवस्‍थाक-गुरुसभ मने-मने यसके कहे लगलइ,

⁷ “इअ मन्‍सावा केहके यसनुक बात कहइ बडिय? इअ त परमेस्‍वरक निना करइ बडिय। परमेस्‍वर बिना याको कुनहुँ फेनि मन्‍सेक पाप छमा करे नाहिँ सकतइ।”

⁸ बाकि येसुजि हुनुकर मनवाक बतवा जानके हुनुकाके कहलसि, “तोहरा केहके यसनुक विचार करइबडह?

⁹ इअ मन्‍सावाके ‘तोर पापसभ छमा भेलइ’ कहेके उसार बडइ कि, ‘उठ हसे बुलहि’ कहेके उसार बडइ, मोरके कहह त?

¹⁰ बाकि तोहरा जनिह कि, इअ धरतियामा मुइ मन्‍सेक पुतरक पाप छमा करेके अधिकार बडइ।” तब येसुजि उअ मन्‍सावाके कहलसि,

¹¹ “मुइ तोरके कहइ बडहिँ, उठहि हसे यापन बिछोनवा बोकके घर जाहि।”

¹² तब उअ मन्‍सावा भकदरे उठलिय हसे वइघरहिँ यापन बिछोनवा बोकके बुललिय। इअ देखके मन्‍सावाह छक परलइ हसे परमेस्‍वरक बखान करते यसके कहे लगलइ, “हमरा त यसनुक घटना कबहुँ फेनि हइने देखले रहलहुँ।”

येसुजि कर उठोलहर लेविके बलोलसि

¹³ येसुजि फेरि गालिल तलवाक तिरवामा गेलसि। तखनहिँ बहुत मन्‍से वहवाँ यावे लगलइ हसे येसुजि हुनुकाके सिछा देवे लगलसि।

¹⁴ येसुजि वहवाँसे जाइखुनि अल्‍फायसक बेटवा लेविके कर उठोना यडवामा बइठल देखलसि। हुने वकरेके कहलसि, “मोर पाछा लाग।” तब उअ उठके येसुजिक पाछा लगलिय।

¹⁵ जब येसुजि लेविक घरवामा जाके जेउना करे लगलसि, वहवाँ बहुत जन कर उठोलहर हसे पापि मन्‍सेसभ फेनि येसुजि तके हुनेक चेलवानिसाङे जेउना करे बेठलइ। केहकेकि हुनुका बहुत जन रहलइ हसे येसुजिक पाछा लागल रहलइ।

¹⁶ वहवाँ भेलि फरिसि दफवाक व्‍यवस्‍थाक-गुरुसभ इअ देखके चेलवानिके यसके कहे लगलइ, “उअ केहके यसनुक कर उठोलहर हसे पापि मन्‍सावानिसाङे बइठके जेउना करइ बडिय?”

¹⁷ तब येसुजि इअ सुनके जवाफ देके कहलसि, “बइध त हइने मनियइलि मन्‍सावाके हइने, बाकि मनियइलि मन्‍सावाके चाहिँ लगसइ। मुइ धरमि मन्‍सेसभके हइने, बाकि पापि मन्‍सेसभके बचावे याइल बडहिँ।”

उपासक बारेमा येसुजिके प्रस्‍न

¹⁸ एक दिन जब बप्‍तिस्‍मा देलाहर युहन्‍नाक चेलवाह हसे फरिसियाह उपास रहलइ, कतेक जन येसुजि लघिना याके यसके पुछलइ, “बप्‍तिस्‍मा देलाहर युहन्‍नाक चेलवाह हसे फरिसियानिक चेलवाह त उपास रहसइ, बाकि यपनहुँक चेलवाह केहके उपास हइने रहसइ त?”

¹⁹ तब येसुजि हुनुकाके जवाफ देते कहलसि, “कथि दुलहावा यापन सङहतियवानिसाङे रहइकि हुनुका उपास रहतइ त? दुलहावा हुनुकरसाङे रहइकलइ हुनुका उपास नाहिँ रहतइ।

²⁰ बाकि एक दिन यतइ, जब दुलहावा हुनुकरसे लिगेबिय, तब हुनुका उअ दिन उपास रहतइ।

²¹ “कुनहुँ फेनि पुरान लुगामा लउठा लुगाक पेउना हइने लगोसइ। यगर लगोबिय जउँ लउठि लुगवा फेनि बिगडतइ हसे झन याको जबड भोङ हतइ।

²² यसने, कुनहुँ फेनि लउठा अंङगुरक मोद पुरान छालक-मसकमा हइने धरसइ, यगर धरले जउँ पुरनि छालक-मसकवा फुटतइ हसे अंङगुरवाक मोदवा फेनि हरकतइ। बाकि लउठा अंङगुरक मोदवा लउठि छालक-मसकमा धरे परतइ।”

विसराम दिनक बारेमा प्रस्‍न

²³ जब येसुजि एक विसराम दिनवामा गोहुँवाक खेतवा भके जाइरहलसि, तब हुनेक चेलवाह गोहुँवाक बलिया टुरे लगलइ।

²⁴ इअ देखके फरिसियाह येसुजिके कहलइ, “हेरहुँ त, विसराम दिनमा व्‍यवस्‍था यनुसार जथि हइने करे बनसइ, हुनुका केहके उहे करइ बडइ?”

²⁵ येसुजि जवाफ देते कहलसि, “कथि तोहरा हइने पढल बडह? जब दाउद रजवा हसे वकर सङहतियवानिक भुख लगलइ, तब दाउद रजवा कथि करले रहलिय?”

²⁶ अबियाथार मुख्‍य पुजेरि हखइकि कस्‍के दाउद रजवा परमेस्‍वरक घरवामा पेसलिय हसे परमेस्‍वरके चढोलि रोटिया सङहतियावासाङे मिलके खेलिय। जुन रोटिया पुजेरियानिके मतरे खाए मिलइ, दाउद रजवा उअ रोटिया लेके यपने खेलिय हसे यापन सङहतियवानिके फेनि खाएके देलिय।

²⁷ तब येसुजि फरिसियानिके कहलसि, “विसराम दिन मन्‍सावानिक तहिँया बनल हखइ, बाकि मन्‍सावाह विसराम दिनक तहिँया बनल हइने हखइ।

²⁸ उहेसे मुइ मन्‍सेक पुतर विसराम दिनक फेनि प्रभु हखहि।”